Read efik DEUTERONOMY 24 Bible Online

DEUTERONOMY 24 - efik bible

DEUTERONOMY 24

¹KE adaŋemi owo adade ŋwan ɔdɔ, ama ekem edieke ŋwan minemke enye esit, koro okutde enye ŋkpɔ but ke idem: ndien yak enye ewet ŋwed usio-ndɔ ɔnɔ ŋwan, esin enye ke ubɔk, ndien anam enye ɔwɔrɔ ke ufɔk esie.

²Ndien adaŋemi enye ɔwɔrɔde ke ufɔk esie, onyuŋ akade ɔkɔdɔ owo efen;

³utɔŋɔ ntak ebe oro onyuŋ asua enye, onyuŋ ewet ŋwed usio-ndɔ ɔnɔ enye, esin enye ke ubɔk, onyuŋ anam enye ɔwɔrɔ ke ufɔk esie; mme onyuŋ edieke utɔŋɔ ntak ebe oro ɔkɔdɔde enye, akpa;

⁴akpa ebe esie oro okosiode enye, ikemeke nditɔŋɔ ntak nda enye ndɔ, ke adaŋemi enye ama akabiara: koro Jehovah esede oro ke mbubiam: kunam ndien isɔŋ emi Jehovah Abasi fo ɔnɔde fi ke udeme, edue isop.

⁵Ke adaŋemi owo ɔdɔde ɔbufa ŋwan, enye okuka ekɔŋ, ekunyuŋ edɔŋ enye baba utom kiet: eyak enye enɔ ufɔk esie isua kiet, man enye adat ŋwan esie emi enye ɔdɔde esit.

⁶Owo okumum itiat-ɔkɔk isɔŋ-isɔŋ, mme itiat enyɔŋ-enyɔŋ ke ukat: koro enye omumde uwem owo ukat.

⁷Edieke edikutde owo eke oyipde owo ke otu nditɔ-ete esie, kpa nditɔ Israel, mme edinyuŋ onim enye ke ofin, mme anyanyam enye; inɔ oro enyene ndikpa; ke ntre ke afo edisio idiɔk ke otu fo efep.

⁸Tiŋ enyin ke udɔŋɔ akpa-mfia, man afo otim ekpeme, onyuŋ anam kpukpru se mme oku, kpa mme Levite, editemede mbufo: kpa nte ŋketemede mmɔ, kpa ntre ke mbufo edikpeme ndinam.

⁹Ti se Jehovah Abasi fo akanamde Miriam ke usuŋ, ke ini mbufo etode ke Egypt ewɔŋɔ.

¹⁰Ke ini afo ɔbuɔtde mbɔhiduŋ fo ŋkpɔ ekededi, kuduk ke ufɔk esie ŋkɔbɔ enye ubiɔŋ.

¹¹Da ke esien, ndien owo eke afo ɔbuɔtde enye eyeda ubiɔŋ ɔwɔrɔ ɔsɔk fi ke esien.

¹²Ndien edieke owo oro ebuenede, kuda ubiɔŋ esie ude idap:

¹³kutre ndiyak ubiɔŋ nnɔ enye ke utin osopde, man enye ada ekura esie ede idap, onyuŋ ɔkɔm fi; ndien eyebat oro enɔ fi ke se inende ke iso Jehovah Abasi fo.

¹⁴Kufik owo eke ekpede utom, eke ananade ŋkpɔ onyuŋ ebuenede, edide ke otu nditɔ-usɔ, onyuŋ edide ke otu isen owo eke edude ke isɔŋ fo, ke obio fo:

¹⁵nɔ enye okuk ke usen esie, utin okunyuŋ ɔsuhɔre ke esit; koro enye ananade ŋkpɔ, enye eberi esit esie ke esit: mbak enye ediseme ɔnɔ Jehovah abaŋa fi, ndien afo edue isop.

¹⁶Mme ete ekukpa ebaŋa nditɔ, nditɔ ekunyuŋ ekpa ebaŋa mme ete yak owo akpa abaŋa idiɔk-ŋkpɔ esiemɔ.

¹⁷Kuyut ikpe esen owo, mme eke eyen-akpa; kunyuŋ uda ɔfɔŋidem ebe-akpa ke ubiɔŋ:

¹⁸nyuŋ ti nte afo ekedide ofin ke Egypt, ndien Jehovah Abasi fo akafak fi osio ke esit: oro esin ami nteme fi anam ŋkpɔ emi.

¹⁹Ke adaŋemi afo ekpeŋede ukpeŋe fo ke iŋwan fo, onyun efre ebek kiet ke iŋwan, kufiak edem ukemen enye: yak ana ɔnɔ esen owo, ye eyen-akpa, ye ebe-akpa: kpaŋ Jehovah Abasi fo ɔkpɔdiɔŋ fi ke kpukpru utom ubɔk fo.

²⁰Ke adaŋemi afo oyibide eto olive fo, kutɔŋɔ ntak ukese ŋkɔk: yak enye ana ɔnɔ esen owo, ye eyen-akpa, ye ebe-akpa.

²¹Ke adaŋemi afo etetde mfri iŋwaŋ vine fo, kufiak edem uka mfiɔhɔ: yak ana ɔnɔ esen owo, ye eyen-akpa ye ebe-akpa.

²²Nyuŋ ti nte afo ekedide ofin ke isɔŋ Egypt: oro esin ami ŋwuk fi nte anam ŋkpɔ emi.