Read efik UTOM MME APOSTLE 13 Bible Online

UTOM MME APOSTLE 13 - efik bible

UTOM MME APOSTLE 13

¹MME prophet ye mme anditeme edu ke ufɔk Abasi ke Antioch, Barnabas, ye Simeon emi ekerede Niger, ye Lucius owo Cyrene, ye Manaen emi ekebɔkde ye Herod tetrarch, ye Saul.

²Edi nte mmɔ enamde ŋkpɔ enɔ Ɔbɔŋ, enyuŋ etrede udia, Edisana Spirit ɔdɔhɔ mmɔ ete, Edianare Barnabas ye Saul enɔ Mi, man mmɔ enam utom oro ŋkokotde mmɔ nnɔ.

³Ekem ke mmɔ ema eketre udia enyuŋ ebɔŋ akam, enyuŋ edori mmɔ ubɔk, eyak mmɔ eka.

⁴Ntre ke ini Edisana Spirit osiode mmɔ ɔdɔŋ, mmɔ esuhɔre eka Seleucia, enyuŋ eto do ewat eka ke Cyprus.

⁵Ndien ke ini mmɔ edude ke Salamis, mmɔ ekwɔrɔ ikɔ Abasi ke mme synagogue mme Jew: mmɔ enyuŋ enyene John nte asaŋutom mmɔ.

⁶Ke mmɔ ema ekesaŋa ke ofuri isuo esim Paphos, mmɔ ekut abia-idiɔŋ kiet, prophet abiaŋa, owo Jew emi enyiŋ esie ekerede Bar-Jesus;

⁷ndien enye odu ye Sergius Paulus andikara, enyene-ibuot owo. Andikara emi okot Barnabas ye Saul edi, ete iyom ndikop ikɔ Abasi.

⁸Edi Elymas abia-idiɔŋ oro (koro enyiŋ esie ɔwɔrɔ ntre) ɔbiɔŋɔ mmɔ, aŋwana ndinam andikara ɔwɔŋɔre ɔkpɔŋ akpanikɔ.

⁹Edi Saul, emi onyuŋ ekerede Paul, ɔyɔhɔ ye Edisana Spirit, owuk enyin ese Elymas, onyuŋ ɔdɔhɔ ete,

¹⁰O afo, emi kpukpru abiaŋa ye idiɔk-ŋkpɔ ɔyɔhɔde fi ke idem, afo eyen Satan, afo usua kpukpru nti ido, nte afo udutreke ndikwaŋa edinen usuŋ Ɔbɔŋ?

¹¹Ndien ke emi, sese, ubɔk Ɔbɔŋ odoro fi ke idem, afo eyenyuŋ edi nnan, udunyuŋ ukwe utin kaŋa. Idaha oro ekim ofuk enye; enye onyuŋ asaŋa oyo, oyom owo eke omumde enye ubɔk asaŋa.

¹²Ke ini andikara okutde se itibede, enye onim ke akpanikɔ, idem onyuŋ akpa enye ke ukpep-ŋkpɔ Ɔbɔŋ.

¹³Ekem Paul ye mme nsaŋa esie esio ekpɔŋ Paphos, edi ke Perga emi odude ke Pamphylia: edi John ɔkpɔŋ mmɔ afiak ɔnyɔŋ ke Jerusalem.

¹⁴Edi mmɔ eto ke Perga esaŋa ebe, edi ke Antioch ke Pisidia; ndien ke sabbath mmɔ eduk ke synagogue esuhɔre etetie.

¹⁵Edi ke ema ekekot mbet ye mme prophet ema, mme etubom synagogue edɔŋ edidɔhɔ mmɔ ete, Nditɔ-ete, edieke mbufo enyenede item eke enɔde mbio-obio, etiŋ.

¹⁶Ndien paul adaha ke enyɔŋ enyeŋe ubɔk ete,

¹⁷Mbio Israel, ye mbufo emi ebakde Abasi, ekop. Abasi mbio Israel emi ekemek mme ete nnyin, onyuŋ ofori mbio emi ke ini mmɔ edide nte isen ke isɔŋ Egypt, onyuŋ ada edimenere ubɔk emen mmɔ ɔwɔrɔ ke esit.

¹⁸Enye onyuŋ eme ime ye ido mmɔ ke desert ke adaŋa isua aba.

¹⁹Ndien ke Enye ama okosobo mme idut itiaba ke isɔŋ Canaan, Enye ɔnɔ mmɔ isɔŋ mme idut oro, ete eda enyene, ke adaŋa isua ikie inaŋ ye aba ye duop:

²⁰ndien ke ini emi ama ekebe, Enye ɔnɔ mmɔ mme ebierikpe, tutu osim Samuel prophet.

²¹Ekem mmɔ ebeŋe edidem: ndien Abasi ɔnɔ mmɔ Saul eyen Kish, owo esien Benjamin, ke isua aba.

²²Edi ke Enye ama ekemen enye efep, anam David adaha ada, ete edi edidem mmɔ: onyuŋ ɔdɔhɔ abaŋa enye ete, Mmokut David eyen Jesse, owo emi ekemde esit ye Ami, emi edinamde ofuri uduak Mi.

²³Oto ke ubon owo emi ke Abasi akada Andinyaŋa ɔnɔ Israel, nte uŋwɔŋɔ Esie edide, kpa Jesus;

²⁴ke John ama ekebem eridi Esie iso ɔkwɔrɔ baptism erikabare esit ɔnɔ kpukpru mbio Israel.

²⁵Ndien nte John anamde utom esie ama, enye obup mme owo ete, Mbufo ebat ete ndi anie? Ndige Enye. Edi sese, owo, eke mmendotke nditat uruk ikpa-ukot Esie, ke etiene mi ke edem.

²⁶Nditɔ-ete, mbufo nditɔ emi etode ke ubon Abraham, ye mmɔ emi ebakde Abasi ke otu mbufo, ema enɔ ikɔ erinyaŋa emi esɔk nnyin.

²⁷Koro mmɔ emi eduŋde ke Jerusalem, ye mme andikara mmɔ, sia mmɔ mifiɔkke Enye, minyuŋ ifiɔkke mme uyo mme prophet, emi ekotde ke sabbath ke sabbath, enam uyo mmɔ esu ke edibiom Enye.

²⁸Ndien okposuk edi nte mmɔ mikwe ntak eke ekpowotde Enye, mmɔ ekpe ye Pilate ete ewot Enye.

²⁹Edi ke ini mmɔ ema ekenam kpukpru se ekewetde ebaŋa enye osu, mmɔ ekɔŋɔre Enye ke eto enim ke udi.

³⁰Edi Abasi anam enye eset ke mkpa:

³¹mmɔ emi eketode ke Galilee esaŋa ye Enye edɔk edi ke Jerusalem enyuŋ ekut Enye ke ediwak usen; mmɔ enyuŋ edi ntiense Esie enɔ mbio-obio ke emi

³²Ndien nnyin ida eti etop uŋwɔŋɔ oro ekeŋwɔŋɔde enɔ mme ete isɔk mbufo, ite,

³³Abasi ama anam uŋwɔŋɔ oro osu ɔnɔ nditɔ nnyin, ke emi Enye anamde Jesus eset; nte emi enyuŋ ewetde ke udiana psalm, ete, Afo edi Eyen mi; mmobon Fi mfin emi.

³⁴Ndien kabaŋa erinam emi Abasi anamde Enye eset ke mkpa, okunyuŋ afiak aba okut mbiara, Enye etiŋ ntem ete, Nyenɔ mbufo ndisana ŋkpɔ David eke midikpuhu mbufo.

³⁵Sia Enye ɔdɔhɔde ke psalm eŋwen ete, Afo uduyakke Edisana Owo Fo okut mbiara.

³⁶Koro ke adaŋemi David akanamde uduak Abasi ke eyo esie ama, enye ede, ndien ebuk enye ye mme ete esie, enye onyuŋ okut mbiara.

³⁷Edi Enye emi Abasi anamde eset ke mkpa ikwe mbiara.

³⁸Efiɔk ndien, nditɔ-ete, ete oto ke Owo emi ke ekwɔrɔ erifen mme idiɔk-ŋkpɔ enɔ mbufo:

³⁹ndien edi Enye anam kpukpru mmɔ emi enimde ke akpanikɔ enyene utebe-ikpe ke kpukpru ŋkpɔ eke ibet Moses mikemeke nditebe owo ikpe.

⁴⁰Ekpeme ndien, mbak se ewetde ke mme prophet edisim mbufo, nte emi edɔhɔde ete,

⁴¹Mbufo emi esuenede Jehovah, ese, enyuŋ eyik, enyuŋ etak; Koro mmanam erinam ke eyo mbufo, Kpa erinam eke mbufo midinimke ke akpanikɔ, owo ekpetetiŋ ɔnɔ mbufo.

⁴²Nte mmɔ ewɔŋɔde, mmɔ ebeŋe ete etiŋ ikɔ emi ɔnɔ mme imɔ ke sabbath eŋwen.

⁴³Edi ke ini synagogue asuanade, ediwak mme Jew ye nti Gentile emi etuakde ibuot enɔ Abasi ke ido mme Jew etiene Paul ye Barnabas: mmɔ oro enyuŋ etiŋ enɔ mmɔ, enyuŋ ekpe mmɔ ete mmɔ esuk etie ke mfɔn Abasi.

⁴⁴Ndien ke udiana sabbath, ekpere ndidi ofuri obio ebono ɔtɔ kiet ndikop ikɔ Abasi.

⁴⁵Edi ke ini mme Jew ekutde otu owo, ufup ɔyɔhɔ mmɔ ke esit, mmɔ enyuŋ eneni mme ŋkpɔ eke Paul etiŋde, enyuŋ esuŋi.

⁴⁶Ndien Paul ye Barnabas edɔhɔ mmɔ uko-uko ete, Ana nte ebem iso etiŋ ikɔ Abasi enɔ mbufo. Sia mbufo esinde ikɔ oro, enyuŋ ebatde ete mmimɔ idotke nsinsi uwem, sese, nnyin ikabare itiene mme Gentile.

⁴⁷Koro Ɔbɔŋ eteme nnyin ntre ete, Mmonim Fi ke uŋwana mme idut, Man afo akpada erinyaŋa edi tutu osim ke utit ererimbot.

⁴⁸Ke ini mme Gentile ekopde emi mmɔ edat esit, enyuŋ ekpono ikɔ Ɔbɔŋ: ndien kpukpru mmɔ emi ekenimde enɔ nsinsi uwem ebuɔt idem.

⁴⁹Ikɔ Ɔbɔŋ onyuŋ asuana ke ofuri edem oro.

⁵⁰Edi mme Jew ekpak ikpɔ iban eke ebakde Abasi, ye mbɔŋ obio, enyuŋ esin mmɔ oro ekɔbɔ Paul ye Barnabas, enyuŋ ebin mmɔ esio ke mme adaŋa mmɔ.

⁵¹Edi mmɔ ekeŋ ntan ikpat mmɔ efep ndibiom mmɔ ikpe, enyuŋ edi ke Iconium.

⁵²Ndien mbet eyɔhɔ ye idaresit ye Edisana Spirit.