Read efik UTOM MME APOSTLE 28 Bible Online

UTOM MME APOSTLE 28 - efik bible

UTOM MME APOSTLE 28

¹KE adaŋemi nnyin ibɔhɔde, nnyin ifiɔk ite isuo oro ekere Melita.

²Nditɔ idut oro efɔn ido ye nnyin eti-eti: koro mmɔ ebara ikaŋ, enyuŋ edara kpukpru nnyin, sia ekedide ini edim ye ini tuep.

³Edi ke adaŋemi Paul ataŋde ebek ifia esin ke ikaŋ ufiop esin ibɔm ɔwɔrɔ ediyire enye ke ubɔk.

⁴Ndien ke ini nditɔ idut oro ekutde nte anyan unam oro eyirede enye ke ubɔk, mmɔ eneme ye kiet eken ete, Owo emi itreke tre ndidi owot -owo. Okposuk edi nte enye ɔbɔhɔde inyaŋ, Edinen Ikpe inyimeke enye odu uwem.

⁵Edi enye ekeŋ anyan unam esin ke ikaŋ, ŋkpɔ inyuŋ inamke enye.

⁶Nditɔ idut oro ese ete enye eyefut, midige, ɔduɔ akpa ini kiet: edi ke ini mmɔ etiede ebet anyan ini, minyuŋ ikwe ite ŋkpɔ anam enye, mmɔ ekpuhɔre ekirere, ete, enye edi abasi.

⁷Andikara isuo oro, emi ekerede Publius, enyene iŋwaŋ do ŋkpet-ŋkpet. Enye adara ndikut nnyin, onyuŋ otim akama nnyin usen ita.

⁸Edi ufiopidem ye utɔrɔ-iyip anam ete Publius. Ndien Paul oduk ekese enye, ɔbɔŋ akam, onyuŋ odori enye ubɔk, anam udɔŋɔ okure enye.

⁹Ndien ke ŋkpɔ emi ama ɔkɔwɔrɔ ntem, mmɔ eken emi edɔŋɔde ke isuo edi, enyuŋ ekop nsɔŋidem.

¹⁰Mmɔ enyuŋ ekpono nnyin eti-eti, ndien ke ini iyomde ndisio, mmɔ enɔ nnyin kpukpru se inanade nnyin.

¹¹Ntem ke ɔfiɔŋ ita ema ekebe, nnyin idiere ke ubom Alexandria emi akadiande do ke isuo ke ini ukwɔ; idiɔŋɔ ubom oro edi Amana Iba.

¹²Nnyin idian ke Syracuse, idu do ke usen ita.

¹³Nnyin ito do iwaha ikosim Rhegium: ndien ke usen kiet ama ekebe, ofim usuk ɔtɔŋɔ ndifime, onyuŋ ada nnyin okosim Puteoli ke ndaŋ-nsiere.

¹⁴Nnyin ikut nditɔ-ete do, ndien mmɔ ekpe ete idaŋ ye mme imɔ usen itiaba. Ntre ke nnyin idisim Rome.

¹⁵Ndien kini nditɔ-ete ekopde ebaŋa nnyin, mmɔ ewɔŋɔ edi edisobo ye nnyin ke Aŋwa-urua Appius ye Ufɔk-isen-ita. Ndien ke ini Paul okutde mmɔ, enye ɔkɔm Abasi, onyuŋ okop nsɔŋesit.

¹⁶Ke ini nnyin idukde ke Rome, eyak Paul oduŋ ke idem esie ye owo-ekɔŋ emi ekpemede enye.

¹⁷Ekem ke usen ita ema ekebe, enye okot ikpɔ owo mme Jew obon: ndien ke ini mmɔ ema ekedi edisobo ɔtɔ kiet enye ɔdɔhɔ mmɔ ete, Nditɔ-ete, okposuk edi nte mmenamke mbio-obio nnyin baba ŋkpɔ kiet, mme nnyuŋ mbiatke ido mme ete nnyin, ikɔt nnyin eda mi nte owo-ŋkpɔkɔbi ke Jerusalem esin ke ubɔk mbon Rome.

¹⁸Ke ini mmɔ oro edomode mi, mmɔ eyom ndisana mi nyak, sia ntak miduhe nte ekpewotde mi.

¹⁹Edi ke adaŋemi mme Jew efaŋade, ŋkenyene nditomo ubɔk Caesar: idige koro nnyenede se ntiŋde ndian obio nnyin.

²⁰Oro esin mbeŋe mbufo edi edise mi, enyuŋ eneme nneme ye ami: koro nsine ke ŋkpɔkɔbi emi kabaŋa idori-enyin Israel.

²¹Mmɔ ebɔrɔ enye ete, Nnyin ikɔbɔhɔ ŋwed oto Judaea ibaŋa fi, baba kiet ke otu nditɔ-ete inyuŋ idige ken ndinɔ nnyin idiɔk ntɔt mme mbuk mbaŋa fi.

²²Edi iyom ndikop se ekerede ke inua fo: edi ama edi ŋka emi, nnyin imɔfiɔk ite mme owo etiŋ ŋkpɔ ebiat enye ke kpukpru ebiet.

²³Ntre ke mmɔ emek usen enim enɔ enye, enyuŋ esaŋa uwak-uwak edi ke ebiet emi enye odude. Ndien tɔŋɔ usenubɔk tutu mbubreyo, enye aŋwaŋade ŋkpɔ ɔnɔ mmɔ, ɔkwɔrɔ Ubɔŋ Abasi, onyuŋ osioŋo ikɔ ke ibet Moses ye mme-prophet, aŋwana ndiwɔŋɔre mmɔ esit mbaŋa Jesus.

²⁴Ndusuk mmɔ enim ikɔ emi enye etiŋde ke akpanikɔ, ndusuk inimke.

²⁵Ndien sia ekikere mmɔ misaŋake ukem, mmɔ esuana, ke ini Paul ama eketiŋ ikɔ kiet emi, ete, Edisana Spirit okototim ɔdɔhɔ mme ete mbufo ke

²⁶inua prophet Isaiah, ete, Ka ke ɔtɔ mbio emi kɔdɔhɔ mmɔ ete, Idem erikop mbufo eyekop, edi ifiɔkke se ɔwɔrɔde; idem erikut mbufo eyekut, edi idifiɔkke:

²⁷Koro esit mmɔ emi amakabare odobi, Utɔŋ onyuŋ odobi mmɔ ndikop ikɔ, Mmɔ emenyuŋ ebɔp enyin; Mbak mmɔ edida enyin mmɔ ekut usuŋ, Eda utɔŋ mmɔ ekop ikɔ, Enyuŋ eda esit mmɔ efiɔk ŋkpɔ enyuŋ ekabare, Ndien Ami ŋkɔk mmɔ.

²⁸Efiɔk emi ndien, ete, enɔ erinyaŋa Abasi emi esɔk mme Gentile: mmɔ eyenyuŋ ekpaŋ utɔŋ ekop.

²⁹Ke enye ama eketiŋ ikɔ esie ntem ama, mme Jew edaŋa eda etɔhɔ enyuŋ eneni ke otu idem mmɔ, ndien enyɔŋɔ ufɔk mmɔ kiet kiet.

³⁰Ekem Paul oduŋ ofuri isua iba ke ufɔk eke ekpede okuk ke esit, onyuŋ adara ndikut kpukpru mmɔ eke ekade ekese enye;

³¹enye ɔkwɔrɔ Ubɔŋ Abasi, onyuŋ ekpep mme owo abaŋa Ɔbɔŋ Jesus Christ aŋwa-aŋwa, ndomo owo kiet ikpanke enye.