Read efik DEUTERONOMY 9 Bible Online

DEUTERONOMY 9 - efik bible

DEUTERONOMY 9

¹O ISRAEL kop: afo ɔmɔŋ edibe Jordan mfin emi okoduk, man ada mme idut emi ekponide enyuŋ esɔŋde ekan fi, enyene, ikpɔ obio emi enyenede ŋkokoŋo ibibene.

²Mbio emi ekponide enyuŋ ekoŋide, nditɔ Anakim, emi afo ɔfiɔkde, onyuŋ okopde abaŋa, ete, Anie ekeme ndida ke iso nditɔ Anak?

³Fiɔk ndien mfin emi, ete ke Jehovah Abasi fo emi ebemde fi iso ebe, edi ikaŋ eke atade, enye eyesobo mmɔ, enye eyenyuŋ ɔsuhɔre mmɔ ke iso fo onim: ndien afo eyewara ebin mmɔ efep, onyuŋ osobo mmɔ, kpa nte Jehovah ɔkɔdɔhɔde fi.

⁴Kudɔhɔ ke esit fo, ke adaŋemi Jehovah Abasi fo ama ekebin mmɔ efep ke iso fo ama, ete, Ke edi eti ido mi esin Jehovah ada mi oduk, ete nda isɔŋ emi nnyene: koro ke edi idiɔk ido mme idut emi esin Jehovah ebin mmɔ ke iso fo efep.

⁵Idige eti ido fo, inyuŋ idige eti esit fo esin fi oduk aka akada isɔŋ mmɔ: koro edi idiɔk ido mme idut emi esin Jehovah Abasi fo osio mmɔ ke iso fo efep, man enye onyuŋ anam ikɔ esie osu nte Jehovah ɔkɔŋwɔŋɔde ɔnɔ mme usɔ, Abraham, ye Isaac, ye Jacob.

⁶Fiɔk, ndien, ete idige eti ido fo esin Jehovah Abasi fo ɔnɔ fi eti isɔŋ emi enyene; koro mbufo edide mbon nsɔŋ-ibuot.

⁷Ti, kufre nte afo akayatde Jehovah Abasi fo esit ke wilderness: ɔtɔŋɔde ke usen emi afo otode ke isɔŋ Egypt, tutu mbufo edisim ebiet emi, mbufo emesɔŋ ibuot ye Jehovah.

⁸Ndien ŋko ke Horeb mbufo ekeyat Jehovah esit, ndien Jehovah ofiop esit ye mbufo ete isobo mbufo.

⁹Ke adaŋemi ŋkɔdɔkde obot ŋka ndibɔ itiat-ŋwed ediomi emi Jehovah odiomide ye mbufo, ntie ke obot ke ofuri uwemeyo aba ye okoneyo aba, ndiaha udia, nnyuŋ ŋŋwɔŋke mmɔŋ,

¹⁰ndien Jehovah ɔnɔ mi itiat-ŋwed iba emi nnuen-ubɔk Abasi ekewetde; ndien kpukpru ikɔ oro Jehovah eketiede ke ufɔt ikaŋ ɔdɔhɔ ye mbufo ke usen esop oro, edu mmɔ ke esit.

¹¹Edikem ke utit uwemeyo aba ye okoneyo aba, Jehovah ɔnɔ mi itiat-ŋwed ediomi iba oro.

¹²Ndien Jehovah ɔdɔhɔ mi, ete, Wawara daha ke ebiet emi suhɔre; koro oruk fo emi afo okosiode ke Egypt, emekabare ediɔk: mmɔ emewara ndiwaha ŋkpɔŋ usuŋ emi ŋketemede mmɔ; emenam editara mbiet enɔ idem mmɔ.

¹³Ndien Jehovah ɔdɔhɔ mi, ete, Mmokut mbio emi, ndien, sese, mmɔ edi mbon nsɔŋ-ibuot:

¹⁴yak mi man nsobo mmɔ, nnyuŋ nsɔhi enyiŋ mmɔ ke idak enyɔŋ mfep: ndien nyenam fi akabare edi idut eke ɔsɔŋde onyuŋ awakde akan mmɔ.

¹⁵Ndien ŋkabare nto ke obot nsuhɔre, obot onyuŋ asak ikaŋ itiat-ŋwed iba ediomi enyuŋ edu mi ke ubɔk mbiba.

¹⁶Ndien ŋkut, ndien, sese, mbufo ema edue Jehovah Abasi mbufo, ema enam editara mbiet eyen enaŋ enɔ idem mbufo: ema ewara ewaha ekpɔŋ usuŋ emi Jehovah eketemede mbufo:

¹⁷ndien mmum itiat-ŋwed iba oro ke ubɔk mi mbiba, ntop mmɔ nduɔk ke isɔŋ ke iso mbufo mbom.

¹⁸Nnyuŋ nduɔ ke isɔŋ ke iso Jehovah, kpa nte eke akpa ini, ke uwemeyo aba, ye okoneyo aba; ndiaha udia, nnyuŋ ŋŋwɔŋke mmɔŋ, mbaŋa kpukpru mme idiɔk ido emi mbufo ekenamde, ke erinam se idiɔkde ke iso Jehovah, nnyuŋ nyat enye esit.

¹⁹Koro ndikhere iyaresit ye ifiopesit, emi Jehovah okofiopde ye mbufo ete isobo mbufo.

²⁰Edi Jehovah okop uyo mi ke ini oro ŋko. Jehovah onyuŋ ayat esit ye Aaron ŋko eti-eti, ete isobo enye; ndien nnam mkpe-ubɔk nnɔ Aaron ŋko ke ini oro.

²¹Ndien mmen idiɔk-ŋkpɔ mbufo, kpa eyen enaŋ emi mbufo ekenamde, nda mfɔp ke ikaŋ, ndien nda obu esie nduɔk ke idim emi otode ke obot ɔsuhɔre.

²²Mbufo ekenyuŋ eyat Jehovah esit ke Taberah, ye ke Massah, ye ke Kibroth-hattaavah.

²³Ndien ke ini Jehovah ɔdɔŋde mbufo, ete mbufo ewɔŋɔ ke Kadesh-barnea, edɔk eka ekeda isɔŋ emi nnɔde mbufo, mbufo eneni uyo Jehovah Abasi mbufo, inyuŋ inimke uyo esie ke akpanikɔ, inyuŋ ikopke uyo esie.

²⁴Mbufo esuk esɔsɔŋ ibuot ye Jehovah, toto ke usen emi ŋkɔfiɔkde mbufo.

²⁵Ntem ke ami nduɔ ke isɔŋ ke iso Jehovah ke uwemeyo aba ye ke okoneyo aba, nte ŋkɔduɔde: koro Jehovah ɔkɔdɔhɔde ete iyesobo mbufo.

²⁶Ndien ŋkpe Jehovah ubɔk, nte, O Jehovah ɔbɔŋ, kusobo ikɔt fo, kpa udeme fo, emi afo akadade ubom fo afak, emi afo akadade ɔkpɔsɔŋ ubɔk osioŋo mmɔ ke Egypt.

²⁷Ti ikɔt fo, Abraham, ye Isaac, ye Jacob; kuse nsɔŋ-ibuot mbon emi, ye mme idiɔk ido mmɔ, ye mme ukwaŋkpɔ mmɔ:

²⁸mbak idut oro afo okosiode nnyin ke esit edidɔhɔ ete, Koro Jehovah mikekemeke ndida mmɔ nduk ke isɔŋ emi enye ɔkɔdɔhɔde mmɔ, koro enye onyuŋ asuade mmɔ, esin enye osio mmɔ okowot ke wilderness.

²⁹Edi mmɔ edi ikɔt fo, ye udeme fo, emi afo akadade akwa odudu fo ye edimenere ubɔk fo osio mmɔ efep.