Read efik UTOM MME APOSTLE 26 Bible Online

UTOM MME APOSTLE 26 - efik bible

UTOM MME APOSTLE 26

¹EKEM Agrippa ɔdɔhɔ Paul ete, Enɔ fi ifet nditiŋ ŋkpɔ mbaŋa idem fo. Ntem ke Paul anyanare ubɔk etiŋ ikɔ akaŋ idem, ete,

²Edidem Agrippa, mbat nte edi mfɔn-iso ye ami nditiŋ ŋkpɔ ŋkaŋ idem mi ke iso fo mfin emi, mbaŋa kpukpru ikɔ eke mme Jew edoride mi:

³akpan-akpan koro afo otimde ɔfiɔk kpukpru ido ye ikɔ eke edude ke otu mme Jew: mmɔdo mmekpe fi ubɔk nte okop uyo mi, enyene ime.

⁴Kpukpru mme Jew efiɔk ido uwem mi toto uyen, eke ndude toto ke eritɔŋɔ ke otu mbio-obio mi ye ke Jerusalem;

⁵mmɔ efiɔk ebaŋa mi toto ke eritɔŋɔ, edieke mmɔ emade nditiŋ, ete, ŋkodu uwem nte Pharisee, ntiene ido ŋka oro etimde enim ido Abasi nnyin.

⁶Ndien ke emi nda mi man ekpe ikpe ye ami ebaŋa idorienyin uŋwɔŋɔ oro Abasi ɔkɔŋwɔŋɔde ɔnɔ mme ete nnyin:

⁷kpa uŋwɔŋɔ emi mme esien nnyin duopeba esinde ifik enam ŋkpɔ enɔ Abasi okoneyo ye uwemeyo edori enyin ndida nnyene. Edi kabaŋa idori-enyin emi ke mme Jew edori mi ikɔ, O edidem.

⁸Nsinam akakde mbufo ndinim ke akpanikɔ ete Abasi anam mme akpa-mkpa eset?

⁹Ke akpanikɔ ami ŋkekere ke idem mi nte ŋkpanam ediwak ŋkpɔ ŋwana ye enyiŋ Jesus eyen Nazareth.

¹⁰Mma nnyuŋ nnam ntem ke Jerusalem, ndien ŋkɔbi ediwak nti owo mbaha ke ufɔk-ŋkpɔkɔbi, ke mbɔde odudu ke ubɔk ikpɔ oku: ndien ke ini eyomde ndiwot mmɔ, nnyime ewot.

¹¹Ŋwak ŋko ndinɔ mmɔ ufen ke kpukpru mme synagogue, nnyuŋ ŋwana ndinam mmɔ esuŋi Jesus; ndien ke eridama eke ndamade ye mmɔ, nsin mmɔ enyin tutu nsim mme obio mme idut.

¹²Edi ke ini ndade odudu ye uyo ke ubɔk ikpɔ oku nsaŋa ŋka Damascus kpa ke mbubehe emi,

¹³ke ufɔt uwemeyo, O edidem, nte nsaŋade ke usuŋ, ŋkut uŋwana eke otode ke enyɔŋ, eke esemde akan utin, nte ayamade akanare mi ye mmɔ emi esaŋade ye ami okuk.

¹⁴Ndien ke adaŋemi nnyin kpukpru iduɔŋɔde ke isɔŋ, ŋkop uyo nte ɔdɔhɔde mi ke usem Hebrew, ete, Saul, Saul, nsinam afo ɔkɔbɔde mi? edi ɔkpɔsɔŋ ŋkpɔ ye afo nditiga ŋkimenaŋ.

¹⁵Ami nte, afo edi anie, Ɔbɔŋ? Ndien Ɔbɔŋ ete, ami ndi Jesus emi afo ɔkɔbɔde.

¹⁶Edi daha ke enyɔŋ, dada: koro mma nyarare idem nnɔ fi, man nnim fi nte asaŋutom ye ntiense ŋkpɔ emi okutde mi ke esit, ye ŋkpɔ emi ndidade ŋwut fi Idem Mi;

¹⁷ndien nyenyaŋa fi nsio ke ubɔk mbio-obio ye ke ubɔk mme Gentile, emi ndidɔŋde fi ke ɔtɔ mmɔ,

¹⁸nte atat mmɔ enyin, man mmɔ ekabare ewɔŋɔ ke ekim, eduk ke uŋwana, ekpɔŋ odudu Satan, etiene Abasi, man mmɔ ebɔ erifen mme idiɔk-ŋkpɔ ye udeme ke otu mmɔ emi enamde mmɔ esana oto ke mbuɔtidem mmɔ ye ami.

¹⁹Mmɔdo, O edidem Agrippa, ŋkɔsɔŋke ibuot ye ŋkukut emi otode ke heaven:

²⁰edi mbem kaŋa iso ŋkwɔrɔ nnɔ mbon Damascus, ye mbon Jerusalem, ye ofuri isɔŋ Judaea, ye mme Gentile nde, nte mmɔ ekabare esit ewɔŋɔre etiene Abasi, enyuŋ enam utom eke odotde erikabare esit.

²¹Emi edi ntak eke mme Jew emumde mi ke temple, eŋwana ndiwot mi.

²²Edi sia nnyenede erinyaŋa ke ubɔk Abasi, ndu uwem tutu osim mfin, ntiŋ ikɔ nte ntiense nnɔ ŋkpri ye ikpɔ owo, ntiŋke baba ŋkpɔ kiet, ibɔhɔke se mme prophet ye Moses ekɔdɔhɔde ete eyetibe:

²³ntiŋ adaŋa nte Christ enyenede ndibiom ukut, ye nte Enye edibemde iso eset ke mkpa, onyuŋ ɔkwɔrɔ uŋwana ɔnɔ mbio-obio ye mme Gentile ŋko.

²⁴Ndien nte Paul etiŋde ikɔ akaŋ idem ntem, Festus okot enye ke ɔkpɔsɔŋ uyo ete, Paul, idat omum fi; akwa ukpep-ŋkpɔ anam fi ɔdɔŋɔ idat.

²⁵Edi Paul ete, Idat inamke mi, ata eti Festus; ntiŋ ikɔ akpanikɔ ye eti ibuot.

²⁶Kpa edidem, emi ntiŋde ikɔ nnɔ enye uko-uko, ɔfiɔk abaŋa ŋkpɔ emi; koro mmobure mfiɔk nte baba ŋkpɔ emi kiet idibeke enye: koro ŋkpɔ emi ikotibeke ke ndibe.

²⁷Edidem Agrippa, nte omonim mme prophet ke akpanikɔ? Mmɔfiɔk nte omonim.

²⁸Ndien Agrippa ɔdɔhɔ Paul ete, Kpa ke ekpri eritiŋ emi ɔdɔŋ fi ndinam mi ŋkabare ndi Christian.

²⁹Ndien Paul ɔdɔhɔ ete, Ye ikɔ mi edide ekpri ye onyuŋ edide ediwak, ɔdɔŋ mi ke iso Abasi, nte afo, ye kpukpru emi ekopde mi mfin emi, ekpekabare edi se ami ndide, ŋkpɔkɔbi emi ikpɔŋ ke nsio mfep.

³⁰Ekem edidem, ye andikara, ye Bernice, edaha ke enyɔŋ, ye mmɔ emi etiede ye mmɔ:

³¹ndien ke mmɔ ema ekewɔŋɔre eda, mmɔ eneme ke otu idem mmɔ ete, Owo emi inamke se idotde mkpa mme ŋkpɔkɔbi.

³²Agrippa ete Festus, Ekpasana enye eyak, edieke enye mikpotomoke ubɔk Caesar.