Read efik UTOM MME APOSTLE 22 Bible Online

UTOM MME APOSTLE 22 - efik bible

UTOM MME APOSTLE 22

¹NDITƆ-ETE ye mme ete, ekop ŋkaŋ-idem eke ŋkaŋde nnɔ mbufo.

²Ke ini mmɔ ekopde nte enye etiŋde ye mmɔ ke usem Hebrew, mmɔ edobo ekan: ndien enye ɔdɔhɔ mmɔ ete,

³Ndi Jew, ŋkamana ke Tarsus ke Cilicia, edi ŋkɔkɔri ke obio emi, ntie ke ukot Gamaliel, ŋkpep ɔkpɔsɔŋ ibet mme ete nnyin, mma nnyuŋ nnyene ufup mbaŋa Abasi, kpa nte kpukpru mbufo enyenede mfin emi.

⁴Mma ŋkɔbɔ Usuŋ emi tutu mbiat uwem owo, mma ŋkɔbi irenowo ye iban ŋko, nda mmɔ nsin ke ufɔk-ŋkpɔkɔbi;

⁵nte akwa oku ye kpukpru ŋka mbiowo ekemede nditiŋ. Mma mbɔ ŋwed ŋko ke ubɔk mmɔ ndida nsɔk nditɔ-ete ke Damascus, nnyuŋ nsaŋa ŋka edem oro, man ŋkɔbi mmɔ eke edude do nde nda ndi ke Jerusalem, man enɔ mmɔ ufen.

⁶Edikem, nte nsaŋade ke usuŋ ŋkpere Damascus, ke ekperede ufɔt uwemeyo, ɔkpɔsɔŋ uŋwana oto ke enyɔŋ asiaha ayama akan mi okuk.

⁷Ndien nduɔ ke isɔŋ, nnyuŋ ŋkop uyo nte ɔdɔhɔde mi ete, Saul, Saul, nsinam afo ɔkɔbɔde Mi?

⁸Edi mbɔrɔ nte, Afo edi anie, Ɔbɔŋ? Ndien Enye ete mi, Ndi Jesus eyen Nazareth, emi afo ɔkɔbɔde.

⁹Mmɔ emi esaŋade ye ami ekut uŋwana, edi ikopke uyo owo eke etiŋde ikɔ ye ami.

¹⁰Edi mbup nte, Ɔbɔŋ, nso ke nnam? Ɔbɔŋ ɔdɔhɔ mi ete, Daha ke enyɔŋ, duk ke Damascus; do eyeteme fi kpukpru se enimde ete anam.

¹¹Edi sia mmeŋkemeke ndikut usuŋ ɔnɔ uyama uŋwana oro, mmɔ emi edude ye ami emum mi ubɔk esaŋa; ntre ke ndiduk ke Damascus.

¹²Ndien Ananias, owo kiet emi anamde ŋkpɔ ɔnɔ Abasi nte ibet etemede, onyuŋ ɔwɔrɔde eti etop ke otu kpukpru mme Jew emi eduŋde do, etiene mi, ada ekpere, ɔdɔhɔ mi ete, Saul, eyen-ete mi, kut usuŋ.

¹³Kpa idaha oro mmenere enyin ŋkut enye.

¹⁴Enye onyuŋ ɔdɔhɔ ete, Abasi mme ete nnyin omonim fi ete ɔfiɔk uduak Imɔ, onyuŋ okut Enye emi enende, onyuŋ okop ikɔ eke otode Enye ke inua.

¹⁵Koro afo eyedi ntiense Esie ɔnɔ kpukpru owo abaŋa se afo okokutde onyuŋ okopde.

¹⁶Ndien ke ebebet nso naŋa? Daha ke enyɔŋ, kana baptism, nyuŋ yet mme idiɔk-ŋkpɔ fo fep ke eriseme ŋkot enyiŋ Esie.

¹⁷Ekem ke mma ŋkafiak nnyɔŋ Jerusalem, nte ntiede ke temple mbɔŋ akam, etie mi nte esiode mi ke ikpɔhidem,

¹⁸nnyuŋ ŋkut Enye nte etiŋde ikɔ ye ami, ete mi, Sɔsɔp idem, wara daha, kpɔŋ Jerusalem: koro mmɔ midikopke ikɔ-ntiense eke afo editiŋde abaŋa Mi.

¹⁹Edi ndɔhɔ nte, Ɔbɔŋ, mmɔ ke idem mmɔ efiɔk ete, mma nsin mmɔ eke ebuɔtde idem ye Afo ke ufɔk-ŋkpɔkɔbi, nnyuŋ ntim mmɔ ke kpukpru synagogue;

²⁰ndien ke ini eduɔkde iyip Stephen ntiense Fo, mma nnyuŋ nda do nnyime se enamde, nnyuŋ ŋkpeme ɔfɔŋidem mme andiwot enye.

²¹Edi Enye ɔdɔhɔ mi ete, Daha: koro nyedɔŋ fi aka anyan usuŋ eketiene mme Gentile.

²²Mmɔ ekpaŋ utɔŋ enɔ enye tutu osim ikɔ emi; ndien mmɔ emenere uyo ete, Esio oruk owo emi ke ererimbot efep: enye idotke ndidu uwem.

²³Ndien nte mmɔ efioride ntem, enyuŋ efɔrɔre ɔfɔŋidem mmɔ, etop ntan ke enyɔŋ, akamba etubom ɔnɔ uyo ete,

²⁴eda enye eduk ke ufɔk mbon-ekɔŋ, onyuŋ ɔdɔhɔ ete, emia enye ebup enye mbume, man imɔ ifiɔk ntak eke mmɔ efioride enye ntem.

²⁵Edi ke ini mmɔ ebɔpde enye ke uruk, Paul obup centurion emi adade do, ete, Mme enen afo ndimia eyen-isɔŋ Rome ke ini mibiomke enye ikpe?

²⁶Edi ke ini centurion okopde ikɔ emi, enye adaha etiene akamba etubom ɔkɔdɔhɔ enye ete, Ɔmɔŋ anam didie? Owo emi edi eyen-isɔŋ Rome.

²⁷Ntre ke akamba etubom edi edidɔhɔ enye ete, Sian mi mme afo edi eyen-Rome? Ndien Paul ete, Edi ntre.

²⁸Akamba etubom ete, Ŋkada ediwak okuk ndep itie eyen-isɔŋ emi. Edi Paul ete, Ami ŋkamana eyen-isɔŋ Rome.

²⁹Ndien mmɔ emi eyomde ndibup enye mbume edaha ekpɔŋ enye ini kiet: akamba etubom onyuŋ edikhe, ke ini enye ɔfiɔkde ete Paul edi eyen-isɔŋ Rome, imɔ ima inyuŋ ibɔp enye ke uruk.

³⁰Ke ndaŋ-nsiere, sia enye oyomde ndifiɔk akpan ntak eke esinde mme Jew edori Paul ikɔ, atat enye, onyuŋ okot ikpɔ oku ye ofuri esop ebono ɔtɔ kiet, onyuŋ ada enye ɔsuhɔre edi ediwuk ke iso mmɔ.