Read efik UTOM MME APOSTLE 23 Bible Online

UTOM MME APOSTLE 23 - efik bible

UTOM MME APOSTLE 23

¹PAUL owuk enyin ese esop, onyuŋ ɔdɔhɔ ete, Nditɔ-ete, mma nda esit eke mibiomke mi ke baba ŋkpɔ kiet ndu uwem ke iso Abasi tutu osim emi.

²Edi Ananias akwa oku ɔdɔhɔ mmɔ emi edade ekpere Paul, ete eyibi enye ufia ke inua.

³Ekem Paul ete enye, Abasi eyeyibi fi, emi ebietde ibibene emi eyetde ndom. Nte afo etie mi ada ibet ekpe ikpe ye ami, onyuŋ abiat ibet ke erinɔ uyo ete eyibi mi ufia?

⁴Edi mmɔ emi edade ekpere Paul ete enye, Nte afo esuene akwa oku Abasi?

⁵Paul ete, Nditɔ-ete, mfiɔkke nte enye edi akwa oku; koro ewetde ete, Kutiŋ idiɔk ikɔ udian andikara mbio-obio mbufo.

⁶Ke adaŋemi Paul okutde ete ubak mbon esop edi mme Sadducee, ubak eken edi mme Pahrisee, enye ofiori ke esop, ete, Nditɔ-ete, ndi Pharisee, eyen Pharisee: ekot mi ikpe ebaŋa idori-enyin ye esriset ke mkpa.

⁷Ekem ke enye ama eketiŋ ntem, eneni otibe ke ufɔt mme Pharisee ye mme Sadducee: esop onyuŋ abahare.

⁸Koro mme Sadducee edɔhɔ ete, eriset ke mkpa iduhe, angel ye spirit inyuŋ iduhe: edi mme Pharisee enyime ete mbiba edu.

⁹Ntem ke akwa ndutime otibe, ndusuk mme scribe emi etode ke otu mme Pharisee enyuŋ edaha ke enyɔŋ esɔŋɔ eneni, ete, Nnyin ikwe idiɔk ke idem owo emi: nso ikpan ite spirit mme angel okutiŋ ikɔ ye enye?

¹⁰Ndien ke ini eneni ɔsɔŋde, akamba etubom efehe ndik, ete mmɔ eyewai Paul mbai-mbai, onyuŋ ɔnɔ mbon-ekɔŋ uyo ete, esuhɔre ekewamare enye esio mmɔ ke ubɔk, eda enye eduk edi ke ufɔk mbon-ekɔŋ.

¹¹Ndien ke okoneyo eke etienede usen oro, Ɔbɔŋ ada Paul ke ŋkaŋ, ete enye, Sɔŋ esit; koro kpa nte ekedide ntiense ɔnɔ Mi ke Jerusalem, ntre ke eyedi ntiense ke Rome ŋko.

¹²Edi ke ini eyo esierede, mme Jew eduk odu, eda uŋwɔŋɔ ewuk idem mmɔ, ete mme imɔ ididiaha ŋkpɔ inyuŋ iŋwɔŋke ŋkpɔ ibɔhɔke ini iwot Paul.

¹³Mmɔ emi edukde odu emi ebe owo aba.

¹⁴Mmɔ enyuŋ edaha etiene mme oku ye mbiowo ekedɔhɔ mmɔ ete, Nnyin imada ɔkpɔsɔŋ uŋwɔŋɔ iwuk idem nnyin ite, Nnyin iditabike ŋkpɔ tutu nnyin iwot Paul.

¹⁵Ntem mbufo ye mbon esop eka eketiŋ ye akamba etubom ete, ada enye edi ke ɔtɔ mbufo, nte ŋkpɔ eke mbufo eyomde nditim ŋkpe ikpe esie ŋkan; nnyin iyenyuŋ ibeŋe idem ndiwot enye, ke ini enye mikpereke kaŋa.

¹⁶Edi, eyen-eka Paul aŋwan okop abaŋa eridibe emi mmɔ edibede ebet enye; ndien enye edi ediduk ke ufɔk mbon-ekɔŋ, emen asian Paul.

¹⁷Ndien Paul okot centurion kiet edi, ete enye, Da akparawa emi sɔk akamba etubom: koro enye enyenede se etiŋde ɔnɔ enye.

¹⁸Ntre ke centurion ada enye ɔsɔk akamba etubom, onyuŋ ɔdɔhɔ ete, Owo-ŋkpɔkɔbi emi ekerede Paul okot mi ndi, ndien enye ebeŋe mi ete, nda akparawa emi nsɔk fi; koro enye enyenede ŋkpɔ nditiŋ nɔ fi.

¹⁹Ndien akamba etubom omum akparawa oro ke ubɔk, esehere ada obup enye ndibe-ndibe, ete, Nso ke enyene nditiŋ nnɔ mi?

²⁰Enye ɔbɔrɔ ete, Mme Jew ema ediomi ete iyebeŋe fi ada Paul ɔsuhɔre edi ke esop mkpɔŋ, nte ŋkpɔ afo oyomde nditim mbup mbume mbaŋa enye ŋkan.

²¹Ntem kunyime unɔ mmɔ: koro ebe owo mmɔ aba edibe ebet enye: mmɔ oro enyuŋ eda uŋwɔŋɔ ewuk idem mmɔ, ete, mme imɔ ididiaha ŋkpɔ inyuŋ iŋwɔŋke ŋkpɔ tutu iwot enye: ndien ke emi mmɔ ebeŋe idem, enyuŋ etie ebet erinyime fo.

²²Ntre ke akamba etubom mbonekɔŋ ayak akparawa oro ɔnyɔŋ, edi owuk enye ete, Kutiŋ unɔ baba owo kiet ete, imasian mi ŋkpɔ emi.

²³Ndien enye okot centurion iba edi, onyuŋ ɔdɔhɔ mmɔ ete, Enam mbon-ekɔŋ ikie iba, ye mbon horse ata ye duop, ye mbon eduat ikie iba ebeŋe idem ndika Caesarea ke ɔyɔhɔ hour usukkiet ke okoneyo;

²⁴enye onyuŋ ɔnɔ uyo ete, eda mme horse edi, man Paul odoro ke esit, eda enye ke ifure esɔk Felix andikara.

²⁵Enye onyuŋ ewet ŋwed ntem, ete;

²⁶Claudius Lysia ewet ɔnɔ esɔk Felix, ata eti Ɔbɔŋ, ɔnɔ ekɔm.

²⁷Mme Jew emum owo emi, eyom enye ndiwot; edi nda mbon-ekɔŋ mbine mmɔ ŋkanyaŋa enye, sia ŋkopde nte enye edi eyen-isɔŋ Rome.

²⁸Ndien sia ɔdɔŋde mi ndifiɔk ntak eke mmɔ edoride enye ikɔ, nda enye nsuhɔre ŋka esop mmɔ:

²⁹do ŋkut nte mmɔ edoride enye ikɔ ebaŋa ibet mmɔ, edi midorike enye baba ikɔ kiet eke odotde mkpa me ŋkpɔkɔbi.

³⁰Edi ema esian mi ete mmɔ eyom ndiduk odu mbaŋa owo emi; ntre nnɔ enye esɔk fi ini kiet, mmonyuŋ ndɔhɔ mme andidori enye ikɔ, nte, mmɔ editiŋ ikɔ edian enye ke iso fo.

³¹Ntre ke mbon-ekɔŋ eda Paul ke okoneyo edi ke Antipatris, nte etemede mmɔ.

³²Edi ke ndaŋ-nsiere mmɔ efiak enyɔŋ ke ufɔk mbon-ekɔŋ, eyak mbon horse eda enye eka:

³³ndien ke ini mmɔ oro esimde Caesarea, mmɔ emen ŋwed oro enɔ andikara, enyuŋ esio Paul ewuk enye ke iso.

³⁴Ke adaŋemi enye okotde ŋwed ama, enye obup esien eke enye otode: ndien ke ini ɔfiɔkde ete enye oto ke Cicilia, ete Paul,

³⁵Mmɔ emi edoride fi ikɔ ema edi, nyekop se enyenede nditiŋ. Enye onyuŋ ɔnɔ uyo ete, ekpeme Paul ke akwa ufɔk Herod.