Read efik JOHN 5 Bible Online

JOHN 5 - efik bible

JOHN 5

¹KE ŋkpɔ emi ema ekebe, usɔrɔ mme Jew edidu; ndien Jesus ɔdɔk aka Jerusalem.

²Edi mkpɔdiɔhɔ-mmɔŋ odu do ke Jerusalem, ekpere inua-otop erɔŋ; ekot enye ke usem Hebrew ete, Bethesda; inua-otop ition enyuŋ edu ke esit.

³Ata ediwak mbon udɔŋɔ, ye nnan, ye mbuŋɔ, ye mfumi, ena ke mme inua-otop oro.

⁴Koro angel Abasi esito ke enyɔŋ edi ke ini ke ini onyuŋ editimede mmɔŋ oro, ndien akpa owo udɔŋɔ emi ebemde iso oduk mmɔŋ oro eyekop nsɔŋidem.

⁵Owo kiet onyuŋ odu do emi mem-idem anamde enye isua edip ye efureta.

⁶Ke adaŋemi Jesus okutde enye anade do, onyuŋ ɔfiɔkde ete enye akana ntre anyan ini, Enye ete owo oro, Nte ɔdɔŋ fi ndikop nsɔŋidem?

⁷Owo mmem-idem ɔbɔrɔ Enye ete, Ɔbɔŋ, nnyeneke owo eke emende mi esin ke mkpɔdiɔhɔ-mmɔŋ kini etimerede mmɔŋ: edi nte ŋkaka, owo eŋwen ebem mi iso ɔsuhɔre.

⁸Jesus ete enye, Daha ke enyɔŋ, men mbri fo, saŋa.

⁹Ndien idahoro owo oro okop nsɔŋidem, onyuŋ emen mbri esie asaŋa.

¹⁰Ekedi sabbath ke usen oro. Ntre ke mme Jew edɔhɔ owo emi ekanamde udɔŋɔ okure enye, ete, Mfin edi sabbath; inenke fi ndikama mbri fo.

¹¹Edi enye ɔbɔrɔ mmɔ ete, Owo emi akanamde mi ŋkop nsɔŋidem ɔdɔhɔ mi ete, Men mbri fo, saŋa.

¹²Mmɔ ebup enye ete, Anie edi owo emi ɔkɔdɔhɔde fi ete, Men mbri fo saŋa?

¹³Edi owo emi udɔŋɔ okurede enye ifiɔkke Enye emi ɔkɔdɔhɔde enye ntem: koro Jesus ama adaha, sia otu owo edude ke ɔtɔ oro.

¹⁴Edikem Jesus okut enye ke temple, onyuŋ ɔdɔhɔ enye ete, Sese, omokop nsɔŋidem; kunam aba idiɔk-ŋkpɔ, mbak se idiɔkde ikan oko edisim fi.

¹⁵Owo oro adaha ɔkɔdɔhɔ mme Jew ete, ke edi Jesus akanam imɔ ikop nsɔŋidem.

¹⁶Ndien ke ntak emi mme Jew esin Jesus enyin, koro Enye akanamde ŋkpɔ emi ke sabbath.

¹⁷Edi Jesus ɔbɔrɔ mmɔ ete, Ete Mi ke ananam utom tutu osim emi,

¹⁸Ami ke nnyuŋ nnam. Ke ntak emi mme Jew edɔdiɔŋ eyom Enye ndiwot, itoho koro abiatde sabbath ikpɔŋ, edi oto koro Enye okotde Abasi, ete, Ete Imɔ, anam idem ukem ye Abasi.

¹⁹Ntre ke Jesus ɔbɔrɔ mmɔ ete, Ke akpanikɔ ke ndɔhɔ mbufo, Eyen ikemeke ndinam baba ŋkpɔ kiet ke Idem Esie, ke mibɔhɔke se okutde nte Ete anamde; koro ŋkpɔ ekededi eke Ete anamde, kpa oro ŋko ke Eyen onyuŋ etiene anam.

²⁰Koro Ete amama Eyen, omonyuŋ owut Enye kpukpru ŋkpɔ eke Enye ke Idem Esie anamde: Enye eyenyuŋ owut Eyen mme utom eke ekponde ekan emi, man enyene mbufo ndyɔ.

²¹Koro nte Ete anamde mme akpa-mkpa eset ɔnɔ mmɔ uwem, kpa ntre ke Eyen anam owo eke Enye amade odu uwem.

²²Ete inyuŋ ikpehe ikpe baba owo kiet, edi akayak kpukpru eribiere-ikpe esin Eyen ke ubɔk,

²³man kpukpru owo ekpono Eyen kpa nte mmɔ ekponode Ete. Owo eke mikponoke Eyen ikponoke Ete emi ɔkɔdɔŋde Enye.

²⁴Ke akpanikɔ ke ndɔhɔ mbufo, Owo eke ekopde uyo Mi, onyuŋ ɔbuɔtde idem ye Enye emi ɔkɔdɔŋde Mi, enyene nsinsi uwem, inyuŋ idukke ke ikpe, edi ama oto ke mkpa ebe oduk ke uwem.

²⁵Ke akpanikɔ ke ndɔhɔ mbufo, Ini ke edi, onyuŋ ededi ama, eke mme akpa-mkpa edikopde uyo Eyen Abasi, ndien mmɔ emi ekopde eyedu uwem.

²⁶Koro kpa nte Ete enyenede uwem ke Idem Esie, suk ntre ke Enye ɔkɔnɔ Eyen ndinyene uwem ke Idem Esie ŋko.

²⁷Enye omonyuŋ ɔnɔ Eyen odudu ndidi ebierikpe, koro Enye edide Eyen Owo.

²⁸Ekuyik ŋkpɔ emi, koro ini ke edi eke kpukpru mme andidu ke udi edikopde Enye uyo ewɔŋɔ edi;

²⁹mmɔ emi ekanamde se ifɔnde eyewɔŋɔ eduk ke eriset uwem, mmɔ emi ekanamde se idiɔkde eyenyuŋ ewɔŋɔ eduk ke eriset ikpe.

³⁰Ami ŋkemeke ndinam baba ŋkpɔ kiet ke Idem Mi: adaŋa nte ŋkopde ke mbiere ikpe; ndien ubiere-ikpe Mi edi edinen; koro mbineke uduak idem Mi, edi mbine uduak Andidɔŋ Mi.

³¹Edieke ntiede ntiense mbaŋa Idem Mi, ikɔ-ntiense Mi idige akpanikɔ.

³²Edi owo efen etie ntiense abaŋa Mi, ndien mmɔfiɔk nte ikɔ-ntiense eke enye etiŋde abaŋa Mi edi akpanikɔ.

³³Mbufo ekedɔŋ eka ke ɔtɔ John, enye ama onyuŋ etie ntiense abaŋa akpanikɔ.

³⁴Edi mbɔhɔ baba owo kiet ikɔ-ntiense; edi ntiŋ ikɔ emi man enyaŋa mbufo.

³⁵John ekedi utuenikaŋ emi asakde onyiuŋ ayamade; mbufo ema enyuŋ enyime ndidara ke uŋwana esie ke ekpri ibio ini.

³⁶Edi Ami mmenyene ikɔ-ntiense emi okponde akan eke John; koro mme utom emi Ete ɔkɔnɔde Mi ete nnam, kpa utom emi nnanam, mmɔ enyuŋ edi ntiense enɔ Mi, ete, Ete okosio Mi ɔdɔŋ.

³⁷Ete emi ɔkɔdɔŋde Mi, Enye omonyuŋ edi ntiense ɔnɔ Mi. Akananam mbufo ikopke uyo Esie, inyuŋ ikwe mbiet Esie,

³⁸inyuŋ inyeneke ikɔ Esie nte osuk oduŋde ke esit mbufo, koro mbufo inimke Enye emi Ete ɔkɔdɔŋde ke akpanikɔ.

³⁹Mbufo eduŋɔre Ŋwed Abasi, koro mbufo esede ete mme imɔ imenyene nsinsi uwem ke esit; ndien edi enye edi ntiense ɔnɔ Mi.

⁴⁰Ndien mbufo inyimeke nditiene Mi, man enyene uwem.

⁴¹Mbɔhɔ ubɔŋ ke ubɔk owo,

⁴²edi mmɔdiɔŋɔ mbufo nte mbufo inyeneke ima Abasi ke esit mbufo.

⁴³Mmedi ke enyiŋ Ete Mi, ndien mbufo idarake Mi: owo efen ama edi ke enyiŋ esiemɔ, mbufo eyedara enye.

⁴⁴Mbufo edikeme didie ndinim ke akpanikɔ, kpa mbufo emi ebɔde ubɔŋ ke ubɔk kiet eken, ndien miyomke ubɔŋ eke otode ke Abasi kierakiet?

⁴⁵Ekuse ete Ami nyetiŋ ikɔ ndori mbufo ke iso Ete: owo kiet do emi odoride mbufo ikɔ, oro edi Moses emi mbufo edoride enyin ke enye.

⁴⁶Koro edieke mbufo ekponimde Moses ke akpanikɔ, mbufo ekponim Mi ke akpanikɔ koro enye ekewetde abaŋa Mi.

⁴⁷Edi edieke mbufo minimke se enye ewetde ke akpanikɔ, mbufo edinam didie enim ikɔ Mi ke akpanikɔ?