Read efik UTOM MME APOSTLE 14 Bible Online

UTOM MME APOSTLE 14 - efik bible

UTOM MME APOSTLE 14

¹EDIKEM ke Iconium mmɔ mbiba eduk ke synagogue mme Jew, enyuŋ ekwɔrɔ ikɔ ke ido eke esinde ata ediwak mme Jew ye mme Greek nde enim ke akpanikɔ.

²Edi mme Jew eke esɔŋde ibuot edemere mme Gentile esin mmɔ esua nditɔ-ete.

³Ntre ke mmɔ etie do anyan ini ekwɔrɔ ikɔ ye uko ke Ɔbɔŋ; Ɔbɔŋ onyuŋ onyime ikɔ mfɔn Esie, ɔnɔ mmɔ ndinam mme idiɔŋɔ ye mme utibe-ŋkpɔ.

⁴Edi mbio-obio ebahare; usuk mmɔ eda ye mme Jew, usuk eda ye mme apostle.

⁵Edi ke ini mme Gentile ye mme Jew ye mbɔŋ mmɔ ebumerede eka ndisuene mmɔ, nnyuŋ ntɔŋɔ mmɔ ke itiat,

⁶mmɔ efiɔk se iyomde nditibe, enyuŋ efeŋe eka Lystra ye Derbe, mme obio Lycaonia, ye isɔŋ eke akande edem oro okuk:

⁷enyuŋ ekwɔrɔ gospel do.

⁸Ndien owo kiet odu ke Lystra, emi ukot esie misɔŋke; enye edi owo mbuŋɔ toto ke emana esie, akanam isaŋake.

⁹Enye okop nte Paul etiŋde ikɔ: ndien Paul owuk enyin ese enye, okut ete enye enyene mbuɔtidem nte ekemde ndinam idem ɔsɔŋ enye,

¹⁰onyuŋ ɔdɔhɔ enye ke ɔkpɔsɔŋ uyo ete, Daha ke enyɔŋ, neŋere da ke ukot. Ndien enye obumere adaha ke enyɔŋ, asaŋa.

¹¹Ke ini mme otu owo ekutde se Paul anamde, mmɔ esio mkpo efiori ke usem Lycaonia, ete, Mme abasi emada mbiet owo esuhɔre edi ke ɔtɔ nnyin.

¹²Mmɔ enyuŋ ekot Barnabas, ete, Jupiter, ye Paul, ete, Mercury, sia enye etiŋde ikɔ akan.

¹³Ndien oku Jupiter, emi temple esie adade ke iso obio, ada enaŋ ye ekara emi enamde ke flower, edi ke inua-otop obio, oyom ndiwa uwa ye mme otu owo oro.

¹⁴Edi ke ini mme apostle, Barnabas ye Paul, ekopde, mmɔ ewai ɔfɔŋidem mmɔ, ebumere eduk ke otu mbio-obio, efiori ete,

¹⁵Mbɔŋ owo, nso ke mbufo enam? Nnyin nde idi owo, ibiet mbufo ke uduot nnyin, inyuŋ ida eti etop isɔk mbufo, ite mbufo ekabare ekpɔŋ mme ikpikpu ŋkpɔ emi etiene Abasi uwem, emi akanamde enyɔŋ ye isɔŋ ye inyaŋ ye kpukpru se idude mmɔ ke esit.

¹⁶Ke mme eyo eke ebede Enye akayak kpukpru mme idut esaŋa ke mme usuŋ idem mmɔ.

¹⁷Edi Enye iyakke ŋkpɔ-ntiense anana ɔnɔ Enye, ke emi Enye ɔfɔnde ido, onyuŋ ɔnɔde mbufo edim heaven ye ini eduek, onyuŋ ɔnɔde mbufo udia, anam esit mbufo ɔyɔhɔ ye idaresit.

¹⁸Edi ɔsɔŋ mme apostle ndida kpa ikɔ emi ŋkpan mme otu owo ndiwa uwa nnɔ mmɔ.

¹⁹Edi mme Jew eto ke Antioch ye Iconium edi do: ndien ke mmɔ ema ekeyut mme otu owo, mmɔ etɔŋɔ Paul ke itiat, enyuŋ eduri enye esio ke obio, ese ete enye akpa.

²⁰Edi nte mbet edade ekan enye ekuk, enye adaha ke enyɔŋ oduk ke obio: ndien ke ndaŋ-nsiere enye ɔwɔrɔ ye Barnabas aka ke Derbe.

²¹Ke mmɔ ema ekekwɔrɔ gospel enɔ obio oro, enyuŋ enam ediwak owo ekabare edi mbet, mmɔ efiak enyɔŋ Lystra, ye Iconium, ye Antioch, ekɔsɔŋɔ mbet esit:

²²ekpe ye mmɔ ete esuk eyire ke mbuɔtidem, enyuŋ esian mmɔ ete, nnyin inyene ndibe ke ediwak ukut nduk ke Obio Ubɔŋ Abasi.

²³Edi ke ema ekemek mbiowo enim enɔ mmɔ ke kpukpru ufɔk Abasi, enyuŋ ebɔŋ akam, enyuŋ etre udia, eyak mmɔ esin ke ubɔk Ɔbɔŋ emi mmɔ ekebuɔtde idem ye Enye.

²⁴Ekem mmɔ esaŋa ke Pisidia ebe edi ke Pamphylia.

²⁵Ndien ke mmɔ ema ekekwɔrɔ ikɔ ke Perga, mmɔ esuhɔre edi ke Attalia;

²⁶enyuŋ eto do ewat edi ke Antioch, ke ebiet emi ekayakde mmɔ esin ke ubɔk mfɔn Abasi, ete mmɔ enam utom emi mmɔ ekenamde ema ke emi.

²⁷Edi ke ini mmɔ esimde do, mmɔ ekot ufɔk Abasi ebon ɔtɔ kiet, ebuk kpukpru se Abasi akadade mmɔ anam, ye adaŋa nte Enye ekebererede usuŋ mbuɔtidem ɔnɔ mme Gentile.

²⁸Mmɔ enyuŋ etie do ye mbet anyan ini.