Read efik UTOM MME APOSTLE 20 Bible Online

UTOM MME APOSTLE 20 - efik bible

UTOM MME APOSTLE 20

¹EDI ke ndutime ama ekebe, Paul ɔdɔŋ ekokot mbet edi, onyuŋ ɔnɔ mmɔ item, ndien ɔkɔm mmɔ unyɔŋ adaha aka ke Macedonia.

²Edi ke ini enye ama akasaŋa ke edem oro ɔnɔ mmɔ ediwak item, enye edi ke Greece;

³onyuŋ etie do ke ɔfiɔŋ ita. Ke ini enye oyomde ndisio ŋka Syria, mme Jew eduk odu ebaŋa enye; ntre ke enye aduak ete iyefiak isaŋa ke Macedonia ibe.

⁴Ndien mmɔ emi edade enye ekeyak ke Asia edi Sopater eyen Pyrrhus, owo Beroea; ye Aristarchus ye Secundus, nditɔ Thessalonica; ye Gaius, owo Derbe; ye Timothy; ye Tychicus ye Trophimus, nditɔ Asia.

⁵Edi mmɔ ema ekebem iso eka ekebet nnyin ke Troas.

⁶Edi nnyin isio ke Philippi ke mme usen usɔrɔ uyo eke leaven miduhe ema ekebe, inyuŋ idi idisim mmɔ ke Troas ke usen ition; nnyin inyuŋ idaŋ do ke usen itiaba.

⁷Edi ke akpa usen urua, ke ini nnyin ibonode ɔtɔ kiet ndibuŋ uyo, Paul ɔkwɔrɔ ikɔ ɔnɔ mmɔ, koro enye aduakde ndikpɔŋ mmɔ ke ndaŋ-nsiere; enye onyuŋ etiŋ ikɔ tutu osim ufɔt okoneyo.

⁸Ediwak utuenikaŋ enyuŋ edu ke ubet enyɔŋ, emi nnyin ibonode ke esit.

⁹Edi akparawa kiet, emi ekerede Eutychus, etie ke window, ɔkpɔsɔŋ idap onyuŋ omum enye; ndien nte Paul ɔdiɔŋde diɔŋ ɔkwɔrɔ ikɔ, idap akan enye, enye onyuŋ oto ke ɔyɔhɔ enyɔŋ ita ɔduɔ ke isɔŋ, ndien ke ini mmɔ emende enye, enye ama akpa.

¹⁰Edi Paul ɔsuhɔre, ɔduɔ ofuk enye, onyuŋ afat enye, ete mmɔ, Ekunam ndutime, koro uwem odu enye ke idem.

¹¹Ndien Paul afiak ɔdɔk enyɔŋ okobuŋ uyo, ata; ndien ke enye ama ekeneme nneme ye mmɔ ebigi, osim usiere, enye ɔkpɔŋ mmɔ ɔnyɔŋ.

¹²Edi mmɔ eda akparawa oro edi ye uwem, enyuŋ ekop idɔŋesit eti-eti.

¹³Edi nnyin ibem iso idiere ke ubom, isio ika Assos ye uduak ite iyeda Paul do isin ke ubom: koro enye okonimde ete ekpedi ntre, sia enye akaduakde ke idem esie ndisaŋa obot-obot.

¹⁴Ndien ke adaŋemi enye osobode nnyin ke Assos, nnyin ida enye isin ke ubom, isio idi ke Mitylene.

¹⁵Ke ini isiode do, nnyin iwat idikem iso ye Chios ke usen efen; ke ndaŋ-nsiere nnyin idian ke Samos; ndien ke ɔyɔhɔ usen ita nnyin isim Miletus.

¹⁶Koro Paul akaduakde ndiwat mbe Ephesus, mbak enye edibigi ke Asia; koro enye emen idem ete idu ke Jerusalem ke usen Pentecost, edieke imɔ ikemede.

¹⁷Edi enye etie ke Miletus ɔdɔŋ ete eka ke Ephesus ekekot mbiowo ufɔk Abasi edi.

¹⁸Ndien ke ini mmɔ edide, enye ɔdɔhɔ mmɔ ete, Tɔŋɔ ke usen emi ndide ke Asia mbufo ke idem mbufo emefiɔk adaŋa nte ndude uwem ke otu mbufo kpukpru ini, nnam ŋkpɔ nnɔ Ɔbɔŋ ke ata nsukesit,

¹⁹ke ufɔt mmɔŋ-eyet ye idomo eke otode mme odu mme Jew osim mi.

²⁰Mbufo emefiɔk ete ŋkefeheke ndisian mbufo se ededi eke odorode mbufo ŋkpɔ, mma nnyuŋ ŋkpep mbufo ŋkpɔ aŋwa-aŋwa,

²¹nnyuŋ ŋkpep mbufo ke ufɔk ke ufɔk, ŋkwɔrɔ nnɔ mme Jew ye mme Greek, nte mmɔ ekabare esit etiene Abasi, enyuŋ ebuɔt idem ye Ɔbɔŋ nnyin Jesus Christ.

²²Ndien ke emi sese Spirit enyik mi ete ŋka Jerusalem; ndien mfiɔkke se idiwɔrɔde mi do,

²³ke mibɔhɔke emi Edisana Spirit ɔdɔhɔde mi ke kpukpru obio ete ŋkpɔkɔbi ye ukut ke ena ebet mi.

²⁴Edi mbatke uwem mi ke ŋkpɔ, man ŋkeme ndifehe mbuba mi mma, nnyuŋ nnam utom oro Ɔbɔŋ Jesus ɔnɔde mi, ete ŋkwɔrɔ gospel mfɔn Abasi.

²⁵Ndien ke emi, sese, mmɔfiɔk nte kpukpru mbufo emi ŋkasasaŋa ke otu mbufo ŋkwɔrɔ Ubɔŋ Abasi, idikwe iso mi aba.

²⁶Mmɔdo mmɔsɔŋɔ ndɔhɔ ke iso mbufo mfin emi nte, Iyip owo baba kiet ikɔbɔke mi.

²⁷Koro mmeŋkefeheke ndikwɔrɔ ofuri uduak Abasi nnɔ mbufo.

²⁸Etim ese idem mbufo, ye ofuri otu erɔŋ, emi Edisana Spirit okonimde mbufo ke mme andikpeme mmɔ, ete ebɔk mbon ufɔk Abasi, emi Enye ekedepde ke iyip Esie.

²⁹Mmɔfiɔk nte ke mma nnyɔŋ, mme idiɔk unam eyeduk ke otu mbufo, idiyuŋ ituaha otu erɔŋ mbɔm;

³⁰mme owo eyenyuŋ edaha eda ke otu mbufo etiŋ ukwaŋ ikɔ, man edudi mbet etiene mmɔ.

³¹Ekpeme ndien, enyuŋ eti ete ofuri isua ita ŋketreke nditeme kpukpru owo ke okoneyo ye uwemeyo ye mmɔŋ-eyet.

³²Ndien ke emi mmayak mbufo nsin ke ubɔk Abasi, ye ke ikɔ mfɔn Esie, emi enyenede odudu ndinam mbufo ekɔri esɔŋɔ idem, nnyuŋ nnɔ mbufo udeme ke otu mmɔ emi enamde mmɔ esana.

³³Ŋkesinde esit ke silver, mme gold, mme edisine-ŋkpɔ owo baba kiet.

³⁴Mbufo ke idem mbufo emefiɔk ete ŋkada ubɔk mi emi ŋwana idem nyom se inanade mi, ye se inanade mmɔ emi edude ye ami.

³⁵Ke kpukpru ŋkpɔ ŋkɔnɔ mbufo uwut-ŋkpɔ, man mbufo enam utom ntem eŋwam mbio mmem-idem, enyuŋ eti ikɔ Ɔbɔŋ Jesus, emi Enye ɔdɔhɔde ete, Ɔfɔn ndinɔ akan ndibɔ.

³⁶Ndien ke enye ama eketiŋ ntem, enye ɔtɔŋɔ edɔŋ ɔbɔŋ akam ye mmɔ kpukpru.

³⁷Kpukpru mmɔ etua eti-eti, enyuŋ ewaŋa Paul ke itɔŋ etim enye inua;

³⁸mfuhɔ anam mmɔ akan abaŋa ikɔ oro enye etiŋde ete mmɔ idikwe imɔ iso aba. Ndien mmɔ esaŋa ntre eda enye ekeyak ke ubom.