Read efik JOHN 4 Bible Online

JOHN 4 - efik bible

JOHN 4

¹EKEM ke adaŋemi Ɔbɔŋ ɔfiɔkde ete mme Pharisee ekop ete Jesus ke anam mme owo edi mbet onyuŋ onim mmɔ baptism, akan John

²(okposuk edi nte Jesus ke Idem Esie minimke baptism, edi edide mbet Esie enim),

³Enye ɔkpɔŋ Judaea, afiak ɔnyɔŋ ke Galilee.

⁴Edi ana nte Enye asaŋa ke Samaria ebe.

⁵Ntre ke Enye edisim obio Samaria kiet emi ekerede Sychar, emi ekperede iŋwaŋ oro Jacob ɔkɔnɔde Joseph eyen esie:

⁶obube-mmɔŋ Jacob onyuŋ odu do. Ndien sia Jesus okopde mba ɔnɔ isaŋ, Enye ɔsuhɔre etetie do ntem ke mben obube-mmɔŋ: ekpere ufɔt uwem-eyo.

⁷Ŋwan-a-Samaria kiet edi ndikoi mmɔŋ.

⁸Jesus ete enye, Nɔ Mi mmɔŋ ŋŋwɔŋ. Koro mbet Esie ema edaha eka obio ekedep udia.

⁹Ŋwan-a-Samaria ete Enye, Afo emi edide Jew anam didie ebeŋe mi mmɔŋ, ke ini ndide ŋwan-a-Samaria? (Koro mme Jew misaŋake ŋkpɔ ye mbon Samaria)

¹⁰Jesus ɔbɔrɔ enye ete, Edieke afo ɔkpɔfiɔkde enɔ Abasi, ye owo emi obupde fi ete, Nɔ Mi mmɔŋ ŋŋwɔŋ, afo ekpebeŋe Enye, ndien Enye ɔkpɔnɔ fi odu-uwem mmɔŋ.

¹¹Ŋwan oro ete Enye, Ɔbɔŋ, unyeneke se adade okoi mmɔŋ, obube onyuŋ ɔtuŋɔ: ada odu-uwem mmɔŋ oro ndien ke mmɔŋ?

¹²Nte omokpon akan ete nnyin Jacob, emi ɔkɔnɔde nnyin obube emi, onyuŋ ɔŋwɔŋde mmɔŋ do ke idem esie, ye nditɔ esie, ye ufene esie?

¹³Jesus ɔbɔrɔ enye ete, Kpukpru owo eke eŋwɔŋde mmɔŋ emi eyetɔŋɔ ntak ekop nsat-itɔŋ:

¹⁴edi owo ekededi eke ɔŋwɔŋde mmɔŋ emi Ami ndinɔde enye idikopke nsat-itɔŋ aba: edi mmɔŋ oro ndinɔde enye eyekabare edi idim mmɔŋ ke esit esie eke otopde akabare ɔwɔrɔ edi nsinsi uwem.

¹⁵Ŋwan oro ete Enye, Ɔbɔŋ, nɔ mi mmɔŋ oro, man itɔŋ okusat mi, ami ŋkunyuŋ nsaŋa adaŋa usuŋ emi ndi ke ɔtɔ emi ndikoi mmɔŋ.

¹⁶Jesus ete enye, Ka kokot uberi, di ken.

¹⁷Ŋwan oro ɔbɔrɔ Enye ete, Nnyeneke ebe. Jesus ete enye, Emenen ndidɔhɔ ete, Nnyeneke ebe:

¹⁸koro ɔmɔdɔdɔ ebe ition, ndien owo emi odude ye enye idahemi idige uberi; etiŋ akpanikɔ ke ikɔ oro.

¹⁹Ŋwan oro ete Enye, Ɔbɔŋ, mmokut nte Afo edi prophet.

²⁰Mme ete nnyin ekam etuak ibuot enɔ Abasi ke obot emi; ndien mbufo ete, ebiet eke owo ekpetuakde ibuot enɔ Abasi odu ke Jerusalem.

²¹Jesus ete enye, Ŋwan owo, nim Mi ke akpanikɔ; ini ke edi, eke mbufo edituakde ibuot enɔ Ete, idige ke obot emi inyuŋ idige ke Jerusalem.

²²Mbufo etuak ibuot enɔ se mbufo mifiɔkke: nnyin ituak ibuot inɔ se ifiɔkde: koro erinyaŋa otode mme Jew.

²³Edi ini ke edi, omonyuŋ ededi ama, eke ata mme andituak ibuot edituakde ibuot enɔ Ete ke spirit ye ke akpanikɔ: koro edi mmɔ eke etiede ntem ke Ete oyom ete etuak ibuot enɔ Imɔ.

²⁴Abasi edi spirit: ndien mme andituak ibuot nnɔ Enye enyene ndituak ibuot ke spirit ye ke akpanikɔ.

²⁵Ŋwan oro ete Enye, Mmɔfiɔk nte Messiah (emi ekerede Christ) ɔmɔŋ ededi: ke ini Enye edide, Enye eyeŋwaŋade kpukpru ŋkpɔ ɔnɔ nnyin.

²⁶Jesus ete enye, Ami emi nneneme nneme mi ye afo ndi Enye.

²⁷Ekem ke ini oro mbet Esie eto edi; idem onyuŋ akpa mmɔ ndikut nte Enye enemede nneme ye ŋwan; edi ndomo owo mmɔ kiet ibukpe Enye ete, Oyom nso? mme, Nsinam enemede nneme ye enye?

²⁸Ntre ke ŋwan oro ɔkpɔŋ abaŋ esie, adaha oduk obio ɔkɔdɔhɔ mbio-obio ete,

²⁹Edi edise owo emi ekemende kpukpru se akananam nnamde etiŋ ɔnɔ mi; ndi Enye edi Christ?

³⁰Mmɔ ewɔŋɔ ke obio edi editiene Enye.

³¹Ke ufɔt ini oro mbet Esie ekpe ye Enye ete, Rabbi, di didia ŋkpɔ.

³²Edi Enye ete mmɔ, Mmenyene udia ndidia eke mbufo mifiɔkke.

³³Ntem ke mbet edɔhɔ kiet eken ete, Nte owo ekededi akada udia ɔsɔk Enye adia?

³⁴Jesus ete mmɔ, Udia Mi edi ndinam uduak Andidɔŋ Mi, nnyuŋ mma utom Esie.

³⁵Nte mbufo idɔhɔke ite, eyesuk ɔfiɔŋ inaŋ ndien osim ini ukpeŋe? Sese, mmɔdɔhɔ mbufo nte, Emenere enyin ese iŋwaŋ ete ŋkpɔ adat kesit ama, ekem ini ukpeŋe.

³⁶Kpa ke idaha emi andikpeŋe ukpeŋe ke ɔbɔ ŋkpɔ-eyen-utom, onyuŋ ataŋ mbuŋwum ɔnɔ nsinsi uwem; man andisuan mkpasip ye andikpeŋe ukpeŋe ekpadara ɔtɔ kiet.

³⁷Ŋke oro etopde ete, Owo kiet asuan mkpasip, owo efen ekpeŋe, ɔwɔrɔ osu ke ŋkpɔ emi.

³⁸Ami ŋkosio mbufo ndɔŋ nte ekpeŋe ukpeŋe ke ebiet eke mbufo mikanamke utom ke esit; owo eŋwen ekanam utom, ndien mbufo emeduk ke utom mmɔ.

³⁹Edi ediwak mbio Samaria emi etode ke obio oro ebuɔt idem ye Enye, oto ke ikɔ-ntiense oro ŋwan ɔnɔde ete, Enye etiŋ kpukpru se akananam nnamde ɔnɔ mi.

⁴⁰Ntem ke ini mbio Samaria esimde Enye, mmɔ ekpe ye Enye ete etie kaŋa ye mme imɔ: ndien Enye adaŋ do usen iba.

⁴¹Ediwak owo efen enyuŋ enim ke akpanikɔ oto ke ikɔ-inua Esie;

⁴²ndien mmɔ edɔhɔ ŋwan oro ete, Ke emi nnyin imonim ke akpanikɔ, idige koro afo eketiŋde, edi koro nnyin ima ikokop ke idem nnyin, inyuŋ ifiɔk ite, Owo emi edi Andinyaŋa ererimbot ke akpanikɔ.

⁴³Edi ke usen iba oro ema ekebe, Enye adaha do aka ke Galilee.

⁴⁴Koro Jesus ke Idem Esie edi ntiense ete, Ikɔmke prophet ŋkpɔ ke obio esiemɔ.

⁴⁵Ntre ke adaŋemi Enye osimde Galilee, mbon Galilee edara Enye koro mmɔ ema ekut kpukpru se Enye akanamde ke Jerusalem ke ini usɔrɔ; koro mmɔ nde ekam esika usɔrɔ.

⁴⁶Ntre ke Enye ɔtɔŋɔ ntak edi ke Cana ke Galilee, ke ebiet emi Enye akanamde mmɔŋ akabare edi wine do. Ndien ɔbɔŋ kiet odu do, emi eyen esie ɔdɔdɔŋɔ ke Capernaum.

⁴⁷Ke ini ɔbɔŋ emi okopde ete Jesus oto ke Judaea ebe edi ke Galilee, enye etiene Enye ekekpe ye Enye ete, Ɔsuhɔde edi edinam udɔŋɔ okure eyen imɔ; koro eyen imɔ oyomde ndikpa.

⁴⁸Ntre ke Jesus ɔdɔhɔ enye ete, Mbufo inimke ke akpanikɔ, ibɔhɔke ini ekut mme idiɔŋɔ ye mme utibe ŋkpɔ.

⁴⁹Ɔbɔŋ oro ete Enye, Ɔbɔŋ, suhɔre di, ke eyen mi mikpaha kaŋa.

⁵⁰Jesus ete enye, Nyɔŋ okuo; eyen fo ke odu uwem. Owo oro onim se Jesus ɔdɔhɔde enye ke akpanikɔ, onyuŋ adaha esie ɔnyɔŋ.

⁵¹Ndien nte enye ɔsuhɔrede asaŋa ke usuŋ ɔnyɔŋ, ikɔt esie edisobo ye enye, esian enye ete, ke eyen esie odu uwem.

⁵²Ntre ke enye obup mmɔ ini eke eyen ɔtɔŋɔde ndikop idem. Mmɔ ete, Mkpɔŋ, ke ɔyɔhɔ hour kiet ke uwemeyo, ufiopidem ɔkɔkpɔŋ enye.

⁵³Ntem ke ete eyen oro ɔfiɔk ete ke ekedi ini oro ke Jesus ɔkɔdɔhɔ imɔ ete, Eyen fo ke odu uwem: ndien enye ke idem esie onim ke akpanikɔ ye ofuri ufɔk esie.

⁵⁴Emi onyuŋ edi udiana-akpa idiɔŋɔ emi Jesus anamde ke ini Enye ama okoto ke Judaea edi ke Galilee.