Read efik UTOM MME APOSTLE 1 Bible Online

UTOM MME APOSTLE 1 - efik bible

UTOM MME APOSTLE 1

¹ŊKEBEM iso nnam mbuk, O Theophilus, mbaŋa kpukpru se Jesus ɔkɔtɔŋɔde ndinam nnyuŋ ŋkpep,

²tutu osim usen oro emende Enye edɔk ke enyɔŋ, ke Enye ama ɔkɔnɔ mme apostle emi Enye ekemekde item oto ke Edisana Spirit:

³Enye onyuŋ ada ediwak idiɔŋɔ owut mmɔ Idem Esie nte odu-uwem, ke mkpa Esie ama ekebe, owut mmɔ Idem usen aba, onyuŋ etiŋ ŋkpɔ abaŋa Obio Ubɔŋ Abasi.

⁴Ndien ke ini Enye osobode ɔtɔ kiet ye mmɔ, Enye ɔnɔ mmɔ uyo ete ekukpɔŋ Jerusalem, edi etie ebet se Ete ɔkɔŋwɔŋɔde ndinɔ; emi mbufo ekokopde ke inua Mi:

⁵Koro John akadade mmɔŋ onim baptism, edi eyenim mbufo baptism ke Edisana Spirit ke usen ifaŋ mibehe kaŋa.

⁶Mmɔdo, ke ini mmɔ ebonode ɔtɔ kiet, mmɔ ebup Enye ete, Ɔbɔŋ, nte Afo ɔmɔŋ ɔtɔŋɔ ntak ayak Obio Ubɔŋ ɔnɔ Israel ke emi?

⁷Enye ɔbɔrɔ mmɔ ete, Inaŋa inɔ mbufo ndifiɔk ini me eyo, eke Ete okonimde akama ke ubɔk Esiemɔ.

⁸Edi mbufo eyebɔ odudu, ke Edisana Spirit ama edi edidoro mbufo ke idem: mbufo eyenyuŋ edi mme ntiense Mi ke Jerusalem, ye ke ofuri Judaea ye Samaria, tutu osim utit ererimbot.

⁹Ndien ke Enye ama eketiŋ ikɔ oro ama, nte mmɔ esuk esede, emen Enye edɔk ke enyɔŋ; ndien ikpa-enyɔŋ ofuk Enye, mmɔ inyuŋ ikwe Enye aba.

¹⁰Ndien nte mmɔ esuk ewukde enyin ese enyɔŋ nte Enye ke ɔdɔdɔk, sese, owo iba, emi esinede mfia ɔfɔŋidem, eda ekpere mmɔ; mmɔ oro enyuŋ edɔhɔ ete,

¹¹Mbufo mbon Galilee, nsinam mbufo edade ese ikpa-enyɔŋ? Jesus emi, emi emende Enye ekpɔŋ mbufo eduk ke heaven, eyedi kpa ke ido emi mbufo ekutde Enye ɔnyɔŋde oduk ke heaven.

¹²Ekem mmɔ eto ke obot emi ekerede Olivet, emi eseherede ɔkpɔŋ Jerusalem isaŋ usen sabbath kiet, efiak edi ke Jerusalem.

¹³Ndien ke ini mmɔ edukde ufɔk, mmɔ edɔk eka ke ubet enyɔŋ ke ɔtɔ nduŋ mmɔ, kpa ɔtɔ nte Peter ye John ye James ye Andrew, ye Philip ye Thomas, ye Bartholomew ye Mathew, ye James eyen Alphaeus, ye Simon Zealot, ye Judas eyen James eduŋɔde do.

¹⁴Kpukpru mmɔ emi eda esit kiet edɔdiɔŋ eyire ke akam, ye iban oro, ye Mary eka Jesus, ye nditɔ eka Esie.

¹⁵Ekem ke mme usen oro Peter adaha ke enyɔŋ ke otu nditɔ-ete (otu owo emi ebonode ekpere owo ikie ye edip), onyuŋ ɔdɔhɔ ete, Nditɔ-ete, se ekewetde,

¹⁶kpa se Edisana Spirit akadade inua David ebem iso etiŋ abaŋa Judas, emi ekedide andida mme andimum Jesus usuŋ, enyene ndisu.

¹⁷Koro ema ebat enye esin ke otu nnyin, enye ama onyuŋ enyene udeme ke utom emi.

¹⁸(Owo emi ada utip ukwaŋido esie edep iŋwaŋ; ndien idem ofut enye, idibi esie onyuŋ asiaha, ndien ofuri nsia esie ewɔŋɔ.

¹⁹Kpukpru mme andiduŋ Jerusalem ekabare efiɔk ŋkpɔ emi; oro esin ekot iŋwaŋ oro ke usem mmɔ, ete, Akeldama, oro edi, Iŋwaŋ Iyip.)

²⁰Koro ewet ke ŋwed mme psalm, ete, Yak ebiet esie edi ndon, Owo okunyuŋ oduŋ ke esit: Ŋko-ŋko, Yak owo efen ada itie-utom esie.

²¹Mmɔdo ke otu mmɔ emi ekesaŋade ye nnyin ofuri ini emi Ɔbɔŋ

²²Jesus ododuk ɔwɔwɔŋɔ ke otu nnyin, tɔŋɔ ke baptism John tutu osim usen emi emende Enye edɔk ekpɔŋ nnyin, ke otu mmɔ emi owo kiet enyene nditiene nnyin ndi ntiense eriset Esie.

²³Ndien mmɔ esiak owo iba, Joseph emi ekerede Barsabbas, enyuŋ ekotde enye edian Justus ye Matthias.

²⁴Mmɔ enyuŋ ebɔŋ akam ete, Afo, ɔbɔŋ, emi ɔfiɔkde esit kpukpru owo, wut enye emi ekemekde ke otu owo iba emi,

²⁵ete ada itie-utom emi ye idaha apostle, emi Judas ɔkɔduɔde ɔkpɔŋ, man enye aka ke itie esiemo.

²⁶Ndien mmɔ esin afia ebaŋa mmɔ; afia onyuŋ ɔwɔrɔ Matthias; enyuŋ eda enye edian ye mme apostle duopekiet.