Read efik LUKE 5 Bible Online

LUKE 5 - efik bible

LUKE 5

¹EDIKEM ke adaŋemi otu owo efihede Enye man ekop ikɔ Abasi, Enye ada ke mben inyaŋ Gennesaret;

²ndien Enye okut ubom iba enade ke mben inyaŋ: edi mme ɔkɔ-iyak ema ewɔŋɔ, ke enyuŋ edarare iyire mmɔ.

³Edi Enye oduk ke ubom kiet emi enyenede Simon, onyuŋ ɔdɔhɔ enye ete onuk ubom ɔkpɔŋ obot esisit. Enye onyuŋ ɔsuhɔre etetie ke ubom ekpep mme otu owo ŋkpɔ.

⁴Ke Enye ama eketiŋ ikɔ okure, ɔdɔhɔ Simon ete, ewat ewɔrɔ ke udem, enyuŋ eduɔŋɔ iyire man emum iyak.

⁵Simon ɔbɔrɔ ete, Ɔbɔŋ, nnyin ikakpa utom ofuri okoneyo, inyuŋ imumke baba ŋkpɔ kiet: edi ke uyo Fo nyeduɔk iyire.

⁶Ndien ke ini mmɔ enamde ntre, mmɔ ekuk ata ediwak iyak emum, ndien iyire mmɔ ɔtɔŋɔ ndiwaha.

⁷Ndien mmɔ enam idiɔŋɔ ekot mme nsaŋa mmɔ, emi edude ke ubom eken, ete edi edinwam mme imɔ. Mmɔ oro edi, eyɔhɔ ubom mbiba ye iyak, tutu mmɔ etɔŋɔ ndisop.

⁸Ke Simon Peter okutde emi, ɔduɔ Jesus ke edɔŋ, ofiori ete, Daha kpɔŋ mi, O Ɔbɔŋ, koro ami ndide idiɔk owo.

⁹Koro idem akpade enye ye mme nsaŋa esie eti-eti, ke utɔ ediwak iyak eke mmɔ ekemumde.

¹⁰Onyuŋ edi ntre ɔnɔ James ye John ŋko, nditɔ Zebedee, mme nsaŋa Simon. Ndien Jesus ɔdɔhɔ Simon ete, Kufehe ndik; tɔŋɔ ke emi afo eyekɔ owo.

¹¹Ndien ke mmɔ ewatde ubom ebehe ke esuk, mmɔ ekpɔŋ kpukpru ŋkpɔ, etiene Jesus.

¹²Edikem, ke Jesus odude ke obio kiet, sese owo emi ɔyɔhɔde ye akpa-mfia ke idem, ke okutde Jesus, ɔduɔ ke isɔŋ okibi iso esie, onyuŋ ekpe Enye ubɔk ete, Ɔbɔŋ, ke Afo onyimede, emekeme ndinam mi nsana.

¹³Do Enye anyanare ubɔk otuk enye, ete,Mmonyime, sana; ndien ndo-ndo oro akpa-mfia ɔkpɔŋ enye.

¹⁴Ndien Jesus owuk enye ete, Kutiŋ unɔ baba owo kiet: edi ka okuo kowut oku idemfo, nyuŋ wa uwa nte Moses eketemede ke erinam fi asana, man edi ŋkpɔ-ntiense ɔnɔ mme owo.

¹⁵Edi etop Esie ɔdɔdiɔŋ asuana akan; ndien akwa otu owo edi ndikop Enye, man Enye onyuŋ anam mme udɔŋɔ mmɔ ekure.

¹⁶Edi Enye ɔkpɔŋ mmɔ aka ke desert ikpɔŋ onyuŋ ɔbɔŋ akam.

¹⁷Ekem ke usen kiet, nte Enye ekpepde owo ŋkpɔ, mme Pharisee ye mme ekpep-ibet, emi ekotode ke kpukpru obio-iŋwaŋ Galilee ye Judaea, ye ke Jerusalem, enyuŋ etie do: odudu Jehovah onyuŋ odu ye Enye ndinam udɔŋɔ okure.

¹⁸Ndien sese, mme owo ebiom ɔdɔŋɔ-akpa-ubeŋ kiet ke mbri edi: mmɔ enyuŋ eyom ndida enye nduk ndinim ke iso Jesus.

¹⁹Edi adaŋemi mmɔ mikwe usuŋ nte edade enye eduk ke ntak otu owo, mmɔ edɔk ɔkɔm ufɔk, ekibɔre ŋkanya, esuhɔre enye ke mbri esie enim ke ufɔt ke iso Jesus.

²⁰Ke ini Jesus okutde mbuɔtidem mmɔ, ɔdɔhɔ owo oro ete, Owo, emefen mme idiɔk-ŋkpɔ fo.

²¹Edi mme scribe ye mme Pharisee etɔŋɔ ndineni, ete, Anie edi enye emi osuŋide Abasi? Anie ekeme ndifen mme idiɔk ŋkpɔ ke mibɔhɔke Abasi ikpɔŋ-ikpɔŋ?

²²Edi Jesus ɔfiɔk se mmɔ enenide, onyuŋ ɔbɔrɔ mmɔ ete, Nsinam mbufo enenide ke esit Mbufo?

²³Ewe emem akan, mme ndidɔhɔ ete, Emefen mme idiɔk ŋkpɔ fo? mme ndidɔhɔ ete, Daha ke enyɔŋ, saŋa?

²⁴Edi man mbufo efiɔk ete Eyen Owo enyene odudu ke isɔŋ ndifen mme idiɔk ŋkpɔ (Enye ɔdɔhɔ ɔdɔŋɔ-akpa-ubeŋ ete), Ndɔhɔ fi nte, Daha ke enyɔŋ, men mbri fo, nyɔŋ ufɔk.

²⁵Ke idaha kiet enye adaha ke enyɔŋ ke iso mmɔ, emen se enye akanade ke esit ɔnyɔŋ ufɔk ɔnɔ Abasi itoro.

²⁶Ndien mkpa-idem omum kpukpru owo, mmɔ enyuŋ etoro Abasi; ndik onyuŋ ɔyɔhɔ mmɔ ke esit, mmɔ enyuŋ edɔhɔ ete, Nnyin imokut mme utibe ŋkpɔ mfin.

²⁷Ekem ke mme ŋkpɔ emi ema ekebe, Jesus ɔwɔrɔ aŋwa, okut publican kiet, emi ekerede Levi, etiede ke itie ubɔ-utomo, onyuŋ ɔdɔhɔ enye ete, Tiene Mi.

²⁸Ndien Levi adaha ɔkpɔŋ kpukpru ŋkpɔ etiene Enye.

²⁹Levi onyuŋ anam akamba udia ke ufɔk esie ɔnɔ Jesus; akwa otu mme publican ye mmɔ efen enyuŋ etetie ke itie-udia ye mmɔ.

³⁰Edi mme Pharisee ye mme scribe mmɔ esuk Enye uyo enɔ mbet Esie, ete, Nsinam mbufo ediade enyuŋ eŋwɔŋde ŋkpɔ ye mme publican ye mme idiɔk owo?

³¹Edi Jesus ɔbɔrɔ mmɔ ete, Mmɔ emi enyenede nsɔŋidem iyomke abia-ibɔk; edi mmɔ emi edɔŋɔde eyom.

³²Ŋkedige ndikot ndinen owo, edi ŋkedi ndikot mme idiɔk owo, nte ekabare esit.

³³Mmɔ enyuŋ edɔhɔ Enye ete, Mbet John ewak nditre udia, enyuŋ enam mkpe-ubɔk; ye mbet mme Pharisee ŋko; edi mbet Fo edia enyuŋ eŋwɔŋ ŋkpɔ.

³⁴Edi Jesus ɔdɔhɔ mmɔ ete, Nte mbufo emekeme ndinam nditɔ ufɔk-ndɔ etre udia, ke ini ebe-ndɔ odude ye mmɔ?

³⁵Edi mme usen eyedi eke edibɔde mmɔ ebe-ndɔ; mmɔ eyetre udia ke mme usen oro.

³⁶Enye onyuŋ otop ŋke ɔnɔ mmɔ, ete, Baba owo kiet iwakke ubak obufa ɔfɔŋidem ida ikim idian ke akani ɔfɔŋidem: ama anam ntre, enye awak obufa ɔfɔŋidem, ŋko-ŋko ubak obufa ɔfɔŋ isaŋake ikekem ye akani.

³⁷Baba owo kiet inyuŋ isinke obufa wine ke ŋkani ikpa; ama anam ntre, obufa wine eyesiak ikpa, onyuŋ ɔduɔhɔ, ikpa eyenyuŋ ebiara.

³⁸Edi enyene ndisin obufa wine ke mbufa ikpa.

³⁹Baba owo kiet emi ɔkɔŋwɔŋde akani wine iyomke obufa idaha oro; koro enye edidɔhɔ ete, Akani ɔfɔn.