Read efik DEUTERONOMY 5 Bible Online

DEUTERONOMY 5 - efik bible

DEUTERONOMY 5

¹NDIEN Moses okot ofuri Israel, onyuŋ ɔdɔhɔ mmɔ, ete, O Israel, kop mme ewuhɔ ye mme item emi ami ntiŋde nsin mbufo ke utɔŋ mfin emi, mbufo enyuŋ ekpep mmɔ, enyuŋ etiŋ enyin enam mmɔ.

²Jehovah Abasi nnyin akanam ediomi ye nnyin ke Horeb.

³Idige ye mme ete nnyin ke Jehovah akanam ediomi emi, edi ye nnyin ke idem nnyin, kpukpru nnyin emi idude uwem mi mfin emi.

⁴Jehovah etie ke obot oro ke ufɔt ikaŋ, ɔdɔhɔ ikɔ ye mbufo iso ye iso

⁵(Ami ŋkada ke ufɔt Jehovah ye mbufo ke ini oro, man ntiŋ ikɔ Jehovah nnɔ mbufo: koro ndik ikaŋ oro akanamde mbufo, mufo ikonyuŋ idɔkke obot) ete,

⁶Ami ndi Jehovah Abasi fo, emi ŋkosiode fi ke isɔŋ Egypt, ke ufɔk ufin mfep.

⁷Kunyene Abasi efen ukɔrɔ ye ami.

⁸Kunam edisɔi ŋkpɔ unɔ idem fo, kunyuŋ unam mbiet baba ŋkpɔ kiet eke odude ke heaven ke enyɔŋ, ye eke odude ke isɔŋ ke idak, ye eke odude ke mmɔŋ ke idak isɔŋ:

⁹kunuhɔ unɔ mmɔ, kunyuŋ unam ŋkpɔ mmɔ; koro ami Jehovah Abasi fo ndi Abasi ufup, nda mme ukwaŋkpɔ mme ete ndori nditɔ ke idem, ndori ɔyɔhɔ emana mmɔ eke esuade mi ita ye inaŋ

¹⁰nnyuŋ mfɔn ido ye tɔsin emana mmɔ eke emade mi enyuŋ enimde mbet mi.

¹¹Kumen enyiŋ Jehovah Abasi fo utomo ke se midige akpanikɔ: koro Jehovah midiyakke otomo enyiŋ esie ke se midige akpanikɔ, ɔbɔhɔ.

¹²Kpeme usen sabbath, nyuŋ nim enye ke edisana, kpa nte Jehovah Abasi fo okowukde fi.

¹³Nam ŋkpɔ ke usen itiokiet, nyuŋ nam ofuri utom fo:

¹⁴edi ɔyɔhɔ usen itiaba edi sabbath Jehovah Abasi fo: kunam baba utom ke esit, afo, ye eyen-eren fo, ye eyen fo aŋwan, ye ofin eren fo, ye ofin aŋwan fo, ye enaŋ fo, ye ass fo, ye baba ufene fo kiet, ye esen owo fo eke odude ke obio mbufo; man ofin eren fo ye ofin aŋwan fo eduɔk odudu kpa nte afo.

¹⁵Nyuŋ ti nte afo ekedide ofin ke isɔŋ Egypt, ndien Jehovah Abasi akada ɔkpɔsɔŋ ubɔk ye edimenere ubɔk osio fi ke esit: mmɔdo Jehovah Abasi fo okowukde fi ete onim usen sabbath.

¹⁶Kpono usɔ ye uka, kpa nte Abasi fo okowukde fi; man usen fo ebigi, man onyuŋ ɔfɔn fi, ke isɔŋ emi Jehovah Abasi fo ɔnɔde fi.

¹⁷Kuwot owo.

¹⁸Kunyuŋ usin efibe.

¹⁹Kunyuŋ uyip inɔ.

²⁰Kunyuŋ ubaŋa mbɔhiduŋ fo nte ntiense nsu.

²¹Kunyuŋ uyom ŋwan mbɔhiduŋ fo, kunyuŋ usin mbumek ke ufɔk mbɔhiduŋ fo, ke iŋwaŋ esie, ye ke ofin eren esie, ye ke ofin aŋwan esie, ye ke enaŋ esie, ye ke ass esie, ye ke ŋkpɔ ekededi eke enyenede mbɔhiduŋ fo.

²²Jehovah etie ke obot ke ufɔt ikaŋ ye nsuŋikaŋ, ye ekim, etiŋ ikɔ emi ɔnɔ ofuri esop mbufo ke ɔkpɔsɔŋ uyo: inyuŋ idianke efen. Ndien enye ewet mmɔ esin ke itiat-ŋwed iba, ada mmɔ ɔnɔ mi.

²³Edikem ke mbufo ekopde uyo emi otode ke ekim (koro obot asakde ikaŋ), ndien mbufo kpa kpukpru mme etubom mme esien mbufo, ye mbiowo mbufo, esaŋa ekpere mi;

²⁴ndien mbufo edɔhɔ, ete, Sese, Jehovah Abasi nnyin ama owut nnyin ubɔŋ esiemɔ, ye akwa ubom esiemɔ, nnyin ima inyuŋ ikop uyo esie emi okotode ke esit ikaŋ: nnyin inyuŋ ikut mfin emi nte Abasi ɔdɔhɔde ikɔ ye owo, ndien owo odu uwem

²⁵Nnyin idinam didie ndien ikpaŋa? Koro akamba ikaŋ emi eyeta nnyin: nnyin imana ikop uyo Jehovah Abasi nnyin, iyekpaŋa.

²⁶Koro anie odu ke otu kpukpru obukidem emi okokopde uyo Abasi uwem nte etiede ke ufɔt ikaŋ etiŋ, nte nnyin, ndien odu uwem?

²⁷Afo saŋa kpere, kokop kpukpru se Jehovah Abasi nnyin edidɔhɔde: ndien afo men kpukpru se Jehovah Abasi nnyin edidɔhɔde fi, tiŋ nɔ nnyin; ndien nnyin iyekop, inyuŋ inam.

²⁸Ndien Jehovah okop uyo ikɔ mbufo, ke mbufo ekedɔhɔde ye ami; ndien Jehovah ɔdɔhɔ mi, ete, Mmokop uyo ikɔ mbon emi mmɔ ekekɔhɔde ye afo: kpukpru se mmɔ ekedɔhɔde ɔfɔn.

²⁹Oh, mmɔ ekpekam enyene oruk esit emi ke idem mmɔ, eke ebakde mi, enyuŋ enimde ofuri mbet mi kpukpru ini, kpaŋ ŋkpɔfɔn ye mmɔ, ye nditɔ mmɔ ke nsinsi!

³⁰Ka kɔdɔhɔ mmɔ, ete, Mbufo efiak ke mme tent mbufo.

³¹Edi ama edi afo, da mi ye ami, ndien nyemen kpukpru mbet, ye mme ewuhɔ, ye mme item, emi afo edikpepde mmɔ ntiŋ nnɔ fi, man mmɔ enam mmɔ ke isɔŋ emi nnɔde mmɔ eda enye enyene.

³²Mbufo etiŋ enyin ndien enam kpa nte emi Jehovah Abasi mbufo etemede mbufo: ekuwaha eka nnasia, ekunyuŋ eka ufien.

³³Mbufo esaŋa ke kpukpru usuŋ emi Jehovah Abasi mbufo okowukde mbufo, man edu uwem, man onyuŋ ɔfɔn mbufo, man mme usen mbufo enyuŋ ebigi ke isɔŋ emi mbufo edidade enyene.