Read efik UTOM MME APOSTLE 2 Bible Online

UTOM MME APOSTLE 2 - efik bible

UTOM MME APOSTLE 2

¹EKEM ke ini osimde usen Pentecost, kpukpru mmɔ edu ɔtɔ kiet.

²Ndien idaha kiet uyom oto ke enyɔŋ edi, ebiet uyom ata ɔkpɔsɔŋ oyobio eke ofimede, enye onyuŋ ɔyɔhɔ ofuri ufɔk oro mmɔ etiede ke esit.

³Mmɔ enyuŋ ekut mme edeme eke esakde ikaŋ, nte edemede idem edoro mmɔ ke ibuot, edeme kiet ke owo kiet, edeme kiet ke owo kiet.

⁴Ndien Edisana Spirit ɔyɔhɔ kpukpru mmɔ ke idem, mmɔ enyuŋ etɔŋɔ ndisem nsio-nsio usem, nte spirit ɔnɔde mmɔ ukeme nditiŋ.

⁵Edi mme Jew, eke ekponode Abasi, eto ke kpukpru mme idut ke idak ikpa-enyɔŋ edi ediduŋ ke Jerusalem.

⁶Ke ini mmɔ ekopde uyom emi, otu owo ebono ɔtɔ kiet, idem onyuŋ akpa mmɔ, koro mmɔ kiet kiet ekopde nte mmɔ oro esemde usem mmɔ.

⁷Ndien enyene kpukpru mmɔ ndyɔ, mmɔ enyuŋ eyik, ete, Sese, nte kpukpru mmɔ emi etiŋde tiŋ idige nditɔ Galilee?

⁸Nsidi ntak ndien eke kpukpru nnyin ikopde nte mmɔ esemde usem eke ikamanade ke esit?

⁹Mme Parthian ye mme Mede ye mbon Elam, ye mme andiduŋ ke Mesopotamia, ye ke

¹⁰Judaea ye ke Cappadocia, ye ke Pontus ye ke Asia, ye ke Phrygia ye ke Pamphylia, ye ke Egypt ye ke edem Libya emi ekperede Cyrene, ye mbon Rome emi edaŋde ke Jerusalem, mme Jew ye mme Gentile emi enamde ŋkpɔ enɔ Abasi ke ido mme Jew,

¹¹ye mbon Crete ye eke Arabia, nnyin imokop mmɔ etiŋ ata mkpɔsɔŋ utom Abasi ke usem emana nnyin.

¹²Ndien idem akpa mmɔ kpukpru, mmɔ inyuŋ ifiɔkke se ekpekerede, enyuŋ edɔhɔ kiet eken ete, Ŋkpɔ emi edi nso?

¹³Edi mmɔ efen esak, ete, Eyuhɔ obufa wine.

¹⁴Edi Peter adaha ke enyɔŋ ye mbet duopekiet, emenere uyo esie, ɔdɔhɔ mmɔ ete, Mbufo mbon Judaea, ye kpukpru mbufo emi eduŋde ke Jerusalem, efiɔk emi, enyuŋ ekpaŋ utɔŋ ekop ikɔ mi.

¹⁵Koro mmɔ emi ikpaha mmin nte mbufo ekerede; sia edide hour usukkiet usenubɔk.

¹⁶Edi emi edi se prophet Joel eketiŋde, ete,

¹⁷Abasi ɔdɔhɔ ete, Ama ekem ke ukperedem ini, Nyeŋwaŋa Spirit Mi ndori kpukpru obukidem: Ndien nditɔ-iren mbufo ye nditɔ mbufo iban eyetiŋ prophecy, Mkparawa mbufo eyekut ŋkukut, Mbiowo mbufo eyenyuŋ edaba ndap:

¹⁸Ke eyo oro nyeŋwaŋa Spirit Mi Ndori ifin iren Mi ye ifin iban Mi; Mmɔ eyenyuŋ etiŋ prophecy.

¹⁹Ndien nyenɔ mme utibe ŋkpɔ ke ikpa-enyɔŋ ke enyɔŋ, Ye mme idiɔŋɔ ke isɔŋ ke idak; Iyip ye ikaŋ ye uye nsuŋikaŋ:

²⁰Utin eyekabare edi ekim Ɔfiɔŋ eyenyuŋ akabare edi iyip, Ndien akwa usen Jehovah emi ɔwɔrɔde etop edidi:

²¹Ama ekem, eyenyaŋa kpukpru owo eke esemde ekot enyiŋ Jehovah.

²²Mbufo nditɔ Israel, ekop ikɔ emi: Jesus eyen Nazareth, owo emi Abasi onyimede ke otu mbufo ke mkpɔsɔŋ utom ye mme utibe ŋkpɔ ye mme idiɔŋɔ eke Abasi adade ubɔk Esie anam ke otu mbufo, nte mbufo ke idem mbufo efiɔkde;

²³ke ɔkpɔsɔŋ uduak ye mbe-iso ifiɔk Abasi ke ekeda kpa Jesus emi eyak ke ubɔk mme anana-ibet, ekɔŋ ke cross ewot.

²⁴Edi Abasi amatat ubiak mkpa anam Enye eset: koro mkpa mikemeke ndimum Enye ŋkama.

²⁵Koro David ɔdɔhɔ abaŋa Enye ete, Mmokut Jehovah ke iso Mi kpukpru ini; Koro Enye odude Mi ke ubɔk nnasia, mbak edisehere mi:

²⁶Mmɔdo esit adatde mi, edeme mi onyuŋ adarade; Obukidem mi eyenyuŋ etie ke idori-enyin:

²⁷Koro Afo udukpɔŋke ukpɔŋ mi ke obio ekpo, Udunyuŋ uyakke Edisana Owo Fo okut mbiara.

²⁸Afo omowut mi usuŋ uwem; Eyenam mi nnyene ɔyɔhɔ idaresit ke iso Fo.

²⁹Nditɔ-ete, mmekeme nditiŋ ŋkpɔ uko-uko nnɔ mbufo mbaŋa akwa ete nnyin David. Enye ama akpa, ema enyuŋ ebuk enye, ndien udi esie mɔdo ye nnyin tutu osim emi.

³⁰Mmɔdo, sia enye ekededi prophet, onyuŋ ɔfiɔkde ete Abasi ama ɔŋwɔŋɔ ɔnɔ imɔ, ete iyeda mfri idem esie idori ke ebekpo esie;

³¹enye ebem iso okut, onyuŋ etiŋ abaŋa eriset Christ ke mkpa, ete, ikpɔŋke ukpɔŋ Esie ke obio ekpo, obukidem Esie inyuŋ ikwe mbiara.

³²Abasi akanam Jesus emi eset ke mkpa, nte nnyin kpukpru idide mme ntiense.

³³Mmɔdo sia ubɔk nnasia Abasi ama emenere Enye onim ke enyɔŋ, Enye ama onyuŋ ɔbɔ Ete Edisana Spirit emi ekɔŋwɔŋɔde ndinɔ, Enye aŋwaŋa se mbufo ekutde enyuŋ ekopde.

³⁴Koro David ikɔdɔkke ikoduk ke heaven; edi enye ɔdɔhɔ ke idem esie ete, Jehovah ɔdɔhɔ ye Ɔbɔŋ mi, ete, Tie Mi ke ubɔk nnasia,

³⁵Tutu nda mme asua Fo nnim Fi ke udori-ukot.

³⁶Mmɔdo yak ofuri ufɔk Israel etim efiɔk ete, Abasi ama anam Enye edi ɔbɔŋ ye Christ, kpa Jesus emi mbufo ekewotde ke cross.

³⁷Kadaŋemi mmɔ ekopde ikɔ emi, esit amia mmɔ, mmɔ enyuŋ edɔhɔ Peter ye mme apostle eken ete, Nditɔ-ete, inam didie?

³⁸Edi Peter ɔbɔrɔ mmɔ ete, Mbufo ekabare esit, enyuŋ ena bpatism, kpukpru mbufo, ke enyiŋ Jesus Christ, man efen mme idiɔk-ŋkpɔ mbufo; ndien mbufo eyebɔ Edisana Spirit nte enɔ.

³⁹Koro uŋwɔŋɔ oro enyene mbufo ye nditɔ mbufo ye kpukpru mmɔ emi edude nsan-nsan, adaŋa owo nte Jehovah Abasi nnyin edikotde etiene Enye.

⁴⁰Peter onyuŋ emen ediwak ikɔ efen etiŋ ɔnɔ mmɔ, onyuŋ akpak mmɔ ete, Enyaŋa idem mbufo esio ke ŋkwaŋa emana emi.

⁴¹Ntre ke mmɔ emi enyimede ikɔ esie ena baptism: ndien usen oro adaŋa nte thousand owo ita ediana ye mmɔ.

⁴²Mmɔ oro enyuŋ edɔdiɔŋ esin ifik ke erikpep ye nsaŋa mme apostle, ye ke eribuŋ uyo ye ke akam.

⁴³Edi ndik odoro kpukpru owo ke idem; mme apostle enyuŋ enam ediwak mme utibe-ŋkpɔ ye mme idiɔŋɔ.

⁴⁴Ndien kpukpru mmɔ emi enimde ke akpanikɔ edu ɔtɔ kiet, enyuŋ ebuana kpukpru ŋkpɔ;

⁴⁵mmɔ enyuŋ enyam inyene mmɔ ye ŋkpɔ mmɔ, edeme enɔ kpukpru owo, adaŋa nte owo ekededi ananade.

⁴⁶Ndien ke usen ke usen mmɔ enyene iwuk edu ke temple ye esit kiet, enyuŋ ebuŋ uyo ke ufɔk, mmɔ edia udia ke idaresit ye esit kiet, etoro Abasi; kpukpru owo enyuŋ enen iso ye mmɔ.

⁴⁷Ndien Ɔbɔŋ ada mmɔ emi ke enyanyaŋa adian ye mmɔ ke usen ke usen.