Read efik LUKE 4 Bible Online

LUKE 4 - efik bible

LUKE 4

¹EDI Jesus ɔyɔhɔ ye Edisana Spirit afiak ɔkpɔŋ Jordan; Spirit onyuŋ ada Enye asasaŋa ke desert ke usen aba, ndien Satan odomo Enye.

²Enye ikadiaha ŋkpɔ ke mme usen oro: ndien ke ini mmɔ ebede enye okop biɔŋ.

³Edi satan ɔdɔhɔ Enye ete, Edieke Afo edide Eyen Abasi, wuk itiat emi akabare edi uyo.

⁴Ndien Jesus ɔbɔrɔ enye ete, Ema ewet ete, idige uyo ikpɔŋ ke owo edida odu uwem.

⁵Ekem Satan ada Enye ɔdɔk, onyuŋ owut Enye kpukpru mme obio ekondo ke idaha kiet.

⁶Satan onyuŋ ɔdɔhɔ Enye ete, Nyenɔ Fi ofuri odudu emi ye ubɔŋ mme obio emi: koro ema eyak kpukpru enɔ mi, nnyuŋ nda ubɔŋ oro nnɔ owo eke mmade.

⁷Mmɔdo edieke Afo edituakde ibuot ke iso mi kpukpru eyedi okuo.

⁸Edi Jesus ɔbɔrɔ enye ete, Ema ewet ete, Tuak ibuot nɔ Jehovah Abasi fo, nyun nam ŋkpɔ nɔ Enye ikpɔŋ-ikpɔŋ.

⁹Ekem Satan ada Enye oduk ke Jerusalem, odori Enye ke edikoŋ ebiet temple, onyuŋ ɔdɔhɔ Enye ete, Edieke Afo edide Eyen Abasi, sio Idem Fo mi duɔk ke isɔŋ,

¹⁰koro ema ewet ete, Enye eyenɔ mme angel Esie uyo abaŋa Fi, ete ekpeme Fi ŋko,

¹¹Mmɔ eyekama Fi ke ubɔk mmɔ, Mbak Afo edituak ukot Fo ke itiat.

¹²Ndien Jesus ɔbɔrɔ enye ete, Ema ewet ete, Kudomo Jehovah Abasi fo.

¹³Ndien ke ini Satan ama okodomo Enye ama, enye adaha ɔkpɔŋ Enye ke ekpri ini.

¹⁴Ekem Jesus afiak edi ke Galilee ke odudu Spirit: etop Esie onyuŋ asuana akanare ofuri edem oro.

¹⁵Ndien Enye ekpep mmɔ ŋkpɔ ke mme synagogue mmɔ, kpukpru owo enyuŋ etoro Enye.

¹⁶Ekem Enye edi ke Nazareth, kpa ke ebiet emi ekebɔkde Enye: ndien nte ido Esie edide, Enye oduk ke synagogue ke usen sabbath, onyuŋ adaha ke enyɔŋ ndikot ŋwed.

¹⁷Ndien enɔ Enye ŋwed prophet Isaiah. Ndien ke Enye okibɔrede ŋwed, okut itie emi ewetde ete,

¹⁸Spirit Jehovah odoro Mi ke idem, Koro Enye emeyet Mi aran onim, ete, ŋkwɔrɔ eti mbuk nnɔ nditɔ-ubuene: Enye ɔmɔdɔŋ Mi, ete, ŋkwɔrɔ uwɔrɔ-ufin nnɔ mbuotekɔŋ, Nnyuŋ ŋkwɔrɔ erikut usuŋ nnɔ mme nnan, Nnyuŋ nsana mmɔ emi efikde nyak,

¹⁹Nnyuŋ ŋkwɔrɔ isua mfɔn-ido Jehovah.

²⁰Ndien Enye okibi ŋwed, ayak ɔnɔ asaŋutom, onyuŋ ɔsuhɔre etetie: kpukpru mmɔ emi edude ke synagogue enyuŋ ewuk enyin ese Enye.

²¹Enye ɔtɔŋɔ ndidɔhɔ mmɔ, ete, Ikɔ ŋwed Abasi emi omosu ke utɔŋ mbufo mfin emi.

²²Kpukpru mmɔ enyuŋ edi ntiense enɔ Enye, enyuŋ edu ke mkpa-idem ndikop ikɔ mfɔn eke ewɔŋɔde Enye ke inua: mmɔ nyuŋ edɔhɔ ete, Nte Enye emi idige eyen Joseph?

²³Ndien Enye ɔdɔhɔ mmɔ ete, Mbufo iditreke nditop ŋke emi nnɔ Mi, ete, Abia-ibɔk, kɔk idemfo: kpukpru se ikokopde ite amanam ke Capernaum, nam mi ŋko ke obio fo.

²⁴Edi Enye ete, Edi akpanikɔ ke ndɔhɔ mbufo nte, Owo idaha baba prophet kiet ke ŋkpɔ ke isɔŋ emana esie.

²⁵Edi ntiŋ akpanikɔ nnɔ mbufo nte, Ediwak mme ebe-akpa ekedu ke Israel ke eyo Elijah, ke ini esiride ikpa-enyɔŋ isua ita ye ɔfiɔŋ itiokiet, akamba akaŋ onyuŋ odude ke ofuri isɔŋ;

²⁶edi idɔŋke Elijah etiene mmɔ baba kiet, ke mibɔhɔke ebe-akpa aŋwan, emi odude ke Zarephath ke isɔŋ Sidon.

²⁷Ediwak medɔŋɔ akpa-mfia ekenyuŋ edu ke Israel ke eyo Elisha prophet; edi inamke baba owo kiet ke otu mmɔ asana, ke mibɔhɔke Naaman, owo Syria.

²⁸Ndien ifuresit ɔyɔhɔ mmɔ kpukpru emi edude ke synagogue, ke adaŋemi mmɔ ekopde ŋkpɔ emi;

²⁹mmɔ enyuŋ ebumere edaha ke enyɔŋ ebin Enye ɔwɔrɔ ke obio, enyuŋ eda Enye edi ke ibuot obot emi ebɔpde obio mmɔ ke esit, man esio Enye eduɔk.

³⁰Edi Enye ebe ke ufɔt mmɔ ɔnyɔŋ Esiemɔ.

³¹Ekem Enye ɔsuhɔre edi ke Capernaum, emi edide obio Galilee.

³²Enye onyuŋ ekpep mmɔ ŋkpɔ ke sabbath: ndien erikpep Esie enyene mmɔ ndyɔ, koro ikɔ Esie asaŋade ye odudu.

³³Ndien owo kiet odu ke synagogue, emi enyenede edidehe spirit demon; enye onyuŋ ofiori ke ɔkpɔsɔŋ uyo ete Ah! isaŋa nso ye Afo,

³⁴Jesus eyen Nazareth? Nte emedi ndisobo nnyin? mmɔdiɔŋɔ owo eke Afo edide, Edisana Eyen Abasi.

³⁵Edi Jesus asua ɔnɔ enye ete, Kibi inua; nyuŋ wɔrɔ enye ke idem. Ndien ke ama okosio enye ɔduɔk ke iso mmɔ, ɔwɔrɔ enye ke idem, inamke enye baba ŋkpɔ kiet.

³⁶Mkpa-idem omum mmɔ kpukpru, mmɔ enyuŋ etiŋ ke otu idem mmɔ ete, Nso oruk ikɔ edi emi? koro Enye adade nsɔŋ-uyo ye odudu owuk ndidehe spirit, ndien mmɔ ewɔŋɔ.

³⁷Etop Esie onyuŋ asuana osim kpukpru ebiet ke edem oro akanare okuk.

³⁸Ekem Enye adaha ke enyɔŋ ɔwɔrɔ ke synagogue oduk ke ufɔk Simon. Ndien ɔkpɔsɔŋ ufiop-idem omum eka ŋwan Simon: mmɔ enyuŋ ekpe Jesus ubɔk enɔ enye.

³⁹Ndien Enye ada ekpere enye, asua ɔnɔ ufiop-idem; ndien ufiop-idem ɔkpɔŋ enye: enye onyuŋ adaha ke enyɔŋ ini kiet anam ŋkpɔ ɔnɔ mmɔ.

⁴⁰Ndien ke ini eyo oyomde ndikut, kpukpru owo eke enyenede mbon emi edɔŋɔde nsio-nsio udɔŋɔ, eda mmɔ esɔk Jesus; Enye onyuŋ odori mmɔ kpukpru ubɔk ndien anam udɔŋɔ okure mmɔ.

⁴¹Demon enyuŋ ewɔŋɔ ediwak owo ke idem, efiori ete, Afo edi Eyen Abasi. Edi Enye asua ɔnɔ mmɔ iyakke mmɔ esioro uyo; koro mmɔ efiɔkde ete Enye edi Christ.

⁴²Edi ke adaŋemi eyo esierede, Enye adaha aka ke ebiet desert: ndien mme otu owo eyom Enye, enyuŋ edi edisim Enye, ebɔbiɔŋɔ Enye ete, Okukpɔŋ mme imɔ.

⁴³Ndien Enye ɔdɔhɔ mmɔ ete, Mmenyene ndikwɔrɔ eti mbuk ubɔŋ Abasi nnɔ mme obio eŋwen ŋko: koro ekedɔŋ Mi ete ndinam oro.

⁴⁴Ndien Enye asaŋa ɔkwɔrɔ ikɔ ke mme synagogue Galilee.