Read efik UTOM MME APOSTLE 17 Bible Online

UTOM MME APOSTLE 17 - efik bible

UTOM MME APOSTLE 17

¹EKEM ke mmɔ ema ekesaŋa ke Amphipolis ye Appolonia ebe, mmɔ edisim ke Thessalonica, emi synagogue mme Jew odude do.

²Ndien nte ido Paul edide, enye oduk etiene mmɔ; ndien ke ofuri sabbath ita enye osio ikɔ ke ŋwed Abasi ada ebuen ikɔ ye mmɔ,

³onyuŋ asian owut mmɔ, ete Christ enyene ndikpa nnyuŋ nset ke mkpa; onyuŋ ɔdɔhɔ mmɔ ete, Jesus, emi ŋkwɔrɔde nnɔ mbufo, edi Christ.

⁴Ndusuk owo enyime, enyuŋ edian idem ye Paul ye Silas; ekɔrɔ ye ediwak mme Greek emi ebakde Abasi ye ediwak ikpɔ iban.

⁵Edi mme Jew efibe mmɔ ufup, eda ndusuk mbukpo owo ke otu mbio-obio edian idem, enyuŋ ekɔ otu owo ebon, esin ndutime ke obio; mmɔ enyuŋ eyom ndibuŋ ufɔk Jason eŋwana ndida mmɔ oro ŋwɔrɔ nsɔk mbio-obio.

⁶Edi ke adaŋemi mmɔ mikwe mmɔ oro, mmɔ eduri Jason ye ndusuk nditɔ-ete edi ke iso mbɔŋ obio, efiori ete, Mme anditimere ererimbot emi edi mi ŋko-o;

⁷Jason amada mmɔ esin ke ufɔk; mmɔ kpukpru ebiat mme ewuhɔ Caesar, ete, Edidem eŋwen odu, emi ekerede Jesus.

⁸Ndien esit otimere ofuri otu owo ye mbɔŋ obio, ke ini mmɔ ekopde ikɔ emi.

⁹Edi ke mmɔ ema ekenam Jason ye mmɔ efen oro etie ubiɔŋ, ete ndutime ididuhe, esana mmɔ eyak.

¹⁰Edi idaha oro nditɔ-ete enam Paul ye Silas edaha ke okoneyo eka ke Beroea: ndien ke ini mmɔ esimde do, mmɔ eduk ke synagogue mme Jew.

¹¹Mmɔ emi edi enyene-ido ekan mme andiduŋ Thessalonica; mmɔ ekop ikɔ ke erinyime esit, enyuŋ eduŋɔre ŋwed Abasi ke usen ke usen, ete ifiɔk mme mme ikɔ oro ekem ntre.

¹²Ntem ke ediwak mmɔ enim ke akpanikɔ, ediwak ikpɔ iban Greek ye irenowo ŋko.

¹³Edi ke ini mme Jew emi edude ke Thessalonica ekopde ete Paul ke ɔkwɔrɔ ikɔ Abasi ke Beroea ŋko, mmɔ enyuŋ edi do edinam mbio-obio ebumere esin ndutime.

¹⁴Edi kpa idaha oro nditɔ-ete enam Paul adaha aka ŋkaŋ inyaŋ-inyaŋ: edi Silas ye Timothy esuk edu do.

¹⁵Edi mmɔ emi edade Paul usuŋ eda enye esim ke Athens: ndien ke ini mmɔ ema ekebɔ etop emi Paul otobode, ete edɔhɔ Silas ye Timothy esɔp ebine imɔ, mmɔ efiak enyɔŋɔ.

¹⁶Ke adaŋemi Paul etiede ke Athens ebet mmɔ, esit ayat enye ndikut nte ndem eyɔhɔde ke obio.

¹⁷Ntre ke enye ebuen ikɔ ke synagogue ye mme Jew ye mme abak Abasi, onyuŋ eneme kpukpru usen ke aŋwa-urua ye mmɔ eke esobode ye enye.

¹⁸Ndusuk mme ɔfiɔkŋkpɔ owo, emi etienede ukpep-ŋkpɔ Epicurus ye ukpep-ŋkpɔ mme Stoic, eneni eneni ye enye. Ndusuk mmɔ ete, Nso ke owo emi oyom nditiŋ ye mbubek ifiɔk esie? Ndusuk eŋwen ete, Enye etie nte andikwɔrɔ isen Abasi: mmɔ etiŋ ntre koro enye ɔkwɔrɔde Jesus ye ediset ke mkpa.

¹⁹Ntre ke mmɔ eda enye edi ke Areopagus, ete enye, Nte eyesian nnyin obufa ukpep-ŋkpɔ fo emi?

²⁰Afo amada ndusuk isen ŋkpɔ etiŋ esin nnyin ke utɔŋ: ntre ke nnyin iyom ndifiɔk se mmɔ ewɔrɔde.

²¹Koro kpukpru mbio Athens ye isen owo eke edaŋde do idaha ini mmɔ inam ŋkpɔ efen ibɔhɔke nditiŋ mbufa ŋkpɔ ndinyuŋ ŋkop mbufa ŋkpɔ.

²²Ntre ke Paul ada ke ufɔt Areopagus, ɔdɔhɔ ete, Mbufo mbio Athens, mmokut nte ke kpukpru usuŋ mbufo edi

²³mme andibak mme abasi eti-eti. Koro nte nsaŋade mbe nse mme ŋkpɔ eke mbufo ekponode, ŋkut itie-uwa kiet ŋkɔrɔ do, emi ewetde ke esit ete, EMI ENYENE ABASI EMI OWO MIFIƆKKE. Mmɔdo se mbufo etuakde ibuot enɔ ke unana-ifɔk, kpa oro ke ami ŋkwɔrɔ nnɔ mbufo.

²⁴Abasi, emi okobotde ererimbot ye kpukpru se idude ke esit, sia Enye edide Ɔbɔŋ enyɔŋ ye isɔŋ, iduŋke ke mme temple eke ubɔk owo enamde;

²⁵owo inyuŋ idaha ubɔk inam ŋkpɔ inɔ Enye, nte emi Enye anande ŋkpɔ; koro edi Enye ɔnɔ kpukpru owo uwem, ye ibifik, ye kpukpru ŋkpɔ:

²⁶Enye anam kpukpru mme idut eto ke ekpuk kiet ewɔrɔ ediduŋ ke ofuri iso isɔŋ: onyuŋ edi Enye onim iduɔk ini uwem mmɔ ye adaŋa ebiet iduŋ mmɔ;

²⁷kpaŋ mmɔ eyom Abasi, ete ndusuk ifiɔŋɔ ubɔk iŋwana ndisim Enye, nnyuŋ ŋkut Enye; okposuk edi nte Enye miyomke usuŋ ye baba nnyin owo kiet.

²⁸Koro nnyin idodu ke Enye, inyuŋ isaŋa ke Enye inyuŋ inyene uwem nnyin ke Enye; kpa nte ndusuk ke otu mme etiŋ-uto mbufo edɔhɔde ete, Nnyin inyuŋ idi nditɔ Esie.

²⁹Sia nnyin idide nditɔ Abasi ndien, nnyin ikpesehe ite Abasi ebiet gold, mme silver, mme itiat, eke edade usɔ ye ekikere owo esɔi.

³⁰Abasi ofumi ini ndisime oro; edi ke emi Enye owuk kpukpru owo ke kpukpru ebiet, ete mmɔ ekabare esit:

³¹koro Enye omonim usen eke Enye edikpede ikpe ɔnɔ ererimbot ke edinen ido, ke ubɔk Owo emi Enye ekemekde; Enye onyuŋ ada erinam emi Enye anamde Owo oro eset ke mkpa ayarare owut kpukpru owo ete edidi ntem.

³²Ke ini mmɔ ekopde ebaŋa ediset ke mkpa, ndusuk mmɔ esak enye; edi mmɔ eken ete, Nnyin iyekop se etiŋde abaŋa ŋkpɔ emi usen eŋwen.

³³Ntem ke Paul ɔwɔrɔ ɔkpɔŋ mmɔ.

³⁴Edi ndusuk mmɔ eyire enye enyuŋ enim ke akpanikɔ; Dionysius owo Areopagus ye ŋwan emi ekerede Damaris, ye mmɔ efen etiene edu ke otu mmɔ oro.