Read efik DEUTERONOMY 29 Bible Online

DEUTERONOMY 29 - efik bible

DEUTERONOMY 29

¹MME mmɔ emi edi ikɔ ediomi Jehovah Abasi ɔkɔdɔhɔde Moses, ete, enye anam ye nditɔ Israel ke isɔŋ Moab, ɔkɔrɔ ye ediomi emi enye akanamde ye mmɔ ke Horeb.

²Ndien Moses okot ofuri Israel edi, onyuŋ ɔdɔhɔ mmɔ, ete, Mbufo ekekut kpukpru se Jehovah akanamde Pharaoh, ye kpukpru ikɔt esie, ye ofuri isɔŋ esie, ke iso mbufo ke isɔŋ Egypt;

³ikpɔ idomo oro enyin fo ekekutde, mme idiɔŋɔ ye ikpɔ utibe ŋkpɔ oro:

⁴edi Jehovah ika-inɔŋɔ mbufo esit eke ɔfiɔkde, ye enyin eke okutde, ye utɔŋ eke okopde, tutu osim mfin emi.

⁵Mma nnyuŋ nda mbufo usuŋ ke wilderness ke isua aba: edisine-ŋkpɔ mbufo ikatahake mbufo ke idem, ikpa-ukot fo ikonyuŋ itahake fi ke ukot.

⁶Mbufo iketaha uyo, ikonyuŋ iŋwɔŋke wine ye mmin: man mbufo efiɔk ete ke ami ndi Jehovah Abasi mbufo.

⁷Ekem mbufo edisim ke ebiet emi, ndien Sihon ɔbɔŋ Heshbon, ye Og ɔbɔŋ Bashan ewɔŋɔ edi ekɔŋ ye nnyin, ndien nnyin isuan mmɔ:

⁸ndien nnyin ida isɔŋ mmɔ inɔ mme Reubenite, ye mme Gadite, ye ibio esien Manasseh ke udeme.

⁹Mbufo ekpeme, ndien, ikɔ ediomi emi, enyuŋ enam mmɔ, man ekut unen ke kpukpru se mbufo edinamde.

¹⁰Kpukpru mbufo emeda ke iso Jehovah Abasi mbufo mfin emi; mme etubom mme esien mbufo, ye mbiowo mbufo, ye mme andidaha mbufo, ye kpukpru mbio Israel,

¹¹ye ŋkpri nditɔwɔŋ mbufo, ye iban mbufo, ye esen owo fo emi edude ke nna fo, ɔtɔŋɔde ke andisiak ifia fo, tutu osim ke andikoi mmɔŋ fo:

¹²man afo oduk ediomi Jehovah Abasi fo, ye uŋwɔŋɔ esie, emi Jehovah Abasi fo anamde ye afo mfin emi:

¹³man enye ada fi mfin emi onim ke ikɔt esiemɔ, man enye onyuŋ edi Abasi fo, kpa nte enye ɔkɔdɔhɔde fi, nte enye okonyuŋ ɔŋwɔŋɔde ɔnɔ mme usɔ, Abraham, ye Isaac, ye Jacob.

¹⁴Inyuŋ idige ye mbufo ikpɔŋ-ikpɔŋ ke ami nnam ediomi emi ye uŋwɔŋɔ emi;

¹⁵edi ye owo emi adade mi ye nnyin mfin emi ke iso Jehovah Abasi nnyin, ye owo ŋko eke miduhe mi ye nnyin mfin emi.

¹⁶Koro mbufo emɔfiɔk nte nnyin ikeduŋde ke isɔŋ Egypt; ye nte nnyin ikonyuŋ isaŋade ke ufɔt mme idut emi mbufo ebede mmɔ;

¹⁷mbufo ema enyuŋ ekut mbubiam ŋkpɔ mmɔ, ye mbiet ŋkpɔ mmɔ, kpa eke eto itiat, ye eke silver, ye gold, emi edude ke otu mmɔ:

¹⁸mbak eren-owo, mme ŋwan, mme ufɔk, mme esien edidu ke otu mbufo, emi esit esie akabarede mfin emi ɔkpɔŋ Jehovah Abasi nnyin, onyuŋ aka akanam ŋkpɔ mme abasi mme idut emi; mbak oruŋ eke oŋwumde ibɔk ubio ye ndot-ndot ŋkpɔ, edidu ke otu mbufo;

¹⁹ndien ama ekem ke ini enye okopde uyo uŋwɔŋɔ emi, enye ɔkɔm idem esie ke esit esiemɔ, ete, Ke eyefɔn imɔ, okposuk edi eke imɔ isaŋade ke itun esit imɔ, inyuŋ idiande uyuhɔ mmin ye nsat-itɔŋ:

²⁰Jehovah idinyimeke ndidahado nnɔ enye: koro iyaresit Jehovah ye ufup esie eyebubere nsuŋikaŋ enam owo oro, ndien kpukpru mme idiɔk-ŋkpɔ emi ewetde ke ŋwed emi eyebiomo enye ke idem, Jehovah eyenyuŋ ɔsɔhi enyiŋ esie efep ke idak enyɔŋ.

²¹Jehovah eyenyuŋ adianare enye efep ke kpukpru esien Israel ɔnɔ idiɔk, nte kpukpru isuŋi ediomi emi ewetde ke ŋwed mbet emi esaŋade:

²²ndien emana nditɔ mbufo emi editienede mbufo edem edaha da ke ini iso, ye esen owo ŋko eke editode ke anyan idut, eyedɔhɔ, ke ini mmɔ edikutde ufen isɔŋ oro, ye udɔŋɔ esie eke Jehovah anamde enye ɔdɔŋɔ;

²³nte ofuri isɔŋ esie edide brimstone, ye inuŋ, ye edisak ikaŋ, itɔhɔ ŋkpɔ ke esit, ŋkpɔ itibeke ke isɔŋ, baba ikɔŋ kiet inyuŋ ikɔrike ke esit, ebiet nsobo Sodom, ye eke Gomorrah, ye eke Admah, ye eke Zeboiim, emi Jehovah okosobode ke iyaresit esie ye ke ifiopesit esie:

²⁴ndien kpukpru mme idut eyedɔhɔ ete, Ke didie ke Jehovah akanam isɔŋ emi ntem? Nsinam akamba ikaŋ iyaresit emi?

²⁵Ndien mmɔ eyedɔhɔ ete, Koro mmɔ ekekpɔŋde ediomi Jehovah Abasi mme ete mmɔ, emi enye akanamde ye mmɔ ke ini enye okosiode mmɔ ke isɔŋ Egypt efep:

²⁶ndien eka ekenam ŋkpɔ mme abasi efen, enyuŋ etuak ibuot enɔ mmɔ, kpa abasi eke mmɔ mikɔfiɔkke, enye mikonyuŋ inɔŋɔ mmɔ:

²⁷ndien Jehovah obumere iyaresit ye isɔŋ emi, onyuŋ esin kpukpru mme idiɔk-ŋkpɔ emi ewetde ke ŋwed emi etiene enye;

²⁸ndien Jehovah ada iyaresit, ye ifiopest, ye akamba ikpahesit, edibere mmɔ, ke isɔŋ mmɔ efep, emen mmɔ ɔduɔk ke isɔŋ efen, kpa nte edide mfin emi.

²⁹Ndibe-ndibe ŋkpɔ enyene Jehovah Abasi nnyin: edi ɔkpɔ emi ayarade enyene nnyin ye nditɔ nnyin ke nsinsi, man nnyin inam kpukpru ikɔ mbet emi.