Read efik JOHN 12 Bible Online

JOHN 12 - efik bible

JOHN 12

¹OSUK usen itiokiet ndien edikem ini Passover, Jesus edi ke Bethany, ebiet emi Lazarus oduŋde do, kpa owo emi Enye akanamde eset ke mkpa.

²Ntem ke mmɔ enam udia enɔ Enye do; Martha onyuŋ ada mbet, edi Lazarus edi kiet ke otu mmɔ emi etiede ye Enye.

³Ekem Mary ada ata nsɔŋ-urua edifuɔŋ aran spikenard, ke udop pound kiet, eyet Jesus ukot. Onyuŋ ada idet esie ɔkwɔhɔre Enye ukot: ndien ufɔk ɔyɔhɔ ye edinem ufuɔŋ aran oro.

⁴Edi Judas Iscariot, owo mbet Esie, emi edidade Enye ɔnɔ, ɔdɔhɔ ete,

⁵Nsinam mikanyamke edifuɔŋ aran emi ibɔ okuk ikie ita, ida inɔ mme ubuene?

⁶Edi enye idɔhɔke ntem koro enye ekerede mme ubuene; edi ɔdɔhɔ koro enye edide inɔ, onyuŋ akamade ekpat okuk, onyuŋ ososio se isinede ke esit.

⁷Ntem ke Jesus ete, Ekpɔŋ enye; yak enye onim emi ebeŋe usen eke edibukde Mi.

⁸Koro mbufo emenyene mme ubuene ye mbufo kpukpru ini; edi mbufo inyeneke Mi kpukpru ini.

⁹Ntre ke akwa otu mme Jew efiɔk ete Enye do; ndien mmɔ edi, idige ke ntak Jesus ikpɔŋ, edi man mmɔ enyuŋ ekut lazarus, emi Enye akanamde eset ke mkpa.

¹⁰Edi ikpɔ oku eduk odu, ete iwot Lazarus ŋko,

¹¹koro oto ke ntak esie ediwak mme Jew edaha ebuɔt idem ye Jesus.

¹²Ke ndaŋ-nsiere ke adaŋemi akwa otu owo eke ekedide usɔrɔ ekopde ete Jesus ɔmɔŋ edi ke Jerusalem,

¹³mmɔ eda ndak eyop ewɔŋɔ eka ekosobo ye Enye, enyuŋ efiori ete, Hosanna: Itoro enyene Enye emi edide ke enyiŋ Jehovah, Kpa Edidem Israel.

¹⁴Edi ke ini Jesus okutde abak ass, Enye ɔdɔk odoro ke esit: nte ewetde ete,

¹⁵Kufehe, Adiaha Zion: Sese, Edidem fo ke odoro Ke abak ass edi.

¹⁶Mbet Esie ifiɔkke se ŋkpɔ emi ɔwɔrɔde ke idaha oro: edi ke ini ema ekɔnɔ Jesus ubɔŋ, adaŋoro mmɔ eti ete ema ewet ŋkpɔ emi ebaŋa Enye, enyuŋ enam ŋkpɔ emi enɔ Enye.

¹⁷Ntem ke otu owo emi ekedude ye Enye ke ini Enye okotde Lazarus ɔwɔrɔ ke udi anam enye eset ke mkpa, etiŋ se mmɔ ekekutde.

¹⁸Ke ntak emi ŋko udim owo eka ekesobo ye Enye, sia mmɔ ekopde ete Enye akanam idiɔŋɔ emi.

¹⁹Ntem ke mme Pharisee eneme ke otu idem mmɔ ete, Ese do, mbufo ikemeke ŋkpɔ: sese, ererimbot ama adaha etiene Enye.

²⁰Ndusuk mme Greek enyuŋ edu ke otu mmɔ emi ekedɔkde edi ndituak ibuot nnɔ Abasi ke usɔrɔ;

²¹mmɔ etiene Philip, emi otode ke Bethsaida ke Galilee, ekebup enye ete, Ɔbɔŋ owo, nnyin iyom ndikut Jesus.

²²Philip aka ekeneme ɔnɔ Andrew; Andrew asaŋa ye Philip aka eketiŋ ɔnɔ Jesus.

²³Jesus ɔbɔrɔ mmɔ ete, Ekem ini emi Eyen Owo edinyenede ubɔŋ.

²⁴Ke akpanikɔ ke ndɔhɔ mbufo, Adaŋa nte mkpasip ibokpot miduɔhɔ isine ke esit isɔŋ ikpa, enye osuk odu ke idem esie ikpɔŋ; edi enye ama akpa, oŋwum ekese mfri.

²⁵Owo eke amade uwem esie ɔduɔk uwem esie; edi owo eke asuade uwem esie ke ererimbot emi eyemum uwem esie onim tutu osim uwem nsinsi.

²⁶Edieke owo ekededi anamde ŋkpɔ ɔnɔ Mi, yak enye etiene Mi; ndien ebiet eke Ami ndude, asaŋutom Mi edidu do ŋko. Edieke owo anamde ŋkpɔ ɔnɔ Mi, Ete Mi eyekpono enye.

²⁷Ukpɔŋ otimere Mi ke idem ke emi, ndien ndidɔhɔ nso? Ete, nyaŋa Mi sio ke ubɔk ini emi? Edi mma nsim ini emi ke ntak emi.

²⁸Ndɔhɔ nte, Ete, nɔ enyiŋ Fo ubɔŋ. Ntre ke uyo oto ke enyɔŋ ete, Mma ŋkɔnɔ enyiŋ Mi ubɔŋ, nyenyuŋ ntɔŋɔ ntak nnɔ enye ubɔŋ.

²⁹Otu owo emi edade do ekop, edɔhɔ ete, Enyɔŋ atuak: mmɔ efen ete, Angel eketiŋ ikɔ ye Enye.

³⁰Jesus ɔbɔrɔ mmɔ ete, Uyo oro ikedige kabaŋa Mi edi ekedi kabaŋa mbufo.

³¹Ekem ini ikpe ererimbot emi: ke emi emɔŋ edisio ɔbɔŋ ererimbot emi eduɔk

³²Ndien Ami, ke ema emen Mi ekpɔŋ isɔŋ, nyedudi kpukpru owo etiene Mi.

³³Enye etiŋ ntre ndiwut oruk mkpa eke Enye edikpade.

³⁴Ntem ke otu owo ebɔrɔ Enye ete, Nnyin ima ikop nte edɔhɔde ke ibet, ete Christ eyesuk odu ke nsinsi: ndien Afo anam didie ɔdɔhɔ ete, Enyene ndimen Eyen Owo ke enyɔŋ? anie edi Eyen Owo emi?

³⁵Mmɔdo Jesus ɔbɔrɔ mmɔ ete, Uŋwana eyesuk odu ye mbufo ke ekpri ini. Esaŋa ke adaŋemi mbufo enyenede uŋwana, mbak ekim edisim mbufo; koro owo eke asaŋade ke ekim ifiɔkke ɔtɔ nte enye akade.

³⁶Ke ini mbufo enyenede uŋwana, ebuɔt idem ye uŋwana, man mbufo ekabare edi nditɔ uŋwana. Jesus eketiŋ ŋkpɔ emi, onyuŋ adaha okodibe mmɔ.

³⁷Edi okposuk edi oro Enye akanamde adaŋa uwak-uwak mme idiɔŋɔ ke iso mmɔ, mmɔ ibuɔtke idem ye Enye:

³⁸man ikɔ emi prophet Isaiah ɔkɔdɔhɔde osu ete, Ɔbɔŋ, anie okonim mbuk nnyin ke akpanikɔ? Ubɔk Jehovah ama onyuŋ ayarare ɔnɔ anie?

³⁹Ke ntak emi mmɔ ikemeke ndinim ke akpanikɔ; koro Isaiah ɔtɔŋɔ ntak ɔdɔhɔ ete,

⁴⁰Enye okotibi mmɔ enyin, onyuŋ ɔsɔŋ mmɔ esit; Mbak mmɔ edida enyin mmɔ ekut usuŋ, enyuŋ eda esit mmɔ ekere ŋkpɔ, Enyuŋ ekabare, ndien nnam udɔŋɔ okure mmɔ.

⁴¹Isaiah eketiŋ ikɔ emi koro enye okutde ubɔŋ Esie; enye ama onyuŋ etiŋ ŋkpɔ abaŋa Enye.

⁴²Edi kpa ke otu mme andikara ediwak owo ebuɔt idem ye Enye; edi ke ntak mme Pharisee mmɔ iyarakere iwut, mbak edibin mmɔ esio ke synagogue.

⁴³Koro mmɔ emama ubɔŋ eke otode owo akan ubɔŋ eke etode Abasi.

⁴⁴Edi Jesus ofiori ɔkpɔsɔŋ ete, Owo eke ɔbuɔtde idem ye ami ibuɔtke idem ye Ami, edi ɔbuɔt ye Enye emi ɔkɔdɔŋde Mi:

⁴⁵ndien owo eke okutde Mi okut Enye emi ɔkɔdɔŋde Mi.

⁴⁶Mmedi nte uŋwana ke ererimbot, man owo ekededi eke ɔbuɔtde idem ye ami okusuk odu ke ekim.

⁴⁷Ndien edieke owo ekededi okopde mme ikɔ Mi, onyuŋ etrede ndimum mmɔ ŋkama, ami mbiereke ikpe nnɔ enye: koro ŋkedige ndibiere ikpe nnɔ ererimbot, edi ŋkedi ndinyaŋa ererimbot.

⁴⁸Owo eke esinde Mi, onyuŋ etrede ndibɔ ikɔ Mi nda, enyene andibiere-ikpe esie: ikɔ eke ŋketiŋde, kpa ikɔ oro edibiere ikpe ɔnɔ enye ke akpatre usen.

⁴⁹Koro Ami mmeŋketiŋke ŋkpɔ ke uyo Idem Mi; edi Ete emi ɔkɔdɔŋde Mi ke Idem Esie ɔkɔnɔ Mi item abaŋa se ŋkpɔdɔhɔde ye se ŋkpetiŋde.

⁵⁰Ndien mmɔfiɔk nte item Esie edi uwem nsinsi: mmɔdo mme ŋkpɔ eke etiŋde, ntiŋ kpa nte Ete ɔkɔnɔde Mi uyo.