Read efik DEUTERONOMY 25 Bible Online

DEUTERONOMY 25 - efik bible

DEUTERONOMY 25

¹KE adaŋemi ikɔ ediwɔrɔde ke otu owo, ndien mmɔ edi ikpe, man ekpe ikpe mmɔ yak ikpe asana owo eke enende, onyuŋ otip owo eke eduede.

²Ndien ama ekem, edieke owo eke eduede odotde ufen, yak ebierikpe anam enye ɔsuhɔre ana, ndien emiŋa enye ke iso esie, nte ekemde ye idiɔk ido esie, ke ibat ubɔk.

³Enye ekeme ndimia enye ubɔk aba, edi okudori: mbak afo edidori amia enye ediwak ubɔk akan emi, ndien eyen-usɔ akabare edi ŋkpɔ ndek ke iso fo.

⁴Kubɔp enaŋ inua ke ini enye edigide ibokpot.

⁵Ke adaŋemi nditɔ-ete kiet eduŋde ke ɔtɔ kiet, owo mmɔ kiet onyuŋ akpa, ndien minyeneke eyen, ŋwan akpa-mkpa oro okudɔ esen owo ke ebiet efen: yak eyen-ete ebe esie etiene enye, ada enye ɔdɔ, onyuŋ anam ido eyen-ete ebe ye enye.

⁶Ndien ama ekem, akpan eke enye edimande eyedaha ada ke enyiŋ eyen-ete oro akakpade, man enyiŋ esie okusop ke Israel.

⁷Ndien edieke eyen-ete ebe mimaŋa ndida ŋwan eyen-ete esie, yak ŋwan eyen-ete esie ɔdɔk ke enyin-usuŋ etiene mbiowo onyuŋ ɔdɔhɔ ete, Eyen-ete ebe mi esin ndinam enyiŋ eyen-ete esie adaha ada ke Israel, enye inyimeke ndinam ido eyen-ete ebe mi.

⁸Ndien yak mbiowo obio mmɔ ekot enye edi enyuŋ edɔhɔ ikɔ ye enye: ndien edieke enye adade do ɔdɔhɔ ete, Mmaŋa ndida enye:

⁹yak ŋwan eyen-ete esie asaŋa ekpere enye ke iso mbiowo, onyuŋ osio enye ikpa-ukot ke ukot efep, onyuŋ ɔduɔk enye etap ke iso, onyuŋ ɔbɔrɔ ete, Ntem ke edinam owo eke minyimeke ndibɔp ufɔk eyen-ete esiemɔ.

¹⁰Ndien eyetoho enyiŋ esie ke Israel, ete, “Ufɔk owo emi ekesiode enye ikpa-ukot efep.”

¹¹Ke ini owo eŋwanade eŋwan kiet ye eken, ndien ŋwan owo kiet asaŋa ekpere ndisio ebe esie ke ubɔk owo eke amiade enye, ndien anyan ubɔk esie omum enye idem eren-owo:

¹²sibe enye ubɔk fep, enyin fo okutua enye mbɔm.

¹³Kunyene nsio-nsio itiat-udomo, akamba ye ekpri, ke ekpat fo.

¹⁴Kunyene nsio-nsio kuru, akamba ye ekpri, ke ufɔk fo.

¹⁵Edi nyene itiat eke ɔfɔnde onyuŋ enende nyuŋ nyene kuru eke ɔfɔnde onyuŋ enende: kpaŋ mme usen fo ekpebigi ke isɔŋ emi Jehovah Abasi fo ɔnɔde fi.

¹⁶Koro Jehovah Abasi fo esede kpukpru owo eke enamde ntem, ye kpukpru owo eke enamde mme ukwaŋkpɔ, ke ŋkpɔ ndek.

¹⁷Ti se Amalek akanamde fi ke usuŋ, ke ini mbufo etode ke Egypt ewɔŋɔ;

¹⁸emi ɔkɔwɔrɔde ekɔŋ ye afo ke usuŋ, onyuŋ owotde kpukpru eke ekpɔtde ke otu mbufo ke ukperedem fo, ke ini afo akpade mba, onyuŋ ɔyuhɔde utom; ndien mibakke Abasi.

¹⁹Ama ekem, ndien, ke ini Jehovah Abasi fo edinamde fi ɔbɔhɔ kpukpru mme asua fo emi ekande ekuk, ɔnɔ fi nduɔk-odudu, ke isɔŋ emi Jehovah Abasi fo ɔnɔde fi ke udeme, ete ada enye enyene, sɔhi Amalek fep ke idak ikpa-enyɔŋ, man ekuti aba enye; kufre.