Read efik UTOM MME APOSTLE 18 Bible Online

UTOM MME APOSTLE 18 - efik bible

UTOM MME APOSTLE 18

¹KE ŋkpɔ emi ema ekebe, enye adaha ɔkpɔŋ Athens ebe edi ke Corinth.

²Ndien enye okut Jew kiet emi ekerede Aquila, owo Pontus, emi asaŋade ye Priscilla ŋwan esie oto ke Italy edi ke ekpri ini emi ebede, koro Claudius ama okowuk ete kpukpru mme Jew ewɔŋɔ ke Rome.

³Ntre ke enye etiene mmɔ; ndien sia enye anamde oruk ubɔk-utom kiet ye mmɔ, enye oduŋ ye mmɔ ntre anam utom; koro nte ubɔk-utom mmɔ asaŋade mmɔ edi mme anam ufɔk-ɔfɔŋ.

⁴Enye onyuŋ ebuen ikɔ ke synagogue kpukpru sabbath, aŋwana ndinam mme Jew ye mme Greek enim ke akpanikɔ.

⁵Edi ke ini Silas ye Timothy etode ke Macedonia edi, ukwɔrɔ-ikɔ Abasi efik Paul, enye onyuŋ otim asian mme Jew ete Jesus edi Christ.

⁶Edi ke mmɔ enenide ye enye ɔkpɔsɔŋ enyuŋ esuŋide, enye ekeŋ ɔfɔŋidem esie onyuŋ ɔdɔhɔ mmɔ ete, Iyip mbufo osuk ɔkɔbɔ mbufo; nsaŋake do; ɔtɔŋɔde ke emi mmetiene mme Gentile.

⁷Ndien enye adaha ɔkpɔŋ mmɔ ekekpep ŋkpɔ ke ufɔk owo kiet emi ekerede Titus Justus emi onyuŋ abakde Abasi, ufɔk esie onyuŋ ada adiana synagogue.

⁸Edi Crispus, etubom synagogue, onim Ɔbɔŋ ke akpanikɔ, ye ofuri ufɔk esie; ediwak mbio Corinth enyuŋ ekop, enim ke akpanikɔ, enyuŋ ena baptism.

⁹Edi Ɔbɔŋ ɔdɔhɔ Paul ke ŋkukut ke okoneyo ete, Kufehe ndik, edi tiŋ ikɔ Mi, kunyuŋ udop uyo:

¹⁰koro ami do ye afo, ndomo owo kiet idinyuŋ ibuatke fi ndinam fi idiɔk: koro mmenyene ediwak owo ke obio emi.

¹¹Ntre ke Paul oduŋ do isua kiet ye ɔfiɔŋ itiokiet, ekpep mmɔ ikɔ Abasi.

¹²Edi ke ini Gallio edide andikara Achaia, mme Jew edaha ke enyɔŋ ye esit kiet enam ikɔ ye Paul, enyuŋ eda enye eka ke itie-ikpe, edɔhɔ ete,

¹³Da emi oyut mme owo eteme mmɔ etuak ibuot enɔ Abasi ke ido nte ibet mitemeke.

¹⁴Edi ke ini Paul oyomde nditat inua ntiŋ ikɔ, Gallio ɔdɔhɔ mme Jew ete, Ekpededi ikɔ ndudue mme ikɔ oburobut ido, O mbufo mme Jew, ekpenen nte mme ime ŋkop mbufo:

¹⁵edi sia edide eneni eke mbufo enenide ebaŋa ikɔ ye enyiŋ ye ibet mbufo ese ebaŋa oro ke idem mbufo, nyomke ndibiere oruk ikɔ oro.

¹⁶Ntre ke enye ebin mmɔ ke itie-ikpe efep.

¹⁷Edi kpukpru mmɔ (mme Greek) emum Sosthenes, etubom synagogue, emia enye ke iso itie-ikpe. Edi Gallio idɔŋke dɔŋ enyin do.

¹⁸Paul odu do ediwak usen, ndien enye ɔkpɔŋ nditɔ-ete, oto do osio aka Syria, asaŋa ntre ye Priscilla ye Aquila. Ndien enye okporo idet esie ke Cenchreae, koro enye akakaŋade akaŋa.

¹⁹Ekem mmɔ edisim ke Ephesus, ndien enye ɔkpɔŋ mmɔ oro do: edi enye ke idem esie oduk ke synagogue, ebuen ikɔ ye mme Jew.

²⁰Mmɔ ebeŋe enye ete afiak etie kaŋa ye mme imɔ, edi enye inyimeke: edi enye adaha ɔkpɔŋ mmɔ,

²¹ete mmɔ, Nyefiak ndise mbufo ke Abasi amade: ntem ke enye osio ɔkpɔŋ Ephesus.

²²Ndien ke ini enye ebehede ke Caesarea, enye ɔdɔk ɔkɔkɔm ufɔk Abasi, ndien ɔsuhɔre aka ke Antioch.

²³Ekem ke enye ama okodu do ndusuk ini, enye adaha akasaŋa ke isɔŋ Galatia ye Phrygia ke itie ke itie, ɔsɔŋɔ kpukpru mbet esit.

²⁴Ekem Jew kiet emi ekerede Apollos, emi otode ke Alenxandria, onyuŋ edide owo udɔnikɔ, edi ke Ephesus: enye onyuŋ ɔsɔŋɔ ɔfiɔk ŋwed Abasi eti-eti.

²⁵Ema eteme owo emi usuŋ Ɔbɔŋ; ndien sia enye edide owo ifiop-esit, enye etiŋ onyuŋ otim ekpep mme owo ŋkpɔ abaŋa Jesus, okposuk edi nte enye ɔfiɔkde baptism John ikpɔŋ.

²⁶Enye ɔtɔŋɔ nditiŋ ikɔ ntre ye uko ke synagogue. Edi ke ini Priscilla ye Aquila ekopde ikɔ esie, mmɔ eda enye enyɔŋ ufɔk, etim eyarare usuŋ Abasi enɔ enye.

²⁷Edi ke ini enye oyomde ndibe ŋka ke Achaia, nditɔ-ete esɔŋɔ enye esit, enyuŋ ewet ŋwed enɔ esɔk mbet ke edem oro, ete edara enye. Ndien ke adaŋemi enye osimde do, enye ɔsɔŋɔ aŋwam mmɔ emi ekonimde ke akpanikɔ oto ke mfɔn Abasi.

²⁸Koro enye akande mme Jew aŋwa-aŋwa ke eneni, osioŋo ikɔ ke ŋwed Abasi, owut ete Jesus edi Christ.