Read efik DEUTERONOMY 4 Bible Online

DEUTERONOMY 4 - efik bible

DEUTERONOMY 4

¹O ISRAEL, mbufo ekop, ndien, mme ewuhɔ, ye mbet emi ŋkpepde mbufo nte enam, man mbufo edu uwem, enyuŋ eduk ekeda isɔŋ emi Jehovah Abasi mme ete mbufo ɔnɔde mbufo.

²Ekuda ikɔ efen edian ke ikɔ emi ami ntemede mbufo, ekunyuŋ esio ke esit efep, man mbufo enim mbet Jehovah Abasi mbufo emi ami ntemede mbufo.

³Enyin mbufo emekut se Jehovah akanamde ke ikɔ Baal-peor; koro ama edi kpukpru owo emi eketienede Baal-peor, Jehovah Abasi mbufo ama osobo mmɔ ke otu mbufo efep.

⁴Edi kpukpru mbufo emi ekeyirede ye Jehovah Abasi mbufo ededu uwem tutu osim mfin emi.

⁵Sese, mma nteme mbufo mme ewuhɔ ye mme item, kpa nte Jehovah Abasi mi eketemede mi, man mbufo enam ntre ke isɔŋ emi mbufo eyomde ndika do ŋkada nnyene.

⁶Mbufo etiŋ enyin, ndien, enam: koro emi edide eti ibuot mbufo, ye asian mbufo, ke iso mme idut, emi edikopde kpukpru mme ewuhɔ emi, ndien mmɔ eyedɔhɔ ete, Ho, akamba idut emi edi mbon eti ibuot, onyuŋ edi asian.

⁷Koro ewe akamba idut odu emi abasi esie ekperede enye, nte Jehovah Abasi nnyin, ke kpukpru se nnyin iseseme inɔ enye?

⁸Ndien ewe akamba idut odu emi enyenede edinen ewuhɔ ye item, ebiet ofuri ŋwed mbet emi ami nnimde ke iso mbufo mfin emi?

⁹Edi kpeme idem fo, nyuŋ tim kpeme ukpɔŋ fo, man afo okufre ŋkpɔ emi enyin fo ekekutde, man mmɔ ekunyuŋ ewɔrɔ ke esit fo, ofuri ini uwem fo: ndien da mmɔ kpep nditɔ fo, ye nditɔ nditɔ fo:

¹⁰usen oro afo akadade ke iso Jehovah Abasi fo ke Horeb, ke ini Jehovah ɔkɔdɔhɔde mi, ete, Bon mbio emi ɔtɔ kiet nɔ mi, ndien nyenam mmɔ ekop ikɔ mi, man mmɔ ekpep ndibak mi ofuri ini emi mmɔ edidude uwem ke isɔŋ oro, man mmɔ enyuŋ ekpep nditɔ mmɔ.

¹¹Ndien mbufo esaŋa ekpere eketuak eda ke usuhɔre obot; ndien obot oro asak ikaŋ, osim ufɔt ikpa-enyɔŋ, ekim, obubit enyɔŋ, ye ata Ɔkpɔsɔŋ ekim enyuŋ edu.

¹²Ndien Jehovah etie ke esit ikaŋ ɔdɔhɔ ye mbufo: mbufo ekekop uyo ikɔ edi ikwe mbiet ŋkpɔ: ke mibɔhɔke uyo-uyo.

¹³Ndien enye asiak ediomi esie ɔnɔ mbufo, emi enye etemede mbufo ete enam, kpa ikɔ mboduop oro: enye onyuŋ ewet mmɔ esin ke itiat ŋwed iba.

¹⁴Ndien Jehovah ɔdɔhɔ mi ini oro, ete ŋkpep mbufo ewuhɔ ye item, kpaŋ mbufo ekpenam mmɔ ke isɔŋ emi mbufo ebede do ndida nnyene.

¹⁵Mbufo etim ndien ekpeme idem mbufo eti-eti: koro mbufo mikekwe baba mbiet ŋkpɔ kiet ke usen oro Jehovah eketiede ke ufɔt ikaŋ oro ɔdɔhɔ ye mbufo ke Horeb:

¹⁶mbak mbufo edikabare ediɔk, enyuŋ enam edisɔi mbiet ŋkpɔ ekededi enɔ idem mbufo, eke ebietde eren mme ŋwan,

¹⁷mbiet unam ekededi eke odude ke isɔŋ, ye mbiet inuen mba ekededi eke efede ke ikpa-enyɔŋ,

¹⁸mbiet ŋkpɔ ekededi eke ɔnyɔnide ke isɔŋ, ye mbiet iyak ekededi eke odude ke mmɔŋ ke idak isɔŋ:

¹⁹mbak afo edinyuŋ emenere enyin fo ese enyɔŋ, onyuŋ okut utin, ye ɔfiɔŋ, ye ntantafiɔŋ, kpa ofuri udim enyɔŋ, ndien enuk fi awaha akatuak ibuot ɔnɔ mmɔ, onyuŋ anam ŋkpɔ ɔnɔ mmɔ emi Jehovah Abasi fo ama ekedeme ɔnɔ kpukpru mme idut ke idak enyɔŋ.

²⁰Ndien Jehovah akada mbufo oto ke ikaŋ utara-ukwak, ke Egypt, ɔwɔrɔ, man edi mbio udeme esie, nte edide mfin emi.

²¹Ndien ŋko Jehovah akayat esit ye ami abaŋa mbufo, onyuŋ ɔŋwɔŋɔ ete, Ami ndibehe Jordan emi, ndinyuŋ ndukke ke eti isɔŋ, emi Jehovah Abasi fo ɔnɔde fi ke udeme:

²²koro ami mmɔŋ ndikpa ke isɔŋ emi, ndibehe Jordan; edi mbufo eyebe ekeda eti isɔŋ oro enyene.

²³Mbufo ekpeme idem, mbak edifre ediomi Jehovah Abasi mbufo, emi enye okodiomide ye mbufo, ndien eka ekenam edisɔi mbiet ŋkpɔ ekededi ke idem mbufo, emi Jehovah Abasi fo akpande fi.

²⁴Koro Jehovah Abasi fo edide edisak ikaŋ ye Abasi ufup.

²⁵Ke adaŋemi afo edibonde nditɔ ye nditɔ nditɔ, mbufo enyuŋ ebigide ke isɔŋ oro, enyuŋ ekabarede ediɔk, enyuŋ esɔi ŋkpɔ esin ke mbiet ŋkpɔ ekededi, enyuŋ enam idiɔk ido ke iso Jehovah Abasi fo, enyuŋ eyat enye esit:

²⁶mfin emi mmowuk enyɔŋ ye isɔŋ nte edi ntiense ebaŋa mbufo, nte mbufo eyewara ndibiara ke isɔŋ emi mbufo ebede Jordan eka do ndida enye nnyene; mbufo idibigike ke esit anyan ini; edi eyebiara tak-tak.

²⁷Ndien Jehovah eyesuan mbufo ke otu mme idut, ndien mbufo eyesuhɔ esisit ke otu mme idut emi Jehovah adade mbufo aka do.

²⁸Ndien do ke mbufo edikpono mme abasi emi ubɔk owo anamde, eto ye itiat, emi mikwe usuŋ, minyuŋ ikopke uyo, minyuŋ idiaha ŋkpɔ, minyuŋ ikopke utebe.

²⁹Ndien afo ama etie do oyom Jehovah Abasi fo, afo eyekut enye, edieke oyomde enye ke ofuri esit fo, ye ke ofuri ukpɔŋ fo.

³⁰Ke adaŋemi afo etiede ke itie ukut, kpukpru ŋkpɔ emi enyuŋ etienede fi, ke ini iso, ndien afo ama afiak etiene Jehovah Abasi fo, onyuŋ okop uyo;

³¹koro Jehovah Abasi fo edide Abasi mbɔm; enye idikpɔŋke fi, idinyuŋ isoboke fi, idinyuŋ ifreke ediomi mme usɔ emi enye ɔkɔŋwɔŋɔde ɔnɔ mmɔ.

³²Mbɔk, kam bup ini eset, emi ekebemde fi iso, tɔtɔŋɔ ke usen oro Abasi okobotde owo ke ererimbot, nyuŋ tɔŋɔ ke utit enyɔŋ kiet, tutu osim ke utit eken, mme oruk akamba ŋkpɔ emi ama osu, mme ekam esikokop ebaŋa oruk ŋkpɔ emi?

³³Nte owo akananam okop uyo Abasi nte ɔdɔhɔde ke esit ikaŋ, kpa nte afo okokopde, ndien odu uwem?

³⁴Mme Abasi akananam odomo ndika ŋkosio idut kiet ke idem esie ke ufɔt efen, ke ndomo, ye ke mme idiɔŋɔ, ye ke mme utibe ŋkpɔ, ye ke ekɔŋ, ye ke ɔkpɔsɔŋ ubɔk, ye ke edimenere ubɔk, ye ke ikpɔ ŋkpɔ ndik, nte kpukpru se Jehovah Abasi mbufo akanamde ye mbufo ke Egypt ke iso mbufo, edide?

³⁵Ema ewut fi, man afo ɔfiɔk ete ke Jehovah edi Abasi; efen iduhe idian ye enye.

³⁶Enye eketie ke heaven anam fi okop uyo esie, man ekpep fi: enye onyuŋ owut fi akwa ikaŋ esie ke isɔŋ: afo ama onyuŋ okop ikɔ esie emi otode ke ufɔt ikaŋ.

³⁷Ndien oto koro enye akamade mme usɔ, mmɔde enye emekde nditɔ mmɔ emi etienede mmɔ ke edem, onyuŋ adade akwa odudu esie osio fi ke Egypt ke iso esiemɔ:

³⁸ete ibin mme idut emi ekponide enyuŋ esɔŋɔde ekan fi, ke iso fo ifep, ete ida fi iduk, ndinɔ fi isɔŋ mmɔ ke udeme; nte edide mfin emi.

³⁹Ɔfɔn fi ɔfiɔk, ndien, mfin emi, onyuŋ ekere ke esit fo, ete ke Jehovah edi Abasi ke ata enyɔŋ, ye ke isɔŋ ke idak; efen iduhe.

⁴⁰Nim ndien mme ewuhɔ esie, ye mbet esie, emi ami mbetde fi mfin emi, ndien eyefɔn fi, ye nditɔ fo emi editienede fi, man afo onyuŋ ebigi uwem ke isɔŋ emi Jehovah Abasi fo ɔnɔde fi, ke nsinsi.

⁴¹Ekem Moses adianare obio ita ke edem Jordan oko emi utin asiahade;

⁴²man owot-owo emi ediwotde mbɔhiduŋ esie ke mikoho koi, mikonyuŋ isuaha enye ke ini eke ekebede, efehe aka do; man enye efehe oduk ke obio emi kiet, onyuŋ odu uwem:

⁴³Bezer ke wilderness, ke una-isɔŋ, eke mme Reubenite; ye Ramoth ke Gilead, eke mme Gadite; ye Golan ke Bashan, eke Manasseh.

⁴⁴Mme mmɔ emi enyuŋ edi mbet emi Moses okonimde ke iso nditɔ Israel:

⁴⁵mme mmɔ emi edi ikɔ ntiense, ye mme ewuhɔ, ye mme item, emi Moses eketiŋde ɔnɔ nditɔ Israel, ke mmɔ ema eketo ke Egypt ewɔrɔ;

⁴⁶ke edem Jordan oko, ke itihere emi asakde iso ese Beth-peor, ke isɔŋ Sihon ɔbɔŋ mme Amorite, emi okoduŋde ke Heshbon, emi Moses ye nditɔ Israel esuande, ke mmɔ ema eketo ke Egypt ewɔŋɔ:

⁴⁷mmɔ enyuŋ eda isɔŋ esie, ye isɔŋ Og ɔbɔŋ Bashan, mbɔŋ mme Amorite mbiba, emi ekedude ke edem Jordan oko, ke edem usiaha-utin;

⁴⁸ɔtɔŋɔde ke Aroer emi odude ke mben itihere Arnon, tutu osim ke obot Sion (emi edide Hermon),

⁴⁹ye ofuri itihere Jordan ke edem Jordan oko ke edem usiaha-utin, tutu osim ke Inyaŋ Itihere, ke usuhɔre Pisgah.