Read efik DEUTERONOMY 17 Bible Online

DEUTERONOMY 17 - efik bible

DEUTERONOMY 17

¹KUDA baba enaŋ kiet ye erɔŋ kiet eke obiomode ndo, ŋkpɔ ekededi eke ɔdiɔkde, uwa unɔ Jehovah Abasi fo: koro Jehovah Abasi fo esede oro ke ŋkpɔ ndek.

²Ema ekut eren mme ŋwan ke otu fo, ke obio fo kiet eke Jehovah Abasi fo ɔnɔde fi, owo eke anamde idiɔk ke iso Jehovah Abasi fo, ke eribiat ediomi esie,

³eke onyuŋ akade okonim ido mme abasi efen, onyuŋ ɔnuhɔ ɔnɔ mmɔ, edide utin, onyuŋ edide ɔfiɔŋ mme eke udim enyɔŋ ekededi, eke ami ŋkpande;

⁴ndien ema eyarare enɔ fi, afo ama onyuŋ okop, onyuŋ otim obup, ndien sese, ama edi akpanikɔ, onyuŋ ekem ntre ke uyo oro, ete ema enam oruk ŋkpɔ ndek emi ke Israel:

⁵ndien sio eren oro mme ŋwan oro akanamde idiɔk ido oro, di ke usuŋ obio fo, kpa eren oro mme ŋwan oro, nyuŋ tɔŋɔ mmɔ ke itiat wot.

⁶Da inua ntiense iba, mme eke ntiense ita, wot owo mkpa oro; kuda inua ntiense kierakiet uwot enye.

⁷Yak ubɔk mme ntiense ebem iso edoro enye ke idem ndiwot enye, ndien ubɔk kpukpru owo etiene. Ke ntre ke afo edisio idiɔk ido ke otu fo efep.

⁸Ke adaŋemi edisɔŋde fi ndikpe, ke ufɔt iyip ye iyip, ke ufɔt ikpe ye ikpe, ye ke ufɔt ita ye ita, eke edide ikɔ eneni ke obio fo: ndien daha ke enyɔŋ saŋa dɔk ke ebiet emi Jehovah Abasi fo edimekde:

⁹nyuŋ tiene mme oku, mme Levite, ye ebierikpe emi edidude ke usen oro, nyuŋ bup; ndien mmɔ eyesian fi ikɔ eke ebaŋade ikpe oro:

¹⁰ndien nam ke uyo ikɔ eke mmɔ ke ebiet emi Jehovah edimekde, edisian fi; nyuŋ kpeme ndinim kpukpru se mmɔ etemede fi:

¹¹nam ke uyo mme ewuhɔ eke mmɔ editemede fi, kpa nte ikpe eke mmɔ edidɔhɔde fi asaŋade: kuwɔŋɔre ukpɔŋ ikɔ eke mmɔ edisiande fi, uduk nnasia mme ufien.

¹²Ndien ama edi owo eke edinamde ŋkpɔ isa-isa, minyuŋ ikopke uyo oku eke adade do ndinam ŋkpɔ Jehovah Abasi fo, ye uyo ebierikpe oro, idem owo oro enyene ndikpa: ke ntre ke afo edisio idiɔk ido ke Israel efep.

¹³Ndien kpukpru owo eyekop, enyuŋ edikhe enyuŋ etre ndinam ŋkpɔ isa-isa.

¹⁴Ke adaŋemi afo edisimde isɔŋ emi Jehovah Abasi fo ɔnɔde fi, onyuŋ adade enye enyene, onyuŋ oduŋde ke esit, ndien edidɔhɔ ete, Nyenim owo ke edidem mi, ebiet kpukpru mme idut emi akande mi ekuk;

¹⁵da kpa owo emi Jehovah Abasi fo edimekde, nim ke edidem fo: sio owo ke otu nditɔ usɔ nim ke edidem fo: udukemeke ndida esen owo emi midige eyen-usɔ, nim ke edidem fo.

¹⁶Edi yak enye okukɔ ediwak horse ke idem esie, okunyuŋ anam mbon emi afiak eka ke Egypt, man ekɔ ediwak horse: koro Jehovah ɔkɔdɔhɔde mbufo, ete, Mbufo ekufiak aba usuŋ oro.

¹⁷Enye okunyuŋ ɔdɔ ediwak iban, mbak esit esie edikabare: okunyuŋ ɔkɔ ediwak silver ye gold ke idem esie.

¹⁸Ndien ama ekem ke adaŋemi enye editiede ke ebekpo ubɔŋ esie, yak enye akaŋa ŋwed-ibet emi ke idem esie esin ke ŋwed efen, asaŋa ye ŋwed emi odude ke iso mme oku, mme Levite:

¹⁹ndien ŋwed oro eyedu enye ke ubɔk, enye onyuŋ okot ŋwed kpukpru usen uwem esie: kpaŋ enye ekpekpep ndibak Jehovah Abasi esie, nnyuŋ nnim kpukpru ikɔ ŋwed-mbet emi, ye mme ewuhɔ emi, man enye anam mmɔ:

²⁰man enye okumenere esit esiemɔ akan nditɔ-ete esie, okunyuŋ ɔwɔŋɔre ɔkpɔŋ mbet, oduk nnasia, mme ufien: kpaŋ usen esie, ye eke nditɔ esie ekpebigi ke ebekpo esie ke ufɔt Israel.