Read efik DEUTERONOMY 18 Bible Online

DEUTERONOMY 18 - efik bible

DEUTERONOMY 18

¹MME oku, mme Levite, kpa ofuri esien Levi, idinyeneke ubak, idinyuŋ inyeneke udeme ye Israel: mmɔ eyedia mme uwa ikaŋ Jehovah ye udeme esie.

²Ndien mmɔ ekunyene udeme ke otu nditɔ ete mmɔ: edi Jehovah edi udeme mmɔ, kpa nte enye ɔkɔdɔhɔde mmɔ.

³Ndien emi eyedi se mme oku ekpebɔde mbio-obio, kpa mmɔ eke ewade uwa, edide enaŋ, onyuŋ edide erɔŋ; yak enɔ oku afara, ye mbaŋ iba, ye akpa.

⁴Nyuŋ tomo enye akpa mfri ibokpot, ye eke ɔbufa wine fo, ye eke aran fo, ye akpa idet erɔŋ fo.

⁵Koro Jehovah Abasi fo ama emek enye osio ke ofuri mme esien fo, ndida nnam ŋkpɔ ke enyiŋ Jehovah, enye ye nditɔ-iren esie ke nsinsi.

⁶Ndien edieke Levite kiet otode ke obio fo kiet, ke ofuri Israel, emi enye oduŋde do, edi ke ofuri ima esit esie ke ebiet emi Jehovah edimekde;

⁷onyuŋ anam ŋkpɔ ke enyiŋ Jehovah Abasi esie, kpa nte kpukpru nditɔ-ete esie mme Levite, emi ekam edade do ke iso Jehovah;

⁸mmɔ eyedia udeme ukem-ukem ɔkɔrɔ ke se itode ke erinyam ŋkpɔ akpa esie.

⁹Ke adaŋemi afo edide ke isɔŋ emi Jehovah Abasi fo ɔnɔde fi, kukpebe ndinam mbubiam ido mme idut oro.

¹⁰Kuyak ekut owo ke otu fo eke adade eyen-eren esie, mme eyen esie aŋwan esin ke ikaŋ kuyak ekut abia-idiɔŋ, ye abia-inuen, ye abiamfa, ye abia-ibɔk,

¹¹ye abia-ibɔk edim, ye obup idem, ye owo ŋkukut, ye obup ekpo.

¹²Koro Jehovah esede kpukpru mmɔ eke enamde ŋkpɔ emi ke mbubiam; Jehovah Abasi fo onyuŋ ebin mmɔ efep ke iso fo abaŋa mbubiam emi.

¹³Fɔn ma nɔ Jehovah Abasi fo.

¹⁴Koro mme idut emi afo edibinde mmɔ efep, ekekop uyo mbia-inuen, ye eke mbia-idiɔŋ; edi ama edi afo, Jehovah Abasi fi iyakke fi anam ntre.

¹⁵Jehovah Abasi fo eyenam prophet eke edibietde mi, adaha ada ke otu fo ɔnɔ fi: enye ke mbufo edikop enɔ;

¹⁶kpasuk nte afo ekebeŋede Jehovah Abasi fo kpukpru ŋkpɔ ke Horeb, ke usen esop oro, ete, Kuyak ŋkop aba uyo Jehovah Abasi mi, kunyuŋ uyak ŋkut aba akwa ikaŋ emi, mbak ndikpakpa.

¹⁷Ndien Jehovah ɔdɔhɔ mi, ete, Se mmɔ edɔhɔde ɔfɔn.

¹⁸Nyenam prophet kiet, ebiet fi, adaha ada ke otu nditɔ-ete mmɔ, nyenyuŋ nda ikɔ mi nsin enye ke inua; ndien enye eyeda kpukpru se ami ntemede enye etiŋ ɔnɔ mmɔ.

¹⁹Ndien ama ekem, owo eke midikopke ikɔ mi eke enye editiŋde ke enyiŋ mi, ami nyebup enye.

²⁰Edi ama edi prophet eke edisɔŋde ibuot ada ikɔ eke mmeŋketemeke enye nte ɔdɔhɔ, ɔdɔhɔ ke enyiŋ mi, ye eke ɔdɔhɔde ikɔ ke enyiŋ mme abasi efen, yak ewot kpa prophet oro.

²¹Ndien ke afo ɔdɔhɔde ke esit fo, ete, Nnyin idinam didie ifiɔk ikɔ eke Jehovah mikɔdɔhɔke?

²²Se prophet edidɔhɔde ke enyiŋ Jehovah, ndien ikɔ misuhosu, minyuŋ iwɔrɔkewɔrɔ, oro edi ikɔ eke Jehovah mikɔdɔhɔde, prophet oro ɔdɔhɔ enye ke usɔŋ-enyin: kubak enye.