Read efik JOHN 7 Bible Online

JOHN 7 - efik bible

JOHN 7

¹KE ŋkpɔ emi ema ekebe, Jesus asaŋa ke Galilee; koro Enye minyimeke ndisaŋa ke Judaea, koro mme Jew eyomde Enye ndiwot.

²Edi usɔrɔ mme Jew ekpere, kpa usɔrɔ mme ataya.

³Ntre ke nditɔ eka Esie edɔhɔ Enye ete, Daha ke ɔtɔ emi, ka ke Judaea, man mbet Fo nde ekut mme utom eke Afo anamde.

⁴Koro baba owo kiet itiehe ke ndibe inam ŋkpɔ, ke ini enye oyomde ndidu ke iso owo aŋwa-aŋwa. Edieke anamde mme ŋkpɔ emi, yarare Idem wut ererimbot.

⁵Koro kpa nditɔ-eka Esie ibuɔtke idem ye Enye.

⁶Ntre ke Jesus ete mmɔ, Ini Mi ikemke kaŋa; eke mbufo ekekem kpukpru ini.

⁷Ererimbot ikemeke ndisua mbufo; edi asua Mi, koro Ami nditiŋde ikɔ-ntiense ndian enye nte, se enye anamde ɔdiɔk.

⁸Mbufo edɔk eka usɔrɔ: Ami ndɔkke kaŋa ŋka usɔrɔ emi; koro misimke kaŋa uyɔhɔ ini Mi.

⁹Ndien ke Enye ama ɔkɔdɔhɔ ntem ye mmɔ, Enye osuk etie kaŋa ke Galilee.

¹⁰Edi ke ini nditɔ-eka Esie ema ekɔdɔk eka usɔrɔ, ekem Jesus nde ɔdɔk aka; edi ikaha aŋwa-aŋwa, edi nte owo edidibe aka ŋkpɔ.

¹¹Ntem ke mme Jew eyom Enye ke usɔrɔ, enyuŋ ete, Enye odu mmɔŋ?

¹²Ndien akwa nsuk-uyo odu ke otu mme otu owo abaŋa Enye: ndusuk mmɔ ete, Enye edi eti owo; mmɔ eken ete, Idige: edi Enye ada mbio-obio awaha ɔkpɔŋ usuŋ.

¹³Edi baba owo kiet itiŋke ŋkpɔ ibaŋa Enye aŋwa-aŋwa ɔnɔ ndik mme Jew.

¹⁴Ekem ke ini osimde ufɔt usɔrɔ, Jesus ɔdɔk aka temple ekekpep mme owo ŋkpɔ.

¹⁵Ntem ke mme Jew eyik ete, Owo emi asaŋa didie ɔfiɔk ŋwed, ke ini akanam Enye mikpepke kpep?

¹⁶Jesus ɔbɔrɔ mmɔ ete, ukpep-ŋkpɔ eke nnɔde idige Okim, edi edi eke Andidɔŋ Mi.

¹⁷Edieke owo onyimede ndinam se Enye amade, owo oro eyefiɔk abaŋa se ŋkpepde, mme oto Abasi, mme Ami ntiŋ ikɔ oto Idem Mi.

¹⁸Owo eke etiŋde oto idem esie oyom ubɔŋ ɔnɔ idem esie; edi owo eke oyomde ubɔŋ andidɔŋ enye, owo oro edi akpanikɔ, ukwaŋido inyuŋ iduhe enye ke esit.

¹⁹Nte Moses ikɔnɔŋɔ mbufo ibet? ndien baba owo kiet ke otu mbufo inimke ibet.

²⁰Nsinam mbufo eyomde Mi ndiwot? Otu oro ebɔrɔ ete, Idat anam Fi; anie ke oyom Fi ndiwot?

²¹Jesus ɔbɔrɔ mmɔ ete, Ŋkanam utom kiet emi esinde idem akpa kpukpru mbufo.

²²Kabaŋa oruk utom emi ke Moses ɔkɔnɔ mbufo mbobi (edi mbobi itoho Moses, edi oto mme ete), ete, mbufo ekpenim owo mbobi ke sabbath.

²³Edieke owo anade mbobi ke sabbath mbak edibiat ibet Moses; nte mbufo eyat esit ye Ami, koro ŋkanamde owo okop uyɔhɔ nsɔŋidem ke sabbath?

²⁴Ekukpe ikpe nte etiede owo ke enyin, edi ekpe edinen ikpe.

²⁵Mmɔdo ndusuk ke otu mbio Jerusalem edɔhɔ ete, Nte idige owo emi ke eyom enye ndiwot?

²⁶Edi sese, Enye ɔdɔhɔ ikɔ aŋwa-aŋwa, mmɔ inyuŋ itiŋke baba ikɔ kiet inɔ Enye. Me ɔwɔrɔ ete ikpɔ owo eneŋere efiɔk ete owo emi edi Christ?

²⁷Edi nnyin imɔfiɔk ebiet emi owo emi otode: edi ke ini Christ edidie, baba owo kiet ifiɔkke ebiet emi Enye otode.

²⁸Ntre ke Jesus ofiori ke temple nte ekpepde owo ŋkpɔ, onyuŋ ɔdɔhɔ ete, Mbufo efiɔk Mi, enyuŋ efiɔk ebiet emi ntode; ndien ŋkedige ke odudu Idem Mi, edi Enye emi ɔkɔdɔŋde Mi edi ata Abasi, emi mbufo mifiɔkke.

²⁹Ami mmɔfiɔk Enye; koro ntode Enye, onyuŋ edi Enye ɔkɔdɔŋ Mi.

³⁰Ntem ke mmɔ eyom ndimum Enye: ndien baba owo kiet itukke Enye ubɔk, koro ini mikemke Enye kaŋa.

³¹Edi ediwak owo emi edude ke otu oro ebuɔt idem ye Enye: mmɔ enyuŋ edɔhɔ ete, Ke adaŋemi Christ edidide, nte Enye eyenam idiɔŋɔ eke ewakde ekan se owo emi akanamde?

³²Mme Pharisee ekop nte otu owo esukde uyo ebaŋa Enye ntem; ikpɔ oku ye mme Pharisee enyuŋ edɔŋ mme isuŋutom ete emum Enye.

³³Mmɔdo Jesus ete, Ke ekpri ibio ini kaŋa ndu ye mbufo, ndien ndinyɔŋ ntiene Enye emi ɔkɔdɔŋde Mi.

³⁴Mbufo eyeyom Mi, edi idikwe Mi; ɔtɔ nte Ami nnyuŋ ndude, mbufo ikemeke ndika do.

³⁵Ntre ke mme Jew eneme ke otu idem mmɔ ete, Owo emi edika mmɔŋ eke nnyin midikwe Enye? Mme Enye editiene mmɔ emi esuanade eduŋ ke otu mme Greek ekekpep mme Greek ŋkpɔ?

³⁶Nso idi ikɔ eke Enye etiŋde ntre ete, mbufo eyeyom Mi, edi idikwe Mi; ŋko, Ɔto nte Ami ndude, mbufo ikemeke ndika do?

³⁷Edi ke akpatre usen, usɔrɔ, Jesus adaha ofiori ete, Edieke owo ekededi okopde nsat-itɔŋ, yak enye etiene Mi ediŋwɔŋ.

³⁸Owo eke ɔbuɔtde idem ye Ami, nte Ŋwed Abasi ɔdɔhɔde, akpa odu-uwem mmɔŋ eyeto enye ke idem ɔwɔrɔ.

³⁹Enye ɔdɔhɔ emi abaŋa Spirit emi mmɔ emi ebuɔtde idem ye Enye edibɔde; koro ikɔnɔŋɔ Spirit kaŋa sia Jesus midukke kaŋa ke ubɔŋ.

⁴⁰Ke adaŋemi ndusuk mmɔ emi edude ke otu owo oro ekopde mme ikɔ emi, mmɔ ete, Owo emi edi prophet oro ke akpanikɔ.

⁴¹Mmɔ efen ete, Emi edi Christ. Edi ndusuk ete, Baba, nte Christ edito ke Galilee?

⁴²Nte Ŋwed Abasi idɔhɔke ite Christ oto ke oruk David, onyuŋ oto ke Bethlehem obio-iŋwaŋ emi David okodude do?

⁴³Ntre ke ubahare otibe ke ufɔt otu owo kabaŋa Enye.

⁴⁴Ndusuk mmɔ eyom ndimum Enye; edi baba owo kiet itukke Enye ubɔk.

⁴⁵Ntem ke mme isuŋutom etiene ikpɔ oku ye mme Pharisee; mmɔ oro enyuŋ ebup mmɔ ete, Nsinam mbufo midaha Enye idi?

⁴⁶Mme isuŋutom ebɔrɔ ete, Akananam owo itiŋke ikɔ nte owo emi.

⁴⁷Ntre ke mme Pharisee ebɔrɔ mmɔ ete, Nte mbufo ŋko emawaha ekpɔŋ usuŋ?

⁴⁸Nte baba owo kiet ke otu mbiowo mme ke otu mme Pharisee ɔkɔbuɔt idem ye Enye?

⁴⁹Ama edi otu owo eke mifiɔkke ibet, mmɔ edi mbukpo owo.

⁵⁰Nicodemus, owo kiet ke otu mmɔ, emi ekebemde iso edi edise Jesus, ɔdɔhɔ mmɔ ete, Nte ibet nnyin ebiere ikpe owo, ke ini mikopke kaŋa uyo esie, minyuŋ ifiɔkke se enye anamde?

⁵¹Mmɔ ebɔrɔ enye ete, Nte Afo ŋko oto ke Galilee?

⁵²Duŋɔre kokut ete, baba prophet kiet itoho ke Galilee iwɔrɔ.

⁵³Kpukpru mmɔ ewɔrɔ enyɔŋɔ ufɔk mmɔ kiet kiet.