Read efik UTOM MME APOSTLE 6 Bible Online

UTOM MME APOSTLE 6 - efik bible

UTOM MME APOSTLE 6

¹EDI ke mme usen oro, nte mbet ediɔŋde diɔŋ ewak, mme Jew emi esemde usem Greek esuk mme Hebrew uyo, koro misehe mme ebe-akpa mmɔ ke ini edemede udia ke usen ke usen.

²Edi mme apostle duopeba ekot otu mbet edi, enyuŋ edɔhɔ mmɔ ete, Idige se inemde nnyin ndikpɔŋ ikɔ Abasi ŋkabare ndeme udia.

³Edi, nditɔ-ete, emek owo itiaba, emi enyenede eti enyiŋ, enyuŋ eyɔhɔde ye Edisana Spirit ye ifiɔk, esio ke otu idem mbufo, man nnyin inim mmɔ ndise mbaŋa utom emi.

⁴Edi nnyin iyesuk iyire ke akam ye ke utom ikɔ Abasi.

⁵Ndien ikɔ emi enem ofuri otu owo esit: mmɔ enyuŋ emek Stephen, owo emi ɔyɔhɔde ye mbuɔtidem ye Edisana Spirit, ye Philip, ye Prochorus, ye Nicanor, ye Timon, ye Parmenas, ye Nicolas, owo Antioch emi anamde ŋkpɔ ɔnɔ Abasi ke ido mme Jew;

⁶enyuŋ enim mmɔ ke iso mme apostle: ndien ke mmɔ oro ema ekebɔŋ akam, edori mmɔ ubɔk.

⁷Ndien ikɔ Abasi ɔdɔdiɔŋ asuana; ibat mbet onyuŋ ɔtɔt ke Jerusalem eti-eti; ediwak mme oku enyuŋ esuk ibuot enɔ akpanikɔ.

⁸Edi Stephen, emi mfɔn ye odudu ɔyɔhɔde enye ke idem, anam ikpɔ mme utibe-ŋkpɔ ye mme idiɔŋɔ ke otu mbio-obio.

⁹Edi ndusuk owo eke etode ke synagogue emi ekerede synagogue mme Libertine, ye eke mbon Cyrene, ye eke mbon Alexandria, ye eke mbon Cicilia ye Asia, edaha ke enyɔŋ, eneni eneni ye Stephen.

¹⁰Ndien mmɔ ikemeke ndida ke iso ifiɔk ye

¹¹Spirit eke enye adade etiŋ ikɔ. Ekem mmɔ eduk odu eteme mme owo edɔhɔ ete, Nnyin ima ikop enye nte etiŋde ikɔ-esuene adian Moses ye Abasi. Mmɔ enyuŋ edemere mbio-obio,

¹²ye mbiowo, ye mme scribe, enyuŋ edi edibuat enye, emum, eda eduk ke esop.

¹³Mmɔ enyuŋ esio mme ntienese nsu, emi edɔhɔde ete, Owo emi idopke uyo itre nditiŋ ŋkpɔ ndian edisana ebiet emi ye ibet: koro nnyin ima ikop nte enye ɔdɔhɔde ete,

¹⁴Jesus eyen Nazareth emi eyewuri ebiet emi, onyuŋ ɔkpuhɔre mme ido eke Moses ɔkɔnɔde nnyin ete inim.

¹⁵Ndien ke ini kpukpru mmɔ emi etiede ke esop ewukde enyin ese enye, mmɔ ekut iso esi ete ebiet iso angel.