Read efik DEUTERONOMY 31 Bible Online

DEUTERONOMY 31 - efik bible

DEUTERONOMY 31

¹NDIEN Moses aka eketiŋ ikɔ emi ɔnɔ ofuri Israel.

²Ndien enye ɔdɔhɔ mmɔ, ete, Ami mmosim isua ikie ye edip mfin emi; ŋkemeke aba ndiwɔrɔ nnyuŋ nduk: Jehovah omonyuŋ ɔdɔhɔ mi, ete, Afo udubehe Jordan emi.

³Edi Jehovah Abasi fo eyebem fi iso ebe, enye eyesobo mme idut emi ke iso fo efep, ndien mbufo eyeda mmɔ enyene: Joshua eyenyuŋ ebem fi iso ebe, kpa nte Jehovah ɔkɔdɔhɔde.

⁴Ndien Jehovah eyenam mmɔ, kpa nte enye akanamde Sihon ye Og, mbɔŋ mme Amorite, ye isɔŋ mmɔ, emi enye okosobode.

⁵Jehovah eyenyuŋ ada mmɔ onim ke iso mbufo, man mbufo enam mmɔ nte kpukpru mme ewuhɔ emi ŋwukde mbufo, esaŋade.

⁶Mbufo esɔŋɔ idem, enyuŋ enyene esit, ekudikhe, ekunyuŋ ebak mmɔ: koro edi Jehovah Abasi fo asaŋa ye afo: enye idikpɔŋke fi, idinyuŋ iduɔkke fi.

⁷Ndien Moses okot Joshua, onyuŋ ɔdɔhɔ enye ke iso ofuri Israel, ete, Sɔŋɔ idem, nyuŋ nyene esit: koro afo edisaŋade ye mbon emi aka isɔŋ emi Jehovah ɔkɔŋwɔŋɔde ɔnɔ mme ete mmɔ ete iyenɔ mmɔ; afo eyenyuŋ edeme enye ɔnɔ mmɔ.

⁸Onyuŋ edi Jehovah ebem fi iso asaŋa; enye eyedu ye afo, idikpɔŋke fi, idinyuŋ iduɔkke fi: kufehe ndik, kunyuŋ uyomo nsia.

⁹Ndien Moses ewet ŋwed mbet emi, onyuŋ emen enye ɔnɔ mme oku, nditɔ Levi, emi ebiomde ekebe ediomi Jehovah, onyuŋ ɔnɔ kpukpru mbiowo Israel.

¹⁰Ndien Moses owuk mmɔ, ete, Ke utit isua itiaba, ke isua eke enimde ke uwɔrɔ ufin, ke usɔrɔ ataya,

¹¹ke adaŋemi ofuri Israel edide ediwut Jehovah Abasi fo idem, ke ebiet emi enye edimekde, da mbet emi kot ke iso ofuri Israel sin mmɔ ke utɔŋ.

¹²Bon kpukpru owo ɔtɔ kiet, iren-owo ye iban, ye nditɔwɔŋ, ye esen owo fo emi odude ke obio fo, man mmɔ ekop, man mmɔ enyuŋ ekpep, enyuŋ ebak Jehovah Abasi mbufo, enyuŋ ekpeme ndinim kpukpru ikɔ mbet emi:

¹³man nditɔ mmɔ emi mikɔfiɔkke, ekop ŋko-ŋko, enyuŋ ekpep ndibak Jehovah Abasi mbufo, ke adaŋa ofuri ini eke mbufo edidude ke isɔŋ emi mbufo eyomde ndibe ŋka do ŋkada enye nnyene.

¹⁴Ndien Jehovah ɔdɔhɔ Moses, ete, Sese usen mkpa fo emekpere: kot Joshua edi, ndien mbufo edi edida ke efe esop, man nteme enye ŋkpɔ. Ndien Moses ye Joshua eka ekeda ke efe esop.

¹⁵Ndien ekut Jehovah ke efe ke adaha obubit enyɔŋ: ndien adaha obubit enyɔŋ adaha da ke enyɔŋ usuŋ efe.

¹⁶Ndien Jehovah ɔdɔhɔ Moses, ete, Sese, afo ɔmɔŋ edina ye mme usɔ; ndien mbio emi eyedaha ke enyɔŋ eketieŋe mme isen abasi mme idut emi mmɔ ekade do ndi duk ke otu mmɔ, eyenyuŋ ekpɔŋ mi, enyuŋ ebiat ediomi mi emi nnamde ye mmɔ.

¹⁷Ndien iyaresit mi eyefiop ye mmɔ ke usen oro, ndien nyekpɔŋ mmɔ, nnyuŋ ndip mmɔ iso mi, ndien mmɔ eyedi se ediade, ediwak mkpɔsɔŋ mme idiɔk-ŋkpɔ eyenyuŋ enam mmɔ; ndien mmɔ eyedɔhɔ ke usen oro, ete, Nte idige koro Abasi nnyin miduhe ke otu nnyin esin mme idiɔk-ŋkpɔ emi esim nnyin:

¹⁸ndien ami nditreke ndidip iso mi, ke usen oro mbaŋa kpukpru mme idiɔk ido eke mmɔ edinamde, koro mmɔ ekabarede etienede mme abasi efen.

¹⁹Mbufo ekam ewet ndien ikwɔ emi enɔ idem mbufo, ndien da enye kpep nditɔ Israel: sin mmɔ ke inua, man ikwɔ emi edi ntiense mi abaŋa nditɔ Israel.

²⁰Koro adaŋemi ndidade mmɔ nduk ke isɔŋ emi ŋkɔŋwɔŋɔde nnɔ mme ete mmɔ, emi ɔfiɔrɔde mmɔŋ-eba ye aran-ɔkwɔk; ndien mmɔ eyedia eyuhɔ, enyuŋ ekpon, ndien mmɔ eyekabare etiene abasi efen, ekenam ido mmɔ, enyuŋ esin mi ke ndek, enyuŋ ebiat ediomi mi.

²¹Ndien ama ekem, ke ediwak mkpɔsɔŋ mme idiɔk-ŋkpɔ eke edisimde mmɔ, ikwɔ emi eyebɔrɔ ke iso mmɔ nte ntiense; koro enye midisopkde ke inua nditɔ mmɔ: koro mmɔfiɔk ekikere mmɔ emi mmɔ ekerede mfin emi, ke mmeŋka-ndaha mmɔ kaŋa nduk ke isɔŋ emi ŋkɔŋwɔŋɔke.

²²Ndien Moses ewet ikwɔ emi ke usen oro, onyuŋ ada enye ekpep nditɔ Israel.

²³Enye onyuŋ eteme Joshua eyen Nun, ete, Sɔŋɔ idem, nyuŋ nyene esit: koro afo edidade nditɔ Israel oduk ke isɔŋ emi ŋkɔŋwɔŋɔde nnɔ mmɔ: ami nyenyuŋ ndu ye afo.

²⁴Edikem, ke adaŋemi Moses ekewetde ikɔ mbet emi esin ke ŋwed ama, tutu mmɔ ekure, Moses owuk mme Levite,

²⁵emi ebiomde ekebe ediomi Jehovah, ete,

²⁶Mbufo eda ŋwed mbet emi ekediɔk ke ŋkaŋ ekebe ediomi Jehovah Abasi mbufo, man enye ana do nte ntiense abaŋa fi.

²⁷Koro ami mmɔfiɔk nsɔŋ-ibuot fo, ye itun fo: kam sese, ke ami ndodu uwem ye mbufo mfin emi, mbufo esɔŋ ibuot ye Jehovah: ŋwaŋwa ediso adaŋemi ndikpade!

²⁸Mbufo ebon kpukpru mbiowo mme esien mbufo, ye mme andidaha owo mbufo, enɔ mi, ndien nyetiŋ ikɔ emi nsin mmɔ ke utɔŋ, nnyuŋ ŋwuk enyɔŋ ye isɔŋ nte edi ntiense ye mmɔ.

²⁹Koro mmɔfiɔk, adaŋemi ndikpade mbufo eyekabare edi ata idiɔk, enyuŋ ewɔŋɔre ekpɔŋ usuŋ emi ŋtemede mbufo; ndien idiɔk ŋkpɔ eyesim mbufo ke ini iso: koro mbufo edinamde idiɔk ido ke iso Jehovah, ke eyat enye esit ke utom ubɔk fo.

³⁰Ndien Moses emen kpukpru ikɔ ikwɔ emi etiŋ ke utɔŋ ofuri esop Israel, tutu mmɔ ekure.