Read efik DEUTERONOMY 30 Bible Online

DEUTERONOMY 30 - efik bible

DEUTERONOMY 30

¹NDIEN ama ekem, ke adaŋemi kpukpru ŋkpɔ emi etienede fi, kpa eridiɔŋ ye isuŋi, emi nnimde ke iso fo, afo onyuŋ ekerede mmɔ ke esit fo, ke otu kpukpru mme idut eke Jehovah Abasi fo ebinde fi ekesin do,

²onyuŋ afiakde etiene Jehovah Abasi fo, onyuŋ okopde uyo esie, nte kpukpru se ami ŋwukde fi mfin emi edide, afo, ye nditɔ fo, ke ofuri esit fo, ye ke ofuri ukpɔŋ fo;

³ndien Jehovah Abasi fo eyenam fi oto ke itie ufin fo afiak, onyuŋ atua fi mbɔm, onyuŋ ɔtɔŋɔ ntak ataŋ fi ke kpukpru mme idut eke Jehovah Abasi fo akasuande fi ekesin do.

⁴Edieke owo mbufo ekededi eke ebinde efep, odude ke utit enyɔŋ, do ke Jehovah Abasi fo editaŋ fi, do ke enye edinyuŋ ada fi edi:

⁵ndien Jehovah Abasi fo eyeda fi edi ke isɔŋ emi mme usɔ ekenyenede, afo ŋko eyeda enye enyene; ndien enye eyefɔn ye afo, onyuŋ anam fi awak akan mme usɔ.

⁶Ndien Jehovah Abasi fo eyenim esit fo mbobi, ye esit nditɔ fo, man afo ama Jehovah Abasi fo ke ofuri esit fo, ye ke ofuri ukpɔŋ fo, man afo odu uwem.

⁷Ndien Jehovah Abasi fo eyeda kpukpru isuŋi emi odori mbon asua fo, ye mmɔ eke mimaŋa fi, eke ekɔbɔde fi.

⁸Ndien afo eyetɔŋɔ ntak okop uyo Jehovah, onyuŋ anam kpukpru mme ewuhɔ esie emi ami ŋwukde fi mfin emi.

⁹Ndien Jehovah Abasi fo eyenam fi ɔtɔt ke kpukpru utom ubɔk fo, ke mfri idibi fo, ye ke mfri ufene fo, ye ke mfri iŋwaŋ fo, ke ufɔn: koro Jehovah eyetɔŋɔ ntak adat esit abaŋa fi, onyuŋ ɔfɔn ye afo, kpa nte enye akadatde esit abaŋa mme usɔ:

¹⁰ke ini afo edikopde uyo Jehovah Abasi fo, onyuŋ onimde mbet esie, ye mme ewuhɔ esie emi ewetde ke ŋwed mbet emi, ke ini afo afiakde edem etiene Jehovah Abasi fo ke ofuri esit fo, ye ke ofuri ukpɔŋ fo.

¹¹Koro mme ewuhɔ emi ami ŋwukde fi mfin emi, misɔŋke ikan fi, minyuŋ iyomke usuŋ.

¹²Enye iduhe ke enyɔŋ, eke afo ɔkpɔdɔhɔde ete, Anie edidɔk ke enyɔŋ ɔnɔ nnyin, akada enye ɔsɔk nnyin, onyuŋ ada enye asian nnyin, man nnyin inam enye?

¹³Inyuŋ iduhe ke edem inyaŋ oko, eke afo ɔkpɔdɔhɔde ete, Anie edibe aka ke edem inyaŋ oko ɔnɔ nnyin, akada enye ɔsɔk nnyin, onyuŋ ada enye asian nnyin, man nnyin inam enye?

¹⁴Edi ikɔ emi emekpere fi eti-eti, ke inua fo, ye ke esit fo, man afo anam enye.

¹⁵Sese, mmada uwem, ye nti ŋkpɔ, ye mkpa, ye idiɔk, nnim fi ke iso mfin emi;

¹⁶koro ami ŋwukde fi mfin emi, nte ama Jehovah Abasi fo, onyuŋ asaŋa ke usuŋ esie, onyuŋ onim mbet esie, ye mme ewuhɔ esie, ye mme item esie man afo odu uwem onyuŋ ɔtɔt: man Jehovah Abasi fo onyuŋ ɔdiɔŋ fi ke isɔŋ emi afo akade do ndida enye nnyene.

¹⁷Edi esit fo amakabare, afo munyuŋ ukopde, edi ayak enuk fi efep aka akatuak ibuot ɔnɔ mme abasi efen, onyuŋ anam ŋkpɔ mmɔ;

¹⁸mmotim ndɔhɔ mbufo mfin emi, nte ke mbufo iditreke nditak, mme usen fo idinyuŋ ibigike ke isɔŋ emi mbufo ebede Jordan eka do ndida enye

¹⁹Mmowuk enyɔŋ ye isɔŋ, nte edi ntiense ebaŋa mbufo mfin emi; mmada uwem ye mkpa, eridiɔŋ ye isuŋi, nnim fi ke iso; mek uwem, ndien man afo ye nditɔ fo edu uwem:

²⁰man afo ama Jehovah Abasi fo onyuŋ okop uyo esie, onyuŋ eyire ye enye: koro enye edide uwem fo, ye uniɔŋ mme usen fo: man afo oduŋ ke isɔŋ emi Jehovah ɔkɔŋwɔŋɔde ɔnɔ mme usɔ, Abraham, ye Isaac, ye Jacob, ete iyenɔ mmɔ.