Read efik DEUTERONOMY 20 Bible Online

DEUTERONOMY 20 - efik bible

DEUTERONOMY 20

¹KE adaŋemi afo ediwɔrɔde aka ekɔŋ ye mme asua fo, edinyuŋ okutde mme horse, ye mme chariot, ye mbon ekɔŋ ewakde ekan fi, kubak mmɔ: koro Jehovah Abasi fo emi okosiode fi ke isɔŋ Egypt, ododu ye afo.

²Ndien ama ekem ke ini mbufo esaŋade ekpere itie ekɔŋ, yak oku oto edi edidɔhɔ kpukpru owo;

³yak enye ɔdɔhɔ mmɔ ntem, ete, O Israel, mbufo ekop, mbufo emɔŋ esaŋa ekpere ndiŋwana ekɔŋ ye mme asua mbufo mfin emi: ekuyak esit emem mbufo, ekudikhe ekunyuŋ enyek idem, ekunyuŋ eyak nsia oyomo mbufo ke iso mmɔ;

⁴koro edi Jehovah Abasi mbufo asaŋa ye mbufo, aka ndiŋwana ekɔŋ ye mme asua mbufo nnɔ mbufo, ete inyaŋa mbufo.

⁵Ndien yak mme andidaha edɔhɔ ye kpukpru owo, ete, Anie owo odu mi emi ɔkɔbɔpde ɔbufa ufɔk, ndien mika-iberekede usuŋ ufɔk? Yak enye afiak ɔnyɔŋ ke ufɔk esie, mbak enye edikpa ke ekɔŋ, ndien owo efen edika ekeberede usuŋ ufɔk.

⁶Ndien anie owo odu mi emi ɔkɔtɔde iŋwaŋ vine ndien mikadiaha kaŋa mfri esie? Yak enye onyuŋ afiak ɔnyɔŋ ke ufɔk esie, mbak enye edikpa ke ekɔŋ, ndien owo efen edika akadia mfri esie.

⁷Ndien anie owo odu mi eke okonyuŋ ebemde ŋwan onim ke idem esie, ndien mika-idɔhɔ kaŋa enye? Yak enye afiak ɔnyɔŋ ke ufɔk esie, mbak edikpa ke ekɔŋ, ndien owo efen edika ɔkɔdɔ enye.

⁸Ndien yak mme andidaha etɔŋɔ ntak edɔhɔ kpukpru owo ŋko-ŋko, ete, Anie owo odu mi emi efehede ndik, onyuŋ oyomode nsia? Yak enye afiak ɔnyɔŋ ke ufɔk esie, mbak nsia ediyomo nditɔ-ete esie, kpa nte nsia esie.

⁹Ndien ama ekem ke mme andidaha edɔhɔde ye kpukpru owo ema, yak mmɔ enim etubom mbon ekɔŋ ndibem mmɔ iso.

¹⁰Ke adaŋemi afo edisaŋade ekpere obio ndiŋwana ekɔŋ ye enye, bem iso taŋa emem nɔ enye.

¹¹Ndien ama ekem, enye ama ɔbɔrɔ fi ibɔrɔ emem, onyuŋ osio usuŋ ɔnɔ fi, ndien ama ekem, kpukpru owo eke edikutde ke esit eyekabare edi mbon utomo fo, enyuŋ enam ŋkpɔ enɔ fi.

¹²Ndien edieke mmɔ minyimeke ndikɔŋɔ mfaŋ nnɔ fi, edi etibi ekɔŋ ye afo, ndien kan enye kuk:

¹³ndien adaŋemi Jehovah Abasi fo ayakde enye esin fi ke ubɔk, wot kpukpru iren-owo esie ke iso ofut;

¹⁴edi ama edi iban, ye nditɔwɔŋ, ye ufene, ye kpukpru se idude ke obio, kpa ofuri mbume esie, bume mmɔ da ke idem fo; afo eyenyuŋ adia mbume mme asua fo eke Jehovah Abasi fo ɔnɔde fi.

¹⁵Ntem ke afo edinam ye kpukpru obio eke eyomde usuŋ ye afo eti-eti, eke midige obio mme idut emi.

¹⁶Edi ama edi mme obio mme idut emi Jehovah Abasi fo ɔnɔde fi ke udeme, kunim baba ŋkpɔ kiet eke ɔduɔkde ibifik ke uwem:

¹⁷edi sosobo mmɔ tak-tak; mme Hittite, ye mme Amorite, ye mme Canaanite, ye mme Perizzite, ye mme Hivite, ye mme Jebusite; kpa nte Jehovah Abasi fo okowukde fi:

¹⁸mbak mmɔ edikpep mbufo edinam kpukpru mbubiam mmɔ, emi mmɔ enamde enɔ mme abasi mmɔ; mbak mbufo edidue Jehovah Abasi mbufo.

¹⁹Ke adaŋemi afo edikande obio okuk ediwak usen, ke eriŋwana ekɔŋ ye enye man ada enye, kusobo eto esie ke erikpeŋe mmɔ ke ekuri: koro afo ekemede ndidia (mfri) mmɔ: kukpeŋe mmɔ uduɔŋɔ ndien: koro nte eto iŋwaŋ edi owo naŋa eke odukde ke itie ukuk obio ke iso fo?

²⁰Edi ama edi eto emi afo ɔfiɔkde ete idige eto eke ediade, biat enye, nyuŋ kpeŋe enye duɔk, da nam ɔkɔ ekɔŋ ke obio eke aŋwanade ekɔŋ ye afo, tutu enye ɔsuhɔre.