Read efik JOHN 9 Bible Online

JOHN 9 - efik bible

JOHN 9

¹EKEM nte Jesus asaŋade ebe, Enye okut owo emi edide nnan toto ke emana.

²Ndien mbet Esie ebup Enye ete, Rabbi, anie akanam idiɔk-ŋkpɔ, ndi owo emi ke idem esie, mme edi ete ye eka esie, esin enye amana nnan?

³Jesus ɔbɔrɔ ete, Idige owo emi anam idiɔk-ŋkpɔ, inyuŋ idige ete ye eka esie enam; edi enye amana ntem, man utom Abasi akpayarare enye ke idem.

⁴Nnyin inyene ndinam utom Andidɔŋ Mi ke ini edide uwemeyo: ŋkut-eyo ke edi, eke baba owo kiet mikemeke ndinam utom ke esit.

⁵Adaŋa ini nte ndodu ke ererimbot, ndi uŋwana ererimbot.

⁶Ke ama ɔkɔdɔhɔ ntem, Enye ɔkɔk etap ke isɔŋ, ada etap oro anam mbat, onyuŋ eyet owo oro mbat ke enyin, ete enye,

⁷Ka keyet mmɔ ke mkpɔdiɔhɔ-mmɔŋ Siloam (emi ɔwɔrɔde ete, Enye emi ekɔdɔŋde). Owo oro aka ekeyet mmɔ, onyuŋ afiak edi okut usuŋ.

⁸Ntem ke mbɔhiduŋ owo oro, ye mmɔ eke ekebemde iso ekut ete enye edi ebeŋe-ebeŋe, edɔhɔ ete, Nte emi idige owo emi akam etiede ebeŋe ebeŋe? Mmɔ efen ete, Edi enye: mmɔ efen ete, Idige enye, edi ebiet enye.

⁹Owo oro ke idem esie ete, Ndi owo oro.

¹⁰Ntre ke mmɔ edɔhɔ enye ete, Esaŋa didie etat fi enyin?

¹¹Enye ɔbɔrɔ ete, Owo emi ekerede Jesus anam mbat ada eyet mi enyin, onyuŋ ɔdɔhɔ mi ete, Ke ke Siloam keyet mmɔ. Ntre ke ŋka ŋkeyet mmɔ, ŋkabare ŋkut usuŋ.

¹²Mmɔ ete, Enye odu mmɔŋ? Owo oro ete, mfiɔkke.

¹³Mmɔ eda owo oro ekedide nnan esɔk mme Pharisee.

¹⁴Ekedi ke sabbath ke Jesus anam mbat atat enye enyin.

¹⁵Ntem ke mme Pharisee etɔŋɔ ntak ebup owo oro adaŋa nte enye akasaŋade okut usuŋ. Enye ete mmɔ, Jesus akada mbat eyet mi enyin, ŋkonyuŋ nyet mmɔ, nnyuŋ ŋkut usuŋ.

¹⁶Mmɔdo ndusuk mme Pharisee edɔhɔ ete, Owo emi itoho Abasi, koro Enye minimke sabbath. Mmɔ efen ete, Owo emi edide anam-idiɔk ekeme didie ndinam oruk idiɔŋɔ eke etiede ntem? Ntre ke ubahare odu ke otu mmɔ.

¹⁷Mmɔ etɔŋɔ ntak edɔhɔ owo nnan, ete, Afo ɔdɔhɔ nso abaŋa Enye, sia Enye akatatde fi enyin? Owo oro ɔbɔrɔ ete, Enye edi prophet.

¹⁸Edi mme Jew inimke ke akpanikɔ ite owo oro ekedi nnan ndien akabare okut usuŋ, tutu mmɔ ekot ete ye eka owo oro ekenamde enye okut usuŋ edi;

¹⁹enyuŋ ebup mmɔ ete, Ndi owo emi edi eyen mbufo, emi mbufo edɔhɔde ete, enye akamana nnan?

²⁰Enye asaŋa didie okut usuŋ ke emi? Ete ye eka esie ebɔrɔ ete, Imɔfiɔk ite emi edi eyen nnyin, enye okonyuŋ amana nnan;

²¹edi nte enye akasaŋade okut usuŋ ke emi, nnyin ifiɔkke, inyuŋ ifiɔkke owo emi akatatde enye enyin: ebup enye; enye omokpon; enye eyetiŋ abaŋa idem esie.

²²Ete ye eka esie edɔhɔ ntem, koro mmɔ efehede mme Jew; koro mme Jew ema ekediomi ete, edieke owo onyimede ete Jesus edi Christ, iyebin owo oro isio ke synagogue.

²³Ke ntak oro ete ye eka esie edɔhɔ ete, Enye omokpon, ebup enye.

²⁴Ntre ke mme Jew etɔŋɔ ntak ekot owo oro ekedide nnan, ete enye, Men ubɔŋ nɔ Abasi; nnyin imɔfiɔk ite owo emi edi anam-idiɔk.

²⁵Owo oro ɔbɔrɔ ete, Mfiɔkke mme Enye edi anam-idiɔk. Mmɔfiɔk ŋkpɔ kiet, nte, ŋkedi nnan, edi mmotkut usuŋ ke emi.

²⁶Mmɔ ete enye, Enye akanam fi nso? Enye anam didie atat fi enyin?

²⁷Enye ɔbɔrɔ mmɔ ete, Mmetiŋ nnɔ mbufo idem idaha emi, edi mbufo ikopke: nsinam mbufo eyomde nditɔŋɔ ntak ŋkop? nte mbufo ŋko ke eyom ndikabare ndi mbet Esie?

²⁸Mmɔ esuŋi enye ete, Afo edi owo mbet Esie, edi nnyin idi mbet Moses.

²⁹Nnyin imɔfiɔk ite Abasi ekeneme nneme ye Moses; edi ama edi owo emi, nnyin ifiɔkke ebiet eke Enye otode.

³⁰Owo oro ɔbɔrɔ mmɔ ete, Se utibe ŋkpɔ do ndien. Mbufo ifiɔkke ebiet eke Enye otode, edi Enye ama atat mi enyin.

³¹Nnyin imɔfiɔk ite Abasi ikopke ebeŋe mme idiɔk owo: edi edieke owo eteŋede Abasi, onyuŋ anamde se Abasi amade, Enye okop ebeŋe owo oro.

³²Toto ererimbot ɔkɔtɔŋɔ, akananam nnyin ikopke ite owo atat enyin owo emi amanade nnan.

³³Edi nte ededi, edieke owo emi mikpotoho Abasi, Enye ikpekemeke ndinam ndomo ŋkpɔ kiet.

³⁴Mmɔ ebɔrɔ enye ete, Afo akamana ke idiɔk-ŋkpɔ ofuri-ofuri: nte afo ekpekpep nnyin ŋkpɔ ndien? Ntem ke mmɔ ebin enye eduɔk.

³⁵Jesus okop ete mmɔ ema ebin owo oro. Ntre ke ini Jesus okutde enye, Enye ete, Nte afo ɔmɔbuɔtidem ye Eyen Abasi?

³⁶Enye oro ɔbɔrɔ ete, ɔbɔŋ, Eyen Abasi edi anie man mbuɔtidem ye Enye?

³⁷Jesus ete enye, Afo omokut Enye, Enye emi enemede nneme ye afo onyuŋ edi Enye.

³⁸Owo oro ete, Mmɔbuɔt idem, Ɔbɔŋ; onyuŋ atuak ibuot ɔnɔ Jesus.

³⁹Ekem Jesus ɔdɔhɔ ete, Ami mma ndi ke ererimbot emi ndikpe ikpe nnɔ owo, man mmɔ eke mikwe ŋkpɔ ekpekut, mmɔ eke ekutde ŋkpɔ ekponyuŋ ekabare edi nnan.

⁴⁰Ndusuk mme Pharisee emi edude ye Enye ekop ikɔ emi, enyuŋ edɔhɔ Enye ete, Nte nnyin nde idi nnan?

⁴¹Jesus ete mmɔ, Edieke mbufo ekpedide nnan, mbufo ikpenyeneke idiɔk-ŋkpɔ: edi ke emi mbufo edɔhɔ ete, Imokut ŋkpɔ: idiɔk-ŋkpɔ mbufo osuk ododu.