Read efik UTOM MME APOSTLE 10 Bible Online

UTOM MME APOSTLE 10 - efik bible

UTOM MME APOSTLE 10

¹OWO kiet okodu ke Caesarea emi ekerede Cornelius; enye edi centurion udim mbon-ekɔŋ emi ekerede eke Italy.

²Ndien enye edi owo emi eteŋede Abasi onyuŋ abakde Abasi ye ofuri ufɔk esie, onyuŋ ɔnɔde mme ubuene ediwak ŋkpɔ-mfɔn, onyuŋ ɔbɔŋde akam ɔnɔ Abasi kpukpru ini.

³Ke ini ekperede hour ita ke uwemeyo, enye otim okut ke ŋkukut nte angel odukde etiene enye, onyuŋ ɔdɔhɔde enye ete, Cornelius.

⁴Edi ke ini enye owukde enyin ese angel, ndik anam enye, enye onyuŋ ɔdɔhɔ ete, Nso, Ɔbɔŋ? Edi angel ɔdɔhɔ enye ete, Mkpe-ubɔk fo ye ŋkpɔ-mfɔn eke ɔnɔde mme ubuene ema edɔk edi ke iso Abasi, nte ŋkpɔ eke Enye adade eti fi.

⁵Dɔŋ owo eka Joppa ndien ekada Simon, emi ekotde ekedian Peter, edi:

⁶enye adaŋ ye Simon akwat-ikpa, emi ufɔk esie odude ke mben inyaŋ.

⁷Ekem ke adaŋemi angel emi ɔdɔhɔde enye ntem ama adaha, Cornelius okot nditɔ ufɔk esie iba, ye owo-ekɔŋ kiet emi eteŋede Abasi, ke otu mmɔ emi enamde ŋkpɔ enɔ enye kpukpru ini;

⁸ndien ke enye ama okobuk kpukpru ŋkpɔ emi ɔnɔ mmɔ, enye osio mmɔ ɔdɔŋ ke Joppa.

⁹Ke ndaŋ-nsiere, nte mmɔ esaŋade ke usuŋ, etɔŋɔ ndikpere obio, Peter ɔdɔk aka ke ɔkɔm ufɔk ndibɔŋ akam ke ekperede ufɔt uwemeyo:

¹⁰ndien enye okop biɔŋ, onyuŋ ɔdɔŋ enye ndidia ŋkpɔ; edi nte mmɔ etemde udia, etie enye nte esiode enye ke ikpɔkidem;

¹¹Enye onyuŋ okut nte enyɔŋ ɔkibɔrede, ye nte ŋkpɔ ɔsuhɔrede, eke ebietde akwa ɔfɔŋ, eke emumde ke utit mbinaŋ eyak enim ke isɔŋ;

¹²ndien kpukpru oruk unam ukot-inaŋ ye se inyɔnide ke isɔŋ ye mme inuen enyɔŋ edu ke esit.

¹³Uyo onyuŋ osim enye ete, Peter, daha ke enyɔŋ, wot, ta.

¹⁴Edi Peter ɔdɔhɔ ete, Baba, Ɔbɔŋ, koro akananam ntaha se misanake ye se ebetde ibet.

¹⁵Ndien uyo ɔtɔŋɔ ntak osim enye utim ikaba, ete, Kubat se Abasi anamde asana ke ibet.

¹⁶Enam ntem utim ikata: ndien ekot ŋkpɔ oro ini kiet edɔk ke enyɔŋ.

¹⁷Edi nte esit otimerede Peter abaŋa se ŋkukut oro enye okutde ɔwɔrɔde, sese, mme isuŋutom Cornelius ekeyom ufɔk Simon; enyuŋ eda ke enyin-usuŋ,

¹⁸emenere uyo ebup, mme Simon, emi ekotde ekedian Peter, adaŋ do.

¹⁹Edi nte Peter ekerede ŋkukut oro, Spirit ɔdɔhɔ enye ete, Sese, owo ita ke eyom fi.

²⁰Daha ke enyɔŋ, suhɔre, saŋa ye mmɔ, kunyuŋ uyik: koro edi Ami ŋdɔŋ mmɔ.

²¹Ndien Peter ɔsuhɔre etiene mmɔ, ete mmɔ, Sese, ami ndi owo emi mbufo eyomde: nsidi ntak eke mbufo edide?

²²Ndien mmɔ ete, Edisana angel eteme Cornelius centurion, emi edide eti owo onyuŋ abakde Abasi, emi onyuŋ ɔwɔrɔde eti etop ke ofuri oruk mme Jew, ete, enye ɔdɔŋ edikot fi edi ke ufɔk esie, onyuŋ okop ikɔ ke inua fo.

²³Ntre ke enye ɔdɔhɔ mmɔ eduk edi, onyuŋ ɔnɔ mmɔ itie emi edaŋde do. Ke ndaŋ-nsiere enye adaha asaŋa ye mmɔ aka, ndusuk nditɔ ete enyuŋ eto ke Joppa esaŋa ye enye.

²⁴Ndien ke ndaŋ-nsiere enye oduk ke Caesarea. Cornelius ke etie ebet mmɔ, enye ama onyuŋ okot iman esie ye ata mme ufan esie obon ɔtɔ kiet.

²⁵Edikem ke ini Peter odukde, Cornelius edisobo ye enye, onyuŋ ɔduɔ enye ke ukot, atuak ibuot ɔnɔ enye.

²⁶Edi peter emenere enye ete, Daha ke enyɔŋ; ami ke idem mi ndi owo.

²⁷Ndien nte mmɔ enemede ntem, Peter oduk ke ufɔk okut ediwak owo ebonode ɔtɔ kiet:

²⁸enye onyuŋ ɔdɔhɔ mmɔ ete, Mbufo ke idem mbufo emefiɔk ete ibet akpan owo emi edide Jew ndidian idem ndinyuŋ nsaŋa ŋkpere owo emi otode idut efen; edi Abasi okowut mi, ete, ŋkukot baba owo kiet obukpo me edidehe:

²⁹ntre ke ndi, mmemfaŋake, ke ini edɔŋde edikot mi ndi. Mmobup ndien nte, Nso idi ntak emi afo ɔdɔŋde edikot mi ndi?

³⁰Ndien Cornelius ɔdɔhɔ ete, Mfin adaŋemi anam usen inaŋ nte mbɔŋde akam ke ɔyɔhɔ hour ita uwemeyo ke ufɔk mi: ndien sese, owo emi esinede edisem ɔfɔŋidem ɔbiɔŋɔre mi ke iso, ete mi,

³¹Cornelius, ema ekop akam fo, enyuŋ eti ŋkpɔ mfɔn eke ɔnɔde mme ubuene ke iso Abasi.

³²Dɔŋ ndien eka Joppa ekokot Simon enɔ fi, emi ediande enyiŋ Peter; enye adaŋ ke ufɔk Simon akwat-ikpa ke mben inyaŋ.

³³Mmɔdo idaha oro ndɔŋ ebine fi; ndien omotim anam emi ama edi. Mmɔdo ke emi kpukpru nnyin idu mi ke iso Abasi, man ikop kpukpru se Jehovah ɔdɔhɔde fi etiŋ.

³⁴Ndien Peter atat inua esie ete,

³⁵Ke akpanikɔ mmokut nte Abasi iteŋeke owo enyin: edi ke kpukpru idut Enye adadara owo ekededi eke abakde Enye onyuŋ anamde nti ido.

³⁶Enye ɔkɔnɔ ikɔ Esie esɔk nditɔ Israel, ke erikwɔrɔ gospel emem emi Jesus Christ ɔkwɔrɔde, emi edide Ɔbɔŋ kpukpru owo;

³⁷mbufo emefiɔk nte etop oro ɔtɔŋɔde ke Galilee asuana osim ke ofuri Judaea, ke baptism emi John ɔkwɔrɔde ama ekebe, ete

³⁸Abasi okonim Jesus eyen Nazareth ke Edisana Spirit ye odudu, man enye asaŋa ke ebiet ke ebiet anam ufɔn ɔnɔ owo, onyuŋ anam kpukpru mmɔ emi Satan ɔtuhɔrede ekop nsɔŋidem; koro Abasi odude ye Enye.

³⁹Nnyin inyuŋ idi mme ntiense kpukpru ŋkpɔ eke Enye akanamde ke isɔŋ mme Jew ye ke Jerusalem; edi mmɔ ekɔŋ Enye ke eto ewot.

⁴⁰Abasi anam Enye eset ke mkpa ke ɔyɔhɔ usen ita,

⁴¹onyuŋ ɔnɔ Enye ete owut Idem, idige ke enyin kpukpru owo edi ke enyin mme ntiense emi Abasi ekebemde iso emek, oro edi nnyin, emi ikadiade inyuŋ iŋwɔŋde ŋkpɔ ye Enye ke Enye ama ekeset ke mkpa.

⁴²Abasi onyuŋ ɔnɔ nnyin uyo ete ikwɔrɔ inɔ mbio-obio, inyuŋ idi ntiense ite Emi edi Enye emi Abasi okonimde ete edi Ebierikpe ɔnɔ mme odu-uwem ye mme akpa-mkpa.

⁴³Kpukpru mme prophet eketiŋ ikɔ nte ntiense ebaŋa Enye, ete, owo ekededi eke ɔbuɔtde idem ye Enye eyebɔ erifen mme idiɔk-ŋkpɔ ke enyiŋ Esie.

⁴⁴Ke adaŋemi Peter osuk etiŋde ntem, Edisana Spirit ɔduɔ odoro kpukpru mmɔ emi ekopde ikɔ Abasi ke idem.

⁴⁵Ndien idem akpa kpukpru mbon mbobi emi enimde ke akpanikɔ, emi ekesaŋade ye Peter edi, koro eŋwaŋade Edisana Spirit enɔ mme Gentile ŋko.

⁴⁶Koro mmɔ ekopde nte mmɔ oro esemde nsio-nsio usem, enyuŋ etorode Abasi.

⁴⁷Ekem Peter obup ete, Nte owo ekededi ekeme ndikpan ete ekuda mmɔŋ enim mmɔ baptism, sia mmɔ ema ekɔbɔ Edisana Spirit kpa nte nnyin?

⁴⁸Ndien enye ɔnɔ uyo ete enim mmɔ baptism ke enyiŋ Jesus Christ. Ekem mmɔ ebeŋe enye ete tie ye mmimɔ ndusuk usen.