Read efik DEUTERONOMY 19 Bible Online

DEUTERONOMY 19 - efik bible

DEUTERONOMY 19

¹ADAŊEMI Jehovah Abasi fo edisibede mme idut emi Jehovah Abasi fo ɔnɔde fi isɔŋ mmɔ, efep, afo edinyuŋ ɔbɔde mmɔ itie, onyuŋ oduŋ ke mme obio mmɔ, ye ke ufɔk mmɔ:

²dianare obio ita nim nɔ idem fo ke ufɔt isɔŋ fo, emi Jehovah Abasi fo ɔnɔde fi ete ada enye enyene.

³Diɔŋ nam ɔkpɔ-usuŋ nɔ idem fo, nyuŋ da ofuri isɔŋ fo emi Jehovah Abasi fo ɔnɔde fi ete enyene, bahare ke mbak ita, man edi ebiet eke kpukpru owot-owo ekpefehede eka do.

⁴Ndien emi edi ikɔ owot-owo eke edifehede aka do, man odu uwem: owo eke mikoho koi iwot mbɔhiduŋ esie, ke mika-isuaha enye ke mbemiso;

⁵ye owo eke etienede mbɔhiduŋ esie oduk ke akai ndikpi eto, ndien ke enye emenerede ekudi ete ikpi eto, ndien ukwak ɔkpɔhɔre ke okpoto, ɔtɔ mbɔhiduŋ esie owot; yak enye efehe aka ke obio emi kiet, ndien odu uwem:

⁶mbak osio-usiene iyip edibine owot-owo oro, koro esit ofiopde enye, onyuŋ osim enye, koro usuŋ oyomde, ndien ɔtɔ enye owot; emi enye midotke ndikpa, koro mikasuaha enye ke mbemiso.

⁷Mmɔdo ami ŋwukde fi, nte, Dianare obio ita nɔ idem fo.

⁸Ndien edieke Jehovah Abasi fo anamde adaŋa fo atara, kpa nte enye ɔkɔŋwɔŋɔde ɔnɔ mme usɔ, edinyuŋ ɔnɔde fi ofuri isɔŋ emi enye ɔkɔdɔhɔde ete iyenɔ mme usɔ;

⁹ke afo ama onyuŋ onim kpukpru mbet emi, onyuŋ anam mmɔ, emi ami ŋwukde fi mfin emi, onyuŋ ama Jehovah Abasi fo, onyuŋ asaŋa ke usuŋ esie, kpukpru ini; ndien da obio ita efen nɔ idem fo, kɔrɔ ke obio ita emi:

¹⁰mbak ediduɔk iyip owo eke miduehe isop ke isɔŋ fo emi Jehovah Abasi fo ɔnɔde fi ke udeme, mbak iyip edisɔp fi.

¹¹Edi edieke owo edide usua mbɔhiduŋ esie, onyuŋ odibe ebet enye, ndien adaha ke enyɔŋ ɔtɔ enye ke itie mkpa owot, ndien efehe aka ke obio emi kiet:

¹²ndien yak mbiowo obio mmɔ edɔŋ ekesio enye ke obio oro, enyuŋ emen enye esin ke ubɔk osio-usiene iyip owot.

¹³Enyin fo okutua enye mbɔm, edi sio iyip owo eke miduehe isop fep ke Israel man ɔfɔn fi.

¹⁴Kusehere adaŋa mbɔhiduŋ fo emi mbon eset ekenimde ke udeme fo, emi afo edibɔde ke isɔŋ emi Jehovah Abasi fo ɔnɔde fi, ete ada enye enyene.

¹⁵Ntiense kierakiet okudaha ada obiomo owo ke ukwaŋ-ŋkpɔ ekededi, mme ke isop ekededi, ke isop ekededi eke enye eduede: ke inua ntiense iba, mme ke inua ntiense ita, ikɔ edisɔŋɔ ada.

¹⁶Ke ini nsu-nsu ntiense edidahade ada obiomo owo, ete idori enye ikɔ erikabare mfep;

¹⁷ndien owo mbiba oro enyenede ikɔ oro eyeda ke iso Jehovah, ye ke iso mme oku ye mme ebierikpe eke

¹⁸edidude ke usen oro ndien mme ebierikpe etim ebup: ndien, sese, ntiense oro ama edi ntiense nsu, ama onyuŋ odori eyen-ete esie ikɔ nsu:

¹⁹ndien mbufo enam enye, kpa nte enye ekerede ndinam eyen-ete esie.

²⁰Ke ntre ke afo edisobo idiɔk oro ke otu fo efep. Ndien mmɔ efen eyekop, enyuŋ efehe ndik, ndien iditɔŋɔke aba ntak inam oruk idiɔk ido emi ke otu fo.

²¹Enyin fo okutua mbɔm, ndien; uwem ke uwem, enyin ke enyin, edet ke edet, ubɔk ke ubɔk, ukot ke ukot.