Read efik DEUTERONOMY 12 Bible Online

DEUTERONOMY 12 - efik bible

DEUTERONOMY 12

¹MME mmɔ emi edi mme ewuhɔ ye mme item emi mbufo edikpemede ndinam ke isɔŋ emi Jehovah Abasi mme usɔ ɔnɔde fi ete ada enye enyene, ofuri ini eke mbufo edidude uwem ke isɔŋ.

²Mbufo etim esobo kpukpru ebiet eke mme idut emi mbufo edidade, enamde ido mme abasi mmɔ, ke enyɔŋ ŋkokoŋo obot, ye ke enyɔŋ ŋkpri obot, ye ke idak kpukpru awawa eto:

³mbufo enyuŋ ewuri mme itie-uwa mmɔ, enyun ebom mme adaha itiat mmɔ, enyuŋ efɔp mme eto-mkpe mmɔ ke ikaŋ enyuŋ esai edisɔi mbiet mme abasi mmɔ, enyuŋ esobo enyiŋ mmɔ ke ebiet oro efep.

⁴Ekunam ntem enɔ Jehovah Abasi mbufo.

⁵Edi mbufo eyom ebiet emi Jehovah Abasi mbufo edimekde ke otu kpukpru mme esien mbufo osio, ete inim enyiŋ esie, man enye oduŋ do, enyuŋ eka do:

⁶mbufo enyuŋ eda mme edifɔp uwa mbufo eka do, ye mme uwa emem mbufo, ye mme ɔyɔhɔ ubak ŋkpɔ mbufo duop, ye edimenere uwa ubɔk mbufo, ye mme akaŋa mbufo, ye mme uwa ima esit mbufo, ye akpa nditɔ enaŋ mbufo, ye eke ekpri ufene mbufo.

⁷Ndien mbufo edia ŋkpɔ do ke iso Jehovah Abasi mbufo, enyuŋ edat esit ke kpukpru ŋkpɔ eke mbufo enyande ubɔk mbufo ke esit, kpa mbufo ye mme ufɔk mbufo, ke se Jehovah adade ɔdiɔŋ mbufo.

⁸Mbufo ekunam nte emi nnyin inamde kpukpru ŋkpɔ mi mfin emi, owo anam ŋkpɔ ekededi eke enye amade.

⁹Koro mbufo mika-isimke kaŋa ke itie nduɔk-odudu, ye ke udeme emi Jehovah Abasi mbufo ɔnɔde mbufo.

¹⁰Edi mbufo emɔŋ ebe Jordan, eka ndiduŋ ke isɔŋ emi Jehovah Abasi mbufo ɔnɔde mbufo ete enyene, enye eyenyuŋ anam mbufo ebɔhɔ kpukpru mme asua mbufo emi ekande ekuk, ɔnɔ mbufo nduɔk-odudu, mbufo eyenyuŋ eduŋ ke ifure;

¹¹ndien ama ekem, mbufo eda kpukpru se ntemede mbufo, kpa edifɔp uwa mbufo, ye mme uwa emem mbufo, ye mme ɔyɔhɔ ubak ŋkpɔ mbufo duop, ye edimenere uwa ubɔk mbufo, ye kpukpru akaŋa eke mbufo emekde ndikaŋa nnɔ Jehovah, eka ke ebiet emi Jehovah Abasi fo edimekde ndinam enyiŋ esie oduŋ do:

¹²ndien mbufo, ye nditɔ-iren mbufo, ye nditɔ mbufo iban, ye ifin iren mbufo, ye ifin iban mbufo, eyedat esit ke iso Jehovah, ye mme Levite emi edude ke mme obio mbufo: koro mmɔ midaha ubak ye udeme ke otu mbufo.

¹³Kpeme idem mbak afo ediwa edifɔp uwa fo ke kpukpru ebiet eke afo okokut:

¹⁴edi ke ebiet emi Jehovah edimekde ke esien fo kiet, do ke afo edifɔp uwa fo, do ŋko ke afo edinyuŋ anam kpukpru se ami ŋwukde fi.

¹⁵Edi nte ofuri ima esit fo edide, afo eyekeme ndiwot nnyuŋ nta unam, nte ekemde ke ufɔn eke Jehovah Abasi fo ɔfɔnde fi, ke kpukpru obio fo: owo eke edehede ye owo eke asanade ekeme ndita enye, kpa nte edop ye okoyo.

¹⁶Edi mbufo ekudia iyip; mbufo eduɔk enye ke isɔŋ nte mmɔŋ.

¹⁷Kuda ɔyɔhɔ ubak ibokpot fo duop mme eke ɔbufa wine fo, mme eke aran fo, mme eke akpa eyen enaŋ ye erɔŋ fo, mme eke akaŋa fo baba kiet eke afo edikaŋade, mme eke uwa ima esit fo, mme eke edimenere uwa ubɔk fo, udia ke ebiet fo:

¹⁸edi ke iso Jehovah Abasi fo ke afo edidia enye ke ebiet emi Jehovah Abasi fo edimekde, afo, ye eyen-eren fo, ye eyen fo aŋwan, ye ofin eren fo, ye ofin aŋwan fo, ye mme Levite emi eduŋde ke obio fo: ndien dat esit ke iso Jehovah Abasi fo ke kpukpru ŋkpɔ eke afo anyande ubɔk fo ke esit.

¹⁹Adaŋa ini nte afo edidude ke isɔŋ fo, kpeme idem fo mbak afo ediduɔk mme Levite.

²⁰Ke adaŋemi Jehovah Abasi fo edinamde mme adaŋa fo etara, kpa nte enye ɔkɔŋwɔŋɔde ɔnɔ fi, ndien afo eyedɔhɔ ete iyeta unam: koro esit fo amade unam ndita; ta unam ekededi eke esit fo amade ma.

²¹Edieke ebiet emi Jehovah Abasi fo edimekde ndinim enyiŋ esie do, oyomde fi usun akan ndien da enaŋ fo ye erɔŋ fo eke Jehovah ɔnɔde fi, wot kpa nte ŋketemede fi, nyuŋ ta ke ebiet fo, kpa nte esit fo amade.

²²Edi kpa nte atade edop ye okoyo, kpa ntre ke afo edita enye: yak owo eke edehede ye owo eke asanade eta enye ubɔk kiet.

²³Edi tim kpeme, kudia iyip: koro iyip edide uwem: kudia uwem ndien udian ye unam.

²⁴Kudia enye; duɔk enye ke isɔŋ nte mmɔŋ.

²⁵Kudia enye; man ɔfɔn fi, ye nditɔ fo emi editienede fi, ke ini afo anamde se inende ke enyin Jehovah.

²⁶Edi men ndisana ŋkpɔ fo eke afo edinyenede, ye mme akaŋa fo, ka ke ebiet emi Jehovah edimekde: nyuŋ wa edifɔp uwa fo,

²⁷unam ye iyip, ke itie uwa Jehovah Abasi fo, ndien da unam esie ta.

²⁸Kpeme, nyuŋ kop kpukpru ikɔ emi ntemede fi, man ɔfɔn fi, ye nditɔ fo emi editienede fi ke nsinsi, ke ini afo anamde se inende ke enyin Jehovah Abasi fo.

²⁹Ke adaŋemi Jehovah Abasi fo edisibede mme idut emi afo akade do ndida mmɔ nnyene, ke iso fo efep, afo edinyuŋ ɔbɔde mmɔ itie, onyuŋ oduŋ ke isɔŋ mmɔ;

³⁰kpeme idem fo, mbak afia edimum fi esin fi aka eketiene mmɔ, ke ema esobo mmɔ ema ke iso fo efep; mbak afo edinyuŋ obup abaŋa mme abasi mmɔ, ete, Ewe usuŋ ke mme idut emi ekenam ŋkpɔ mme abasi mmɔ? ami nyenam kpa ntre ŋko ke idem mi.

³¹Kunam ntre ye Jehovah Abasi fo: koro mmɔ enamde kpukpru oruk mbubiam emi Jehovah asuade enɔ mme abasi mmɔ: koro mmɔ efɔpde idem nditɔ-iren mmɔ ye nditɔ mmɔ iban enɔ mme abasi mmɔ.

³²Mbufo ekpeme ndinam kpukpru ikɔ emi ami ntemede mbufo: kudian ŋkpɔ ke esit, kunyuŋ usio ke esit ufep.