Read efik UTOM MME APOSTLE 15 Bible Online

UTOM MME APOSTLE 15 - efik bible

UTOM MME APOSTLE 15

¹EKEM ndusuk owo eto ke Judaea esuhɔre edi, enyuŋ ekpep nditɔ-ete, ete, Ke mbufo minaŋa mbobi nte Moses etemede, mbufo ikemeke ndibɔhɔ.

²Edi ke ini Paul ye Barnabas minyimeke inɔ mmɔ enyuŋ enenide ɔkpɔsɔŋ eneni ye mmɔ, ikɔt Abasi ke Antioch ebiere enim ete Paul ye Barnabas esaŋa ye ndusuk owo ke otu mmimɔ edɔk eka Jerusalem, ekobup mme apostle ye mbiowo ebaŋa ikɔ emi.

³Mmɔdo ke adaŋ-emi ufɔk Abasi edade mmɔ ekeyak ke usuŋ, mmɔ esaŋa ke Phoenicia ye Samaria ebe ebuk enɔ nditɔ-ete, ete mme Gentile ema ekabare esit: enyuŋ enam kpukpru nditɔ-ete edara eti-eti.

⁴Edi ke ini mmɔ esimde Jerusalem, ufɔk Abasi ye mme apostle ye mbiowo edara mmɔ, mmɔ enyuŋ ebuk kpukpru se Abasi akadade mmɔ anam.

⁵Edi ndusuk owo emi etode ke ŋka mme Pharisee enyuŋ enimde ke akpanikɔ edaha ke enyɔŋ, edɔhɔ ete, Ana nte enim mmɔ mbobi, enyuŋ eteme mmɔ ete enim ibet Moses.

⁶Mme apostle ye mbiowo esop idem ɔtɔ kiet ndikere ikɔ emi.

⁷Edi ke mmɔ ema ekeneni ediwak eneni, Peter adaha ke enyɔŋ ɔdɔhɔ mmɔ ete, Nditɔ-ete, mbufo emefiɔk ete tutuko Abasi ekemek ke otu mbufo, ete oto ke inua mi mme Gentile ekpekop ikɔ gospel, enyuŋ enim ke akpanikɔ.

⁸Ndien Abasi emi ɔfiɔkde esit owo ekedi ntiense ɔnɔ mmɔ, ke erinɔ mmɔ Edisana Spirit kpa nte ɔkɔnɔde nnyin;

⁹Enye inyuŋ isinke ubahare ke ufɔt nnyin ye mmɔ, edi anam esit mmɔ asana oto ke mbuɔtidem.

¹⁰Nsinam mbufo edomode Abasi ndien, eyom ndida ɔkpɔnɔ ŋkɔŋɔ mbet ke itɔŋ eke mme ete nnyin ye nnyin mikekemeke ndibiom?

¹¹Edi nnyin inim ke akpanikɔ ite, edida mfɔn Ɔbɔŋ Jesus enyaŋa nnyin kpa nte mmɔ.

¹²Ndien kpukpru owo edobo; mmɔ enyuŋ ekpaŋ utɔŋ enɔ Barnabas ye Paul nte mmɔ ebukde mme idiɔŋɔ ye mme utibe-ŋkpɔ eke Abasi akadade ubɔk mmɔ anam ke otu mme Gentile.

¹³Edi ke mmɔ ema eketiŋ ema, James ɔbɔrɔ ete,

¹⁴Nditɔ-ete, ekpaŋ utɔŋ enɔ mi: Simeon omobuk nte Abasi ekebemde iso edi edise mme Gentile, ndisio ikɔt ke otu mmɔ nnɔ enyiŋ Esie.

¹⁵Ndien ikɔ mme prophet esaŋa ekekem ye ŋkpɔ emi; nte ewetde ete,

¹⁶Ke mme ŋkpɔ emi ema ekebe nyefiak, Nyenyuŋ ntɔŋɔ ntak mbɔp ataya David emi ɔduɔde; Nnyuŋ ntɔŋɔ ntak mbɔp ŋwure esie, Nnyuŋ nneŋere enye ŋwuk:

¹⁷Man mme owo eke esuhɔde ekpeyom Ɔbɔŋ, Ye kpukpru mme Gentile, emi esiode mmɔ enyiŋ Mi;

¹⁸Ntem ke Jehovah, emi anamde owo efiɔk ŋkpɔ emi toto ke eritɔŋɔ ererimbot, ɔdɔhɔ.

¹⁹Mmɔdo uyo mi edi ntem ete, nnyin ikufina mmɔ emi ewɔrɔde ke otu mme Gentile ekabare etiene Abasi;

²⁰edi iwet inɔ esɔk mmɔ ite, mmɔ etre ido ndem emi asabare owo, enyuŋ etre use, ekunyuŋ eta unam eke eyiride yiri, ekunyuŋ eta iyip.

²¹Koro toto ke eset Moses ama enyene mmɔ emi ekwɔrɔde enye ke kpukpru obio, ke emi ekotde enye ke mme synagogue kpukpru sabbath.

²²Ekem mme apostle ye mbiowo, ye ofuri ufɔk Abasi ekut ete ɔfɔn ndimek owo ke otu mme imɔ ndɔŋ mmɔ esaŋa ye Paul ye Barnabas eka Antioch; enyiŋ mmɔ oro edi Judas, emi ekerede Barnabas, ye Silas, emi edide ikpɔ owo ke otu nditɔ-ete: mmɔ enyuŋ ewet ŋwed esin mmɔ oro ke ubɔk ntem, ete:

²³Mme apostle ye ikpɔ nditɔ-ete ewet ŋwed emi enɔ esɔk nditɔ-ete emi edide mme Gentile ke Antioch ye Syria ye Cilicia: Imɔnɔ ekɔm.

²⁴Sia ima ikop ite ndusuk owo, emi etode ke otu nnyin ewɔrɔ, ema eda ikɔ-inua etimere mbufo, eyut mbufo ukpɔŋ ekabare;

²⁵emi nnyin mikɔnɔŋɔ mmɔ uyo; nnyin ikut ite ɔfɔn, ke emi inyenede ekikere kiet ibaŋa ŋkpɔ emi, ndimek owo ndɔŋ mmɔ do ye ndima ufan nnyin Barnabas ye Paul,

²⁶emi ekebatde uwem mmɔ ke ekpri ŋkpɔ kabaŋa enyiŋ Ɔbɔŋ nnyin Jesus Christ.

²⁷Mmɔdo imɔdɔŋ Judas ye Silas edi; mmɔ ke idem mmɔ eyenyuŋ etiŋ idem ŋkpɔ emi ke inua enɔ mbufo.

²⁸Koro Edisana Spirit okut ete ɔfɔn, nnyin inyuŋ ikut ite ɔfɔn, nditre ndibiom mbufo mbiomo eŋwen ke idem, ke mibɔhɔke ŋkpɔ ifaŋ emi enyenede ndinam;

²⁹ete mbufo ebet mme ŋkpɔ eke ewade enɔ ndem, ye iyip, ye unam eke eyiride yiri, enyuŋ etre use; ema ekpeme idem ke ŋkpɔ emi, eyefɔn ye mbufo. Etie suŋ.

³⁰Ke ini esiode mme isuŋ emi edɔŋ mmɔ, esuhɔre edi ke Antioch; ekot kpukpru owo ebon, enyuŋ eyak ŋwed enɔ mmɔ.

³¹Ndien ke adaŋemi mmɔ oro ekotde ŋwed, mmɔ edara koro mmɔ ekopde ndɔŋesit.

³²Judas ye Silas, emi enyuŋ edide mme prophet ke idem mmɔ, etiŋ ediwak ikɔ, enɔ nditɔ-ete item, enyuŋ esɔŋɔ mmɔ idem.

³³Edi ke mmɔ ema ekebigi do esisit, nditɔ-ete eyak mmɔ enyɔŋɔ ke emem editiene mmɔ emi ekedɔŋde mmɔ utom.

³⁴Edi Silas ama ebiere ndisuhɔ do ye mmɔ.

³⁵Edi Paul ye Barnabas ye ediwak owo eŋwen esuk etie ke Antioch, ekpep enyuŋ ekwɔrɔ ikɔ Ɔbɔŋ.

³⁶Edi ke ndusuk usen ema ekebe, Paul ɔdɔhɔ Barnabas ete, Yak nnyin ifiak inyɔŋ kpukpru obio, eke nnyin ikɔkwɔrɔde ikɔ Ɔbɔŋ ke esit, ikese nditɔ-ete nte mmɔ etiede.

³⁷Edi Barnabas oyom ndida John emi ekerede Mark asaŋa ye mmɔ.

³⁸Edi Paul okut ete ifɔnke ndida owo emi ɔkɔkpɔŋde mmimɔ ke Pamphylia etre nditiene mme imɔ ŋka utom.

³⁹Ntem ɔwɔrɔ ɔkpɔsɔŋ eneni; ntre ke mmɔ edianare ye kiet eken; Barnabas onyuŋ ada Mark osio aka Cyprus.

⁴⁰Edi Paul emek Silas ada adaha, ke ini nditɔ ete ema ekeyak enye esin ke ubɔk mfɔn Ɔbɔŋ.

⁴¹Enye onyuŋ asaŋa ebe ke Syria ye Cilicia, ɔsɔŋɔ mme ufɔk Abasi idem.