Read efik UTOM MME APOSTLE 11 Bible Online

UTOM MME APOSTLE 11 - efik bible

UTOM MME APOSTLE 11

¹EDI mme apostle ye nditɔ-ete eke edude ke Judaea ekop ete mme Gentile nde ebɔ ikɔ Abasi.

²Edi ke ini Peter ɔdɔkde edi ke Jerusalem, mmɔ emi eyirede mbobi eneni eneni ye enye,

³Afo omoduk ufɔk owo emi minaŋa mbobi akadia ŋkpɔ ye mmɔ.

⁴Edi Peter ɔtɔŋɔ ke eritɔŋɔ otim atat ŋkpɔ oro ɔnɔ mmɔ ke itie ke itie,

⁵ete, Ŋkodu ke obio Joppa mbɔŋ akam: ndien etie mi nte esiode mi ke ikpɔhidem, ami nnyuŋ ŋkut ŋkukut; ŋkut ŋkpɔ kiet ɔsuhɔrede, ebiet akwa ɔfɔŋ, eke emumde ke utit mbinaŋ, eyak oto ke enyɔŋ ɔsuhɔre; ndien enye edisim mi;

⁶Ndien ke ini ŋwukde enyin nse enye, ŋkere nnyuŋ ŋkut mme unam obot eke enyenede ukot inaŋ ye mme unam ikɔt, ye se inyɔnide ye mme inuen enyɔŋ.

⁷Nnyuŋ ŋkop uyo ɔdɔhɔde mi ete, Daha ke enyɔŋ Peter; wot, ta.

⁸Edi ndɔhɔ nte, Baba, Ɔbɔŋ: koro se misanake ye se ebetde ibet akanam idukke mi inua.

⁹Edi uyo oto ke enyɔŋ ɔtɔŋɔ ntak ɔbɔrɔ ete, Kubat se Abasi anamde asana ke ibet.

¹⁰Enam emi utim ikata: ndien ekot kpukpru edɔk ke enyɔŋ.

¹¹Ndien sese, kpa idem idaha oro, owo ita eda ke enyin-usuŋ ufɔk emi nnyin idude ke esit; ekɔdɔŋ mmɔ eto ke Caesarea etiene mi.

¹²Edi Spirit ɔnɔ mi uyo, ete, nsaŋa ye mmɔ, ŋkusat owo. Nditɔ-ete itiokiet emi esaŋa ye ami;

¹³nnyin inyuŋ iduk ufɔk owo oro: ndien enye obuk ɔnɔ nnyin nte enye okokutde angel adade ke ufɔk esie, emi ɔdɔhɔde enye ete, Dɔŋ eka ke Joppa ekeda Simon, emi ekotde ekedian Peter, edi;

¹⁴enye eyemen ikɔ eke edinyaŋade fi ye ofuri ufɔk fo etiŋ ɔnɔ fi.

¹⁵Edi nte ntɔŋɔde nditiŋ ikɔ, Edisana Spirit ɔsuhɔre odoro mmɔ ke idem, kpa nte okodorode nnyin ke akpa.

¹⁶Ndien nti ikɔ Ɔbɔŋ nte Enye ɔdɔhɔde ete, John akada mmɔŋ onim owo baptism; edi eyenim mbufo baptism ke Edisana Spirit.

¹⁷Mmɔdo edieke Abasi ɔnɔde mmɔ kpa oruk enɔ emi Enye ɔkɔnɔde nnyin ke adaŋemi nnyin inimde Ɔbɔŋ Jesus Christ ke akpanikɔ, ami ndi anie nte ŋkpɔbiɔŋɔde Abasi?

¹⁸Edi ke ini mmɔ ekopde ŋkpɔ emi, mmɔ edop uyo, enyuŋ enɔ Abasi itoro, ete, Ama edi ntre ndien, Abasi ayak mme Gentile ŋko ekabare esit eduk uwem.

¹⁹Mmɔdo mmɔ eke esuanade ke ntak ukut emi ɔtɔŋɔde ke ikɔ Stephen esaŋa tutu esim Phoenicia, ye Cyprus ye Antioch, edi mmɔ ikwɔrɔke ikɔ inɔ baba owo kiet ke mibɔhɔke mme-Jew ikpɔŋ.

²⁰Edi ke ini ndusuk mmɔ eke edide mbon Cyprus ye Cyrene ema edi ke Antioch, mmɔ etiŋ ikɔ enɔ mme Greek ŋko, enyuŋ ekwɔrɔ Ɔbɔŋ Jesus.

²¹Ndien ubɔk Ɔbɔŋ odu ye mmɔ: ediwak owo emi enimde ke akpanikɔ enyuŋ ekabare etiene Ɔbɔŋ.

²²Edi etop mmɔ osim utɔŋ mbon ufɔk Abasi emi edude ke Jerusalem: mmɔ enyuŋ edɔŋ Barnabas edisaŋa tutu osim Antioch:

²³ndien ke adaŋemi enye akade onyuŋ okutde mfɔn Abasi, enye adat esit; onyuŋ ekpe ye mmɔ kpukpru ete mmɔ eda iwukesit ediana ye Ɔbɔŋ:

²⁴koro enye edide eti owo, Edisana Spirit ye mbuɔtidem enyuŋ eyɔhɔ enye ke idem: ndien ediwak owo ediana ye Ɔbɔŋ.

²⁵Edi enye adaha aka Tarsus okoyom Saul:

²⁶ndien ke ini okutde enye, ada enye edi ke Antioch. Ntre ke mmɔ ebono ye ufɔk Abasi ke ofuri isua kiet, enyuŋ ekpep ediwak owo ŋkpɔ. Ndien ebem iso esio mbet enyiŋ Christian ke Antioch.

²⁷Edi ke mme usen oro mme prophet eto ke Jerusalem esuhɔre edi ke Antioch.

²⁸Ndien owo mmɔ kiet, emi ekerede Agabus, adaha ke enyɔŋ ada odudu Spirit ayarare ete akamba akaŋ ɔmɔŋ odu ke ofuri ererimbot; akaŋ emi osu ke eyo Claudius.

²⁹Ndien mbet eduak nditibe ŋkpɔ, adaŋa nte ukeme mmɔ kiet kiet edide, nnɔ esɔk nditɔ-ete emi eduŋde ke Judaea;

³⁰mmɔ enyuŋ enam ntem, enɔ enɔ mmɔ ke ubɔk Barnabas ye Saul esɔk mbiowo.