Read efik DEUTERONOMY 1 Bible Online

DEUTERONOMY 1 - efik bible

DEUTERONOMY 1

¹MME ikɔ emi ke Moses ɔkɔdɔhɔ ye ofuri Israel ke edem Jordan oko ke wilderness, ke itihere emi asakde iso ese Suph, ke ufɔt Paran, ye Tophel, ye Laban, ye Hazeroth, ye Dizahab.

²Eda isaŋ usen duopekiet ke obot Horeb ke usuŋ Seir ekesim ke Kadesh-barnea.

³Edikem ke ɔyɔhɔ isua aba, ke ɔyɔhɔ ɔfiɔŋ duopekiet, ke akpa usen ɔfiɔŋ, Moses ɔdɔhɔ nditɔ Israel, nte ekemde ye kpukpru se Jehovah eketemede enye abaŋa mmɔ;

⁴ke adaŋemi enye ama akakan Sihon ɔbɔŋ mme Amorite, emi oduŋde ke Heshbon, ye Og ɔbɔŋ Bashan, emi oduŋde ke Ashtaroth ke Edrei.

⁵Moses ɔtɔŋɔ nditaŋa mbet emi ke edem Jordan oko, ke isɔŋ Moab, ete,

⁶Jehovah Abasi nnyin ama ɔdɔhɔ ye nnyin ke Horeb, ete, Mbufo emeduŋ ke obot emi ekem:

⁷mbufo ekabare edaŋa eka ke obot mme Amorite, ye ke ɔtɔ kpukpru mbɔhiduŋ mmɔ, ke itihere Jordan, ye ke ikpɔ obot, ye ke una-isɔŋ edem inyaŋ, ye ke edem usuk-usuk, ye ke mben inyaŋ, kpa isɔŋ mme Canaanite, ye Lebanon, tutu osim ke akwa akpa, akpa Euphrates.

⁸Sese, mmonim isɔŋ oro ke iso mbufo: eduk ekeda isɔŋ emi Jehovah ɔkɔŋwɔŋɔde ɔnɔ mme ete mbufo, Abraham, ye Isaac, ye Jacob, ete eyenɔ mmɔ ye nditɔ mmɔ emi editienede mmɔ edem.

⁹Ndien mma ndɔhɔ mbufo ke ini oro, nte ke ŋkemeke ndikama mbufo ke idem mi ikpɔŋ:

¹⁰Jehovah Abasi mbufo ama anam mbufo etɔt, ndien, sese, mfin emi mbufo emewak nte ntantafiɔŋ ke ikpa-enyɔŋ.

¹¹Jehovah Abasi mme ete mbufo akpakam ɔkɔrɔ mbufo utim ikotɔsin ewak ekan adaŋa nte mbufo edide, onyuŋ ɔdiɔŋ mbufo, kpa nte enye ɔkɔdɔhɔde mbufo.

¹²Ami ke idem mi ikpɔŋ ndikeme didie ndibiom afanikɔŋ mbufo, ye mbiomo mbufo, ye utɔk mbufo?

¹³Mbufo ekam esat mbon eti ibuot ke idem mbufo, ye mme asian owo, ye mbon ikike, ke mme esien mbufo, ndien nyenim mmɔ ke mme etubom mbufo.

¹⁴Ndien mbufo ebɔrɔ mi, ete, Ɔfɔn ndi-nam ke ikɔ emi afo ɔdɔhɔde.

¹⁵Ndien nda ikpɔ owo mme esien mbufo, mbɔŋ eti ibuot, emi enyuŋ efiɔkde ŋkpɔ, nnim mmɔ ke mbɔŋ mbufo, mme etubom mme tɔsin, ye mme etubom mme ikie, ye mme etubom mme aba ye duop, ye mme etubom mme duop, ye mme andidaha owo ke mme esien mbufo.

¹⁶Ndien mma nnyuŋ ŋwuk mme ebierikpe mbufo, ke ini oro, nte, Mbufo ekop ikɔ nditɔ-ete mbufo, enyuŋ ekpe edinen ikpe ke ufɔt owo ye eyen-ete esie, ye esen owo esie.

¹⁷Mbufo ekuteŋe owo enyin ke ikpe: ekop uyo ekpri owo, kpa nte uyo akamba owo; mbufo ekubak iso owo; koro ikpe edide eke Abasi: ndien mbufo eda ikɔ eke ɔsɔŋde akan mbufo, esɔk mi man ŋkop enye.

¹⁸Ndien ke ini oro ŋkowuk mbufo kpukpru ŋkpɔ emi mbufo eyenede ndinam.

¹⁹Ekem nnyin idaŋa ke Horeb, isaŋa ibe ke ofuri akwa akpakop wilderness oro mbufo ekekutde ke usuŋ obot mme Amorite, kpa nte emi Jehovah Abasi nnyin okowukde nnyin; ndien nnyin idisim ke Kadesh-barnea.

²⁰Ndien ndɔhɔ mbufo, nte Mbufo emesim ke obot mme Amorite, emi Jehovah Abasi nnyin mɔŋ ɔnɔ nnyin.

²¹Sese Jehovah Abasi fo omonim isɔŋ oro ke iso fo: dɔk kada enye nyene, kpa nte Jehovah Abasi mme usɔ ɔkɔdɔhɔde fi; kufehe, kunyuŋ uduɔ esit.

²²Ndien mbufo kpukpru edi ke ɔtɔ mi, ete, Yak nnyin ikam idɔŋ owo ebem nnyin iso, man mmɔ ese isɔŋ enɔ nnyin, enyuŋ eda mbuk usuŋ emi nnyin idisaŋade ke esit idɔk, ye eke mme obio emi nnyin idisimde mmɔ, edibuk enɔ nnyin.

²³Ndien ikɔ oro enem mi esit, ndien mbɔ mbufo owo duopeba, owo kiet ke esien kiet kiet;

²⁴ndien mmɔ ekabare ekedɔk ke obot, ekesim ke itihere Eshcol, ndien mmɔ esaŋa ese enye.

²⁵Mmɔ enyuŋ eda mfri isɔŋ oro ke ubɔk mmɔ, esuhɔre edisɔk nnyin, enyuŋ eda mbuk ebuk enɔ nnyin, ete, Ke edi eti isɔŋ ke Jehovah Abasi nnyin ɔnɔ nnyin.

²⁶Edi mbufo inyimeke ndidɔk, edi eneni uyo Jehovah Abasi mbufo:

²⁷mbufo enyuŋ etie ke mme tent mbufo esuk uyo, ete, Edi koro Jehovah asuade nnyin esin enye ada nnyin ɔwɔrɔ ke isɔŋ Egypt, ete ida nnyin idisin ke ubɔk mme Amorite, man mmɔ esobo nnyin.

²⁸Nnyin ididɔk ika mmɔŋ? Nditɔ-ete nnyin emenam nsia oyomo nnyin, ete, Mbon oro ekponi enyuŋ ekoŋ ekan nnyin; mme obio ekponi, ibibene mmɔ enyuŋ esim enyɔŋ; nnyin ikenyuŋ ikut nditɔ mme Anakim do.

²⁹Ndien ndɔhɔ mbufo, nte, Ekunyek idem, ekunyuŋ ebak mmɔ.

³⁰Jehovah Abasi mbufo emi ebemde mbufo iso aka, edi enye edi ŋwana ekɔŋ inɔ mbufo, kpa nte enye akanamde kpukpru ŋkpɔ ɔnɔ mbufo ke Egypt ke iso mbufo;

³¹ye ke wilderness emi afo okokutde nte Jehovah Abasi fo akamade fi, kpa nte owo akamade eyen esiemɔ, ke ofuri usuŋ emi mbufo esaŋade, tutu mbufo edisim ke ebiet emi.

³²Edi ikɔ emi isinke mbufo enim uyo Jehovah Abasi mbufo ke akpanikɔ,

³³emi ekebemde mbufo iso aka usuŋ, man enye oyom ebiet nna ɔnɔ mbufo, ke ikaŋ ke okoneyo, ete iwut mbufo usuŋ eke mbufo ekpesaŋade ke esit, ye ke obubit enyɔŋ ke uwemeyo.

³⁴Ndien Jehovah okop uyo ikɔ mbufo, onyuŋ ayat esit, ndien enye ɔŋwɔŋɔ ete,

³⁵Baba owo kiet ke otu mbon emi, kpa idiɔk emana emi, idikwe eti isɔŋ emi ŋkɔŋwɔŋɔde nte nyenɔ mme ete mbufo,

³⁶ibɔhɔke Caleb eyen Jephunneh: enye eyekut enye, nyenyuŋ nda isɔŋ oro enye akasaŋade ke esit, nnɔ enye, ye nditɔ esie, koro enye ama otim etiene Jehovah.

³⁷Jehovah onyuŋ ayat esit ye ami ŋko abaŋa mbufo, ete Afo ŋko ududukke do:

³⁸ama edi Joshua eyen Nun, emi adade ke iso fo, enye eyeduk do: sɔŋɔ enye esit: koro edi enye edideme enye ɔnɔ Israel.

³⁹Ama onyuŋ edi nditɔwɔŋ mbufo, emi mbufo ekedɔhɔde ete, Ke mmɔ eyedi ŋkpɔ mbume, ye nditɔ-iren mbufo emi mikefiɔkke se idide eti ye idiɔk, ke usen oro, mmɔ eyeduk do, nyenyuŋ nda enye nnɔ mmɔ, ndien mmɔ eyenyene enye.

⁴⁰Edi mbufo ekabare esaŋa ke wilderness Ididuot Inyaŋ.

⁴¹Ndien mbufo edibɔrɔ mi, ete, Nnyin imedue Jehovah, nnyin imɔŋ idɔk ikaŋwana ekɔŋ, kpa nte Jehovah Abasi nnyin eketemede nnyin kpukpru. Ndien kpukpru mbufo ebɔbɔ mbɔbɔ ekɔŋ, enyuŋ eyom ndidɔk ŋka ke obot.

⁴²Ndien Jehovah ɔdɔhɔ mi, ete, Dɔhɔ mmɔ, ete, Mbufo ekudɔk, ekunyuŋ eŋwana ekɔŋ: koro mmenduhe aba ke otu mbufo;

⁴³mbak mbufo edisuana ke iso mme asua mbufo. Ami nnyuŋ ndɔhɔ ye mbufo; ndien mbufo inyimeke ndikop, edi eneni uyo Jehovah, enyuŋ ebumere edɔk obot.

⁴⁴Ndien mme Amorite emi eduŋde ke obot oro, ewɔŋɔ ekebiɔŋɔ mbufo, enyuŋ ebine mbufo nte ɔkwɔk enamde, enyuŋ esobo mbufo ke Seir, tutu osim ke Hormah.

⁴⁵Ndien mbufo efiak edem edituaŋa eyet ke iso Jehovah; edi Jehovah ikopke uyo mbufo, inyuŋ ikpaŋke utɔŋ inɔ mbufo.

⁴⁶Ndien mbufo ebigi ke Kadesh ediwak usen, ke adaŋa ibat usen emi mbufo ebigide.