Read efik JOHN 18 Bible Online

JOHN 18 - efik bible

JOHN 18

¹KE Jesus ama eketiŋ ikɔ emi, Enye asaŋa ye mbet Esie ɔwɔrɔ ekebe ke ɔwɔwɔ Kidron, okosim ebiet emi iŋwaŋ mfri odude; ndien Enye oduk ke esit ye mbet Esie.

²Judas ŋko-ŋko, emi adade Enye ɔnɔ, ɔfiɔk ebiet oro: koro Jesus awakde ndika do ye mbet Esie.

³Mmɔdo ke ini Judas ama ɔkɔbɔ udim mbonekɔŋ ye mme asaŋutom ke ubɔk ikpɔ oku ye mme Pharisee, enye asaŋa ye utuenkaŋ ye nsaraŋikaŋ ye ŋkpɔ eŋwan edi ke ɔtɔ oro.

⁴Sia Jesus ɔfiɔkde kpukpru se iyomde ndisim Enye, Enye ɔwɔrɔ edi, edibup mmɔ, Mbufo eyom anie?

⁵Mmɔ ebɔrɔ enye ete, Iyom Jesus-a-Nazareth. Jesus ete mmɔ, Ami ndi Enye. Judas ŋko, emi adade Enye ɔnɔ, mɔdo, ada ye mmɔ.

⁶Ntem ke ini Jesus ɔdɔhɔde mmɔ ete, Ami ndi Enye, mmɔ ekibe efiak edem ekeduɔŋɔ ke isɔŋ.

⁷Ntre ke Jesus ɔtɔŋɔ ntak obup mmɔ ete, Mbufo eyom anie?

⁸Mmɔ ete, Iyom Jesus-a-Nazareth. Jesus ɔbɔrɔ ete, Mmɔdɔdɔhɔ mbufo nte, Ami ndi Enye. Ntem edieke mbufo eyomde Mi, eyak mmɔ emi enyɔŋɔ eke mmɔ.

⁹Enye eketiŋ ntem man ɔwɔrɔ osu nte enye ɔkɔdɔhɔde ete, Baba kiet ke otu mmɔ emi Afo ɔkɔnɔde Mi ikatakke Mi.

¹⁰Ekem Simon Peter emi akamade ofut adabare enye ekpi ofin akwa oku, onyuŋ osibe enye utɔŋ nnasia. Enyiŋ owo oro ekere Malchus.

¹¹Jesus ete Peter, Sin ofut ke efɔk; nte ndiŋwɔŋke cup emi Ete Mi ɔkɔnɔde Mi?

¹²Ntre ke udim oro ye akamba etubom mmɔ ye mme asaŋutom mme Jew emum Jesus ebɔp,

¹³eda Enye ebem iso eka ke ɔtɔ Annas; koro enye edi ete ŋwan Caiaphas, emi edide akwa oku ke isua oro.

¹⁴Caiaphas edi owo emi ɔkɔnɔde mme Jew item ete, Ɔfɔn owo kiet ndikpa ke ibuot mbio-obio.

¹⁵Simon Peter etiene Jesus, mbet efen onyuŋ anam kpa ntre. Mbet oro edi owo emi akwa oku ɔdiɔŋɔde, enye onyuŋ asaŋa ye Jesus oduk ke esit okure akwa oku: edi Peter ada ke inua-otop ke aŋwa.

¹⁶Ntre ke mbet eken oro akwa oku ɔdiɔŋɔde ɔwɔrɔ eketiŋ ŋkpo ye ŋwan emi etiede usuŋ, onyuŋ ada Peter oduk.

¹⁷Ntem ke eyen-aŋwan emi etiede usuŋ obup Peter ete, Nte afo nde edi kiet ke otu mbet owo emi? Peter ete, Ndige.

¹⁸Ndien ikɔt ufɔk ye mme asaŋutom eda ke ɔtɔ oro: ekabara ikaŋ ukaŋ, koro etuebede, mmɔ enyuŋ ewebe ikaŋ; Peter onyuŋ ada do ye mmɔ ewebe ikaŋ.

¹⁹Ntre ke akwa oku obup Jesus abaŋa mbet Esie ye se Enye ekpepde owo.

²⁰Jesus ɔbɔrɔ enye ete, Ami ŋketetiŋ ŋkpɔ nnɔ ererimbot aŋwa-aŋwa; ŋkɔnɔ ukpep-ŋkpɔ kpukpru ini ke synagogue ye ke temple, emi kpukpru mme Jew ekam edide edisobo do; ŋkonyuŋ ntiŋke baba ŋkpɔ kiet ke ndibe. Nsinam obupde Mi?

²¹Bup mmɔ emi ekopde ikɔ Mi, mme ntiŋ nso nnɔ mmɔ. Sese, mmɔ efiɔk se nsitiŋde.

²²Ndien ke ini Enye ɔdɔhɔde ntem, asaŋutom kiet emi adade ŋkpet-ŋkpet, oyibi Jesus ufia, ete, Nte ɔbɔrɔ akwa oku ikɔ ntre?

²³Jesus ɔbɔrɔ enye ete, Edieke ŋketiŋde se idiɔkde, wut idiɔk oro: edi edieke ŋketiŋde se inende, nsinam oyibide Mi?

²⁴Ntre ke Annas ɔnɔ Enye ye uruk eda esɔk Caiaphas akwa oku.

²⁵Edi Simon Peter osuk adada do ewebe ikaŋ. Ntre ke mmɔ ebup enye ete, Nte afo nde edi owo kiet ke otu mbet Esie? Enye akaŋ ete, Ndige.

²⁶Ofin akwa oku kiet, emi edide iman owo emi Peter okosibede enye utɔŋ, ete enye, Nte ŋkekwe fi ye Enye ke iŋwaŋ mfri?

²⁷Peter ɔtɔŋɔ ntak akaŋ: ndien idaha oro ekikɔ ɔkpok.

²⁸Ntem ke mmɔ eda Jesus ewɔrɔ ekpɔŋ Caiaphas, eka ke ufɔk andikara. Eyo ama esiere. Mmɔ ke idem mmɔ inyuŋ idukke ufɔk andikara mbak edisabare idem, ete idia passover.

²⁹Ndien Pilate ɔwɔrɔ edisobo ye mmɔ, onyuŋ obup ete, Mbufo etiŋ nso edian owo emi?

³⁰Mmɔ ɔbɔrɔ enye ete, Edieke owo emi mikpedige anam-idiɔk, nnyin ikpadaha Enye idisin fi ke ubɔk.

³¹Ntre ke Pilate ete mmɔ, Eda Enye ke idem mbufo ekekpe ikpe Esie, nte ibet mbufo asaŋade. Mme Jew ete enye, Nnyin inyeneke unen ndiwot owo;

³²man ikɔ nte Jesus eketiŋde owut oruk mkpa eke Enye edikpade osu.

³³Mmɔdo Pilate ɔtɔŋɔ ntak oduk ufɔk, onyuŋ okot Jesus, obup Enye ete, Nte afo edi edidem mme Jew?

³⁴Jesus ɔbɔrɔ ete, Nte afo etiŋ emi ke idem fo; mme mmɔ efen etiŋ emi enɔ fi ebaŋa Mi?

³⁵Pilate ɔbɔrɔ ete, Nte ndi Jew? Ikɔt Fo ye ikpɔ oku ekada Fi esin mi ke ubɔk: akanam nso?

³⁶Jesus ɔbɔrɔ ete, Obio Ubɔŋ Mi idige eke ererimbot emi: edieke Obio Ubɔŋ Mi ekpedide eke ererimbot emi, ikɔt Mi ekpe-ŋwana eŋwan, mbak ediyak Mi esin mme Jew ke ubɔk: edi Obio Ubɔŋ Mi itoho do.

³⁷Ntem Pilate obup Enye ete, Nte Afo edi edidem naŋa? Jesus ɔbɔrɔ ete, Omotim etiŋ ete ndi Edidem. Nkamana kabaŋa ntak emi, ŋkonyuŋ nduk ke ererimbot kabaŋa ŋkpɔ emi, man ndi ntiense nnɔ akpanikɔ. Kpukpru mmɔ eke edide eke akpanikɔ, ekop uyo Mi.

³⁸Pilate ete Enye, Nsidi akpanikɔ? Ndien ke enye ama eketiŋ ntem, enye ɔtɔŋɔ ntak ɔwɔrɔ etiene mme Jew, ɔkɔdɔhɔ mmɔ ete, Ami ŋkwe Enye idiɔk ke idem.

³⁹Edi mbufo emenyene ido, ete nsana owo kiet nyak nnɔ mbufo ke passover. Nte eyoyom nsana naŋa Edidem mme Jew nyak nnɔ mbufo?

⁴⁰Mmɔ etɔŋɔ ntak efiori ete, Nnyin iyomke owo emi; iyom Barabbas. Ndien Barabbas edi owo ŋwo.