Read efik UTOM MME APOSTLE 24 Bible Online

UTOM MME APOSTLE 24 - efik bible

UTOM MME APOSTLE 24

¹EDI ke ini usen ition ebede, Ananias akwa oku ɔsuhɔre edi ye ndusuk mbiowo ye odori-owo-ikɔ kiet, emi ekerede Tertullus: ndien mmɔ etiŋ ikɔ edian Paul enɔ andikara.

²Ke ini ekotde Paul edi, Tertullus ɔtɔŋɔ ndidori enye ikɔ ntem, ete, Sia otode fi ke nnyin ikut ata emem, afo onyuŋ adade eti ekikere fo eneŋere se idiɔkde ke edem emi,

³nnyin imada esit ekɔm ibɔ ufɔn emi ke kpukpru usuŋ ye ke kpukpru ebiet, ata eti Felix.

⁴Edi nyomke ndifek fi ŋka iso; ntre ke mmekpe fi ubɔk nte okop ekpri ikɔ nnyin ke mfɔn-ido fo.

⁵Koro nnyin imokut ite owo emi edi owo afanikɔŋ; enye edemere nsɔŋ-ibuot ke otu kpukpru mme Jew emi edude ke ofuri ererimbot, onyuŋ edi ebe-iso owo ke otu ŋka emi etienede Jesus eyen Nazareth.

⁶Enye okodomo ndisabare temple ŋko-ŋko; edi nnyin imum enye, inyuŋ iyom ndibiere ikpe esie nte ibet etemede.

⁷Edi Lysias asaŋa ye mbon ekɔŋ edibɔ enye ke odudu osio nnyin ke ubɔk.

⁸Ama obup enye ke idem fo, eyekeme ndifiɔk mbaŋa kpukpru ŋkpɔ eke itiŋde idian enye.

⁹Mme Jew enyuŋ edian uyo edori enye ikɔ, ete, se etiŋde edi ntre.

¹⁰Ndien ke ini andikara ofuŋde ubɔk ɔnɔ enye ete etiŋ ikɔ, Paul ɔbɔrɔ ete, Sia mfiɔkde nte afo edi ebierikpe ɔnɔ mbon edem emi ke ediwak isua, enem mi esit ndikaŋ idem:

¹¹koro ibehe usen duopeba nte ŋkɔdɔk ŋka Jerusalem ndituak ibuot nnɔ Abasi, nte afo ekemede ndibup mfiɔk.

¹²Mmɔ ikwe mi nte nnenide eneni ye owo ke temple, mme nte ndemerede otu owo ke mme synagogue me ke obio.

¹³Mmɔ ikemeke ndiwut fi, ete, se mme imɔ etiŋde idian mi edi akpanikɔ.

¹⁴Edi mmonyime ke iso fo, nte nsaŋa ke usuŋ emi mmɔ ekotde isio erikpep nnam ŋkpɔ nnɔ Abasi mme ete nnyin; edi mmonim kpukpru se ewetde ke ibet ye mme prophet ke akpanikɔ:

¹⁵Mmonyuŋ ndori enyin ke Abasi, kpa nte mmɔ nde edoride, nte, nti owo ye mme idiɔk owo eyeset ke mkpa.

¹⁶Ntem ke ŋwana kpukpru ini ndinyene esit eke minyeneke se eduede Abasi ye owo.

¹⁷Ke emi, ke ediwak isua ema ekebe, ndi edem emi ndida enɔ nsɔk mbio-obio nnyin nnyuŋ ŋwa uwa.

¹⁸Ke ufɔt utom oro mmɔ ekut mi ke temple, nte owo eke ama akanam idem asana; nsaŋake ye otu, nnyuŋ nsaŋake ke ndutime. Edi ndusuk mme Jew emi etode Asia etibi afanikɔŋ emi;

¹⁹ndien mmɔ ekpodu mi ke iso fo, nditiŋ ŋkpɔ ndian mi, edieke mmɔ enyenede se etiŋde ye ami.

²⁰Minyuŋ idige ntre, yak mmɔ emi ke idem mmɔ etiŋ ndudue eke mmɔ ekutde mi ke idem, ke ini ndade ke iso esop,

²¹ke mibɔhɔke uyo kiet oro nsiorode, ke ini ndade ke ufɔt mmɔ, nte, Ekot mi ikpe ke iso mbufo mfin emi ebaŋa eriset mme akpa-mkpa.

²²Edi sia Felix ɔfiɔkde abaŋa Usuŋ oro akan, enye ɔnɔ mmɔ uyo ete ebet; onyuŋ ɔdɔhɔ mmɔ ete, Lysia akwa etubom mbon-ekɔŋ ama ɔsuhɔre edi, nyebiere ikɔ mbufo.

²³Enye onyuŋ ɔnɔ centurion uyo, ete ekpeme Paul nte owo-ŋkpɔkɔbi, edi ɔfɔn ido ye enye, okunyuŋ ɔbiɔŋɔ mme ufan esie ndise mbaŋa enye.

²⁴Edi ke ndusuk usen ema ekebe, Felix asaŋa ye ŋwan esie Drusilla, emi edide Jew aŋwan edi. Enye ɔdɔŋ ekekot Paul edi, onyuŋ okop se Paul enyenede nditiŋ mbaŋa mbuɔtidem ye Christ Jesus.

²⁵Edi ke adaŋemi Paul ebuende ikɔ abaŋa edinen ido, ye mfara idem, ye ikpe eke edidide, Felix edikhe, onyuŋ ɔdɔhɔ Paul ete, Ka okuo kaŋa; mma nnyene ifet, nyetɔŋɔ ntak ŋkot fi edi.

²⁶Enye odori enyin ete Paul eyenɔ imɔ okuk: ntre ke enye awak ndidɔŋ ekekot Paul, ndinyuŋ nneme nneme ye enye.

²⁷Edi ke adaŋemi isua iba ebede, Porcius Festus ada itie Felix: ndien sia Felix oyomde mme Jew enen-iso ye enye, enye ɔkpɔŋ Paul ke itie ŋkpɔkɔbi.