Read efik DEUTERONOMY 26 Bible Online

DEUTERONOMY 26 - efik bible

DEUTERONOMY 26

¹AMA ekem adaŋemi afo edidukde ke isɔŋ emi Jehovah Abasi fo ɔnɔde fi ke udeme, onyuŋ enyenede enye, onyuŋ oduŋde ke esit;

²sio ndusuk ofuri akpa mfri iŋwaŋ eke afo edidade ke isɔŋ fo emi Jehovah Abasi fo ɔnɔde fi, edi, sin ke akpan, ndien ka ke ebiet emi Jehovah Abasi fo edimekde ndinim enyiŋ esie do.

³Ndien ka ke ɔtɔ oku eke edidude ke ini oro, nyuŋ dɔhɔ enye ete, Ndɔhɔ nnɔ Jehovah Abasi fo mfin emi, nte, Mmoduk ke isɔŋ emi Jehovah ɔkɔŋwɔŋɔde ɔnɔ mme ete nnyin ete iyenɔ nnyin.

⁴Ndien yak oku oro ɔbɔ fi akpan ke ubɔk, ada enye ɔdiɔk ke iso itie-uwa Jehovah Abasi fo.

⁵Ndien bɔrɔ ke iso Jehovah Abasi fo, nyuŋ dɔhɔ ete, Ete mi ekedi eyen Aram ndiyo, ndien enye ɔsuhɔre aka ke Egypt okoduŋ do ye owo esisit, ndien akabare do edi idut emi okponde, onyuŋ ɔsɔŋde, onyuŋ awak owo:

⁶ndien Egypt ediɔk ye nnyin, enyuŋ efik nnyin, enyuŋ eda idiɔk itie ufin edori nnyin:

⁷ndien ke ini nnyin isemede inɔ Jehovah Abasi mme ete nnyin, Jehovah okop uyo nnyin, onyuŋ ese ukut nnyin, ye ɔkpɔsɔŋ utom nnyin, ye ufik eke efikde nnyin:

⁸ndien Jehovah ada ɔkpɔsɔŋ ubɔk, ye edimenere ubɔk, ye akamba ndik, ye mme idiɔŋɔ, ye utibe ŋkpɔ, osio nnyin ke Egypt;

⁹enye onyuŋ ada nnyin edi ke ebiet emi, onyuŋ ɔnɔ nnyin isɔŋ emi, kpa isɔŋ emi ɔfiɔrɔde mmɔŋ-eba ye aran-ɔkwɔk.

¹⁰Ndien, sese, mmada akpa mfri isɔŋ emi afo, O Jehovah, ɔkɔnɔde mi, ndi. Ndien nim enye ke iso Jehovah Abasi fo, nyuŋ tuak ibuot nɔ Jehovah Abasi fo:

¹¹ndien dat esit ke kpukpru ufɔn emi Jehovah Abasi fo ɔnɔde fi ye ufɔk fo, afo, ye mme Levite, ye esen owo eke odude ke otu fo.

¹²Ke ini afo ama akada ɔyɔhɔ ubak ofuri mbuŋwum fo duop ɔnɔ ama, ke ɔyɔhɔ isua ita, eke edide isua erinɔ ɔyɔhɔ ubak duop, ama onyuŋ emen enye ɔnɔ mme Levite, ye esen owo, ye eyen-akpa, ye ebe-akpa, man mmɔ eda edia ŋkpɔ ke mme obio fo, eyuhɔ;

¹³ndien dɔhɔ ke iso Jehovah Abasi fo, ete, Mmosio mme edisana ŋkpɔ ke ufɔk mi mfep, mmonyuŋ nda mmɔ ndinɔ mme Levite, ye esen owo, ye eyen-akpa, ye ebe-akpa, nte kpukpru mme ewuhɔ fo emi afo owukde mi esaŋade: ŋkeduehe mme ewuhɔ fo, ŋkoyuŋ mfreke:

¹⁴ŋkadiaha ke esit ke ukut mi, ŋkoyuŋ nsioho ke esit nnɔ se idehede nnyuŋ nsioho ke esit nnɔ akpa-mkpa: mma ŋkop uyo Jehovah Abasi mi, nnyuŋ nnam kpukpru se afo okowukde mi.

¹⁵Tie ke edisana iduŋ fo ke heaven tuk iso se, nyuŋ diɔŋ ikɔt fo Israel, ye isɔŋ emi afo ɔkɔnɔde nnyin, kpa nte afo ɔkɔwɔŋɔde ɔnɔ mme ete nnyin, kpa isɔŋ emi ɔfiɔrɔde mmɔŋ-eba ye aran-ɔkwɔk.

¹⁶Ke mfin emi ke Jehovah Abasi fo owuk fi ete anam mme ewuhɔ emi ye mme item emi: kpeme mmɔ, ndien, nyuŋ nam mmɔ ke ofuri esit fo, ye ke ofuri ukpɔŋ fo.

¹⁷Afo ama ɔdɔhɔ Jehovah mfin emi, ete ke iyenim enye ke Abasi fo, iyenyuŋ isaŋa ke usuŋ esie, inyuŋ inim mme ewuhɔ esie, ye mbet esie, ye mme item esie, inyuŋ ikop uyo esie:

¹⁸Jehovah ama onyuŋ ɔdɔhɔ fi mfin emi, ete, Ke iyenim fi ke ata ikɔt imɔ, kpa nte enye ɔkɔdɔhɔde fi, ke afo eyenyuŋ onim kpukpru mbet esie;

¹⁹ke imɔ iyenyuŋ ifori fi ikan kpukpru mme idut eke imɔ ikanamde, man afo edi itoro, ye enyiŋ, ye ubɔŋ ɔnɔ imɔ man afo onyuŋ edi edisana ikɔt Jehovah Abasi fo, kpa nte enye ɔkɔdɔhɔde.