Read efik JOHN 3 Bible Online

JOHN 3 - efik bible

JOHN 3

¹OWO mme Pharisee kiet okodu, emi ekerede Nicodemus, ɔbɔŋ mme Jew.

²Owo emi etiene Jesus ke okoneyo ɔkɔdɔhɔ Enye ete, Rabbi, nnyin imɔfiɔk ite Afo edi Andikpep emi Abasi osiode ɔdɔŋ; koro baba owo kiet ikemeke ndinam mme idiɔŋɔ emi Afo ananam, ibɔhɔke Abasi odu ye enye.

³Jesus ɔbɔrɔ enye ete, ke akpanikɔ ke ndɔhɔ fi nte, Edieke owo mitɔŋɔke ntak imana, enye ikemeke ndikut Obio Ubɔŋ Abasi.

⁴Nicodemus ɔdɔhɔ Enye ete, Owo edikeme didie ndimana ke ini enye ama ɔkɔsɔŋ? nte enye ekeme nditɔŋɔ ntak nduk ke idibi eka esie nnyuŋ mmana? Jesus ɔbɔrɔ ete,

⁵Ke akpanikɔ ke ndɔhɔ fi nte, Edieke owo mimanake oto ke mmɔŋ ye Spirit, enye ikemeke ndiduk ke Obio Ubɔŋ Abasi.

⁶Se itode ke obukidem imana edi obukidem: se inyuŋ itode ke Spirit imana edi spirit.

⁷Kuyik ke emi ndɔhɔde fi nte, mbufo enyene nditɔŋɔ ntak mmana.

⁸Ofim ofime ɔtɔ nte amama, ndien afo okop uyom esie, edi ufiɔkke ebiet enye oto, ye ebiet enye aka:

⁹ntre ke edi ye kpukpru owo eke etode ke Spirit emana. Nicodemus ɔbɔrɔ Enye ete, Ŋkpɔ emi ekeme didie ndiwɔrɔ?

¹⁰Jesus ɔbɔrɔ enye ete, Nte afo edi anditeme owo efen ke Israel, ndien ufiɔkke mme ŋkpɔ emi?

¹¹Ke akpanikɔ ke ndɔhɔ fi, nnyin itiŋ se ifiɔkde inyuŋ itie ntiense ibaŋa se ikokutde; edi mbufo ibɔhɔ ikɔ ntiense nnyin.

¹²Edieke ŋketiŋde ŋkpɔ isɔŋ nnɔ mbufo ndien mbufo minimke ke akpanikɔ, didie ke mbufo edinim ke akpanikɔ ke mma ntiŋ ŋkpɔ enyɔŋ nnɔ mbufo?

¹³Ndien baba owo kiet ikɔdɔkke ikoduk ke heaven, ke mibɔhɔke Enye emi okotode ke heaven ɔsuhɔre edi, kpa Eyen Owo emi odude ke heaven.

¹⁴Ndien kpa nte Moses ekemende urukikɔt ke enyɔŋ ke desert, kpa ntre ke ana nte edimen Eyen Owo ke enyɔŋ:

¹⁵man owo ekededi eke ɔbuɔtde idem ye Enye enyene nsinsi uwem.

¹⁶Koro Abasi akamama erimbot ntem, tutu Enye osio ikpɔŋ-ikpɔŋ Eyen emi Enye obonde ɔnɔ, man owo ekededi eke ɔbuɔtde idem ye Enye okutak, edi enyene nsinsi uwem.

¹⁷Koro Abasi ikɔdɔŋke Eyen Esie ke ererimbot ete ekpe ikpe ererimbot, edi ɔkɔdɔŋ, man enyaŋa ererimbot oto ke Enye.

¹⁸Owo eke ɔbuɔtde idem ye Enye ikaha ikpe; ema ekekpe ikpe owo eke mibuɔtke idem ye Enye ema, koro enye mibuɔtke idem ke enyiŋ Edibon Eyen Abasi kierakiet.

¹⁹Ndien emi edi ke ererimbot, edi owo emama ekim ekan uŋwana; koro utom mmɔ ɔdiɔkde.

²⁰Koro kpukpru owo eke enamde idiɔk esasua uŋwana, inyuŋ iwɔrɔke idi ke uŋwana, mbak edibiom se mmɔ enamde.

²¹Edi owo eke anamde se idide akpanikɔ ɔwɔrɔ edi ke uŋwana, man eyarare utom esie, ete, enye etie ke Abasi ananam mmɔ.

²²Ke ŋkpɔ emi ema ekebe, Jesus ye mbet Esie eka ke isɔŋ Judaea; onyuŋ etie do ye mmɔ, onim baptism.

²³John ŋko onyuŋ onim baptism ke Aenon emi ekperede Salim, koro mmɔŋ awakde do: ndien mme owo eka do ekana baptism.

²⁴Koro ikesinke John kaŋa ke ufɔk-ŋkpɔkɔbi.

²⁵Ekem eneni otibe ke ofuɔt mbet John ye Jew kiet abaŋa ŋkeŋ-idem.

²⁶Ntre ke mmɔ etiene John ekɔdɔhɔ enye ete, Rabbi, Owo oro okodude ye afo ke edem Jordan oko, emi afo okonyuŋ etiede ntiense abaŋa Enye, Sese, Enye ke onim baptism, kpukpru owo enyuŋ etiene Enye.

²⁷John ɔbɔrɔ ete, Owo ikemeke ndinyene baba ŋkpɔ kiet, ibɔhɔke Abasi etie ke heaven ɔnɔ enye.

²⁸Mbufo ke idem mbufo edi ntiense enɔ mi, ete, mmɔdɔhɔ nte, ami ndige Christ, edi edɔŋ mi mbem Enye iso.

²⁹Enyene-aŋwan-ndɔ edi ebe-ŋwan: edi ufan ebeŋwan, emi adade da okop enye uyo, adara eti-eti ndikop uyo ebeŋwan: ntem ke idara mi emi ama akabare ɔyɔhɔ.

³⁰Enye enyene ndidiɔŋ ŋkpon ŋka iso, edi ami nnyene ndidiɔŋ ŋkabare ŋkpri.

³¹Enye emi otode ke enyɔŋ akan kpukpru owo: owo eke otode ke isɔŋ edi owo-isɔŋ, onyuŋ osio ŋkpɔ ke isɔŋ etiŋ: enye emi otode ke heaven akan kpukpru owo.

³²Se Enye okokutde onyuŋ okopde, ke Enye etiŋ nte ntiense abaŋa; ndien baba owo kiet idaha ikɔ ntiense Esie.

³³Owo emi akadade ikɔ-ntiense Esie ekesin ubɔk etiense owut ete Abasi edi akpanikɔ.

³⁴Koro Enye emi Abasi okosiode ɔdɔŋ etiŋ ikɔ Abasi: koro Abasi idomoke domo Spirit inɔ Enye.

³⁵Ete amama Eyen, omonyuŋ ayak kpukpru ŋkpɔ esin Enye ke ubɔk.

³⁶Owo eke ɔbuɔtde idem ye Eyen enyene nsinsi uwem; edi owo eke mibuɔtke idem ye Eyen idikwe uwem, edi iyaresit Abasi osuk ɔkɔbɔ enye.