Read efik UTOM MME APOSTLE 8 Bible Online

UTOM MME APOSTLE 8 - efik bible

UTOM MME APOSTLE 8

¹EDI Saul onyime ewot enye. Ke usen oro akwa isin-enyin onyuŋ otibe ye ufɔk Abasi emi odude ke Jerusalem; kpukpru mmɔ enyuŋ esuana ke edem Judaea ye Samaria, ke mibɔhɔke mme, apostle.

²Edi owo emi ebakde Abasi ebuk Stephen, enyuŋ etuaŋa enye eti-eti.

³Edi Saul osobo ufɔk Abasi, asaŋa ke ufɔk ke ufɔk, oduri iren ye iban ɔwɔrɔ ekesin mmɔ ke ufɔk-ŋkpɔkɔbi.

⁴Mmɔdo mmɔ eke esuanade esaŋa ke ebiet ke ebiet ekwɔrɔ gospel.

⁵Philip onyuŋ ɔsuhɔre aka ke obio Samaria ɔkɔkwɔrɔ Christ ɔnɔ mmɔ.

⁶Ndien mme otu owo ekpaŋ utɔŋ ye esit kiet enɔ se Philip etiŋde, ke ini mmɔ ekopde enyuŋ ekutde mme idiɔŋɔ eke enye anamde.

⁷Koro ndidehe spirit efiori ke ɔkpɔsɔŋ uyo ewɔŋɔ ekpɔŋ ediwak owo emi enyenede mmɔ: ediwak mmɔ eke edɔŋɔde akpa-ubeŋ, ye mmɔ eke edide mbuŋɔ, enyuŋ ekop nsɔŋidem.

⁸Akwa idara onyuŋ odu ke obio oro.

⁹Edi owo kiet odu do, emi ekerede Simon, emi ekebemde iso ebre idiɔŋ ke obio, anam idem akpa mbon Samaria, owut idem nte akwa owo:

¹⁰ndien kpukpru mmɔ ekpaŋ utɔŋ enɔ enye, ɔtɔŋɔde ke ata ŋkpri owo tutu osim ata ikpɔ, enyuŋ edɔhɔ ete, Owo emi edi odudu Abasi emi ekerede Akwa Odudu.

¹¹Mmɔ enyuŋ ekpaŋ utɔŋ enɔ enye, koro toto anyan ini enye ama ada idiɔŋ esie anam idem akpa mmɔ.

¹²Edi ke adaŋemi mmɔ enimde eti etop Philip emi enye ɔkwɔrɔde abaŋa Ubɔŋ Abasi ye enyiŋ Jesus Christ ke akpanikɔ, mmɔ ena baptisim, iren-owo ye iban ŋko.

¹³Smon ke idem esie ŋko onim ke akpanikɔ: ndien ke enye ama akana baptism, enye osuk odu ye philip; idem onyuŋ akpa enye ndikut mme idiɔŋɔ ye ikpɔ odudu eke Philip anamde.

¹⁴Edikem, ke ini mme apostle emi edude ke Jerusalem ekopde ete mbon Samaria ema ebɔ ikɔ Abasi, mmɔ edɔŋ Peter ye John ke ɔtɔ mmɔ:

¹⁵ndien ke ini mmɔ oro esuhɔre eka, ekpe ubɔk enɔ mmɔ, man mmɔ ebɔ Edisana Spirit:

¹⁶koro Enye midoroke mmɔ ndomo owo kiet kaŋa ke idem: edi ekonim mmɔ baptism ke enyiŋ Ɔbɔŋ Jesus: ukure edi oro.

¹⁷Ekem mme apostle edori mmɔ ubɔk, mmɔ enyuŋ ebɔ Edisana Spirit.

¹⁸Ke ini Simon okutde ete enɔ Edisana Spirit oto ke eridori ubɔk emi mme apostle edoride owo, enye ada okuk ɔsɔk mmɔ, onyuŋ ɔdɔhɔ mmɔ ete,

¹⁹Enɔ mi nde odudu emi, man owo ekededi eke ndidoride enye ubɔk ɔkpɔbɔ Edisana Spirit.

²⁰Edi Peter ɔbɔrɔ enye ete, Okuk fo etiene fi atak, koro afo ekerede ete iyeda okuk idep enɔ Abasi.

²¹Afo unyeneke udeme ye nsaŋa ke ŋkpɔ emi: koro esit fo minenke ke iso Abasi.

²²Kabare esit ndien, kpɔŋ idiɔk ido fo emi, nyuŋ kpe Ɔbɔŋ ubɔk, me ndusuk enye eyedahado ɔnɔ fi ke se ekerede ntem ke esit fo.

²³Koro ŋkut nte afo etie ke ata ndot-ndot itie ye ke uruk ukwaŋkpɔ.

²⁴Edi Simon ɔbɔrɔ ete, Ekpe Ɔbɔŋ ubɔk enɔ mi, ete, se mbufo etiŋde baba kiet okusim mi.

²⁵Ntre ke mmɔ ema ekɔnɔ ikɔ-ntiense, enyuŋ ekwɔrɔ ikɔ Ɔbɔŋ, mmɔ efiak enyɔŋɔ ke Jerusalem, enyuŋ ekwɔrɔ gospel enɔ ediwak obio-iŋwaŋ nditɔ Samaria.

²⁶Edi angel Jehovah ɔdɔhɔ Philip ete, Daha ke enyɔŋ, saŋa ke edem usuk-usuk, kosim usuŋ emi otode ke Jerusalem ɔsuhɔre aka Gaza; emi edide desert.

²⁷Ndien enye adaha aka: ndien sese, owo Ethiopia, akamba eunuch, emi odude ke idak Candace ɔbɔŋ-aŋwan mbon Ethiopia onyuŋ akamade ofuri inyene esie, okonyuŋ edide ke Jerusalem ndituak ibuot nnɔ Abasi:

²⁸enye ke ɔnyɔŋ esiemɔ etie ke chariot okot ŋwed prophet Isaiah.

²⁹Edi Spirit ɔdɔhɔ Philip ete, Saŋa kpere kadiana chariot oro.

³⁰Ntre ke Philip efehe okosim enye, okop nte enye okotde ŋwed prophet Isaiah, onyuŋ obup enye ete, Nte ɔmɔfiɔk se ikɔ oro okotde ɔwɔrɔde?

³¹Enye ete, Ŋkeme didie ke owo mitemeke mi? Ntre ke enye ebeŋe Philip ete ɔdɔk editie ye imɔ.

³²Itie emi enye okotde ke ŋwed Abasi edi emi, Eda enye nte eyen erɔŋ eka ndiwot; Ndien kpa nte eyen-erɔŋ misioroke uyo ke iso andifat enye idet, Kpa ntre enye inyuŋ itatke inua esie:

³³Ke akwa usuhɔre esie ebiat ikpe esie efep: Anie edibuk emana esie? Koro esibede uwem esie efep ke isɔŋ.

³⁴Eunuch obup Philip ete, Mbɔk, prophet etiŋ emi abaŋa anie? mme etiŋ abaŋa idem esie, mme etiŋ abaŋa owo efen?

³⁵Ndien Philip atat inua esie, ɔtɔŋɔ ke ikɔ ŋwed Abasi emi, ɔkwɔrɔ Jesus ɔnɔ enye.

³⁶Edi nte mmɔ ekade iso ke usuŋ mmɔ, mmɔ edisim mmɔŋ;

³⁷ndien eunuch oro ete, Se mmɔŋ mi; nso ibiɔŋɔ mi ndina baptism?

³⁸Ndien enye ɔnɔ uyo ete chariot atuak ada: mmɔ mbiba, Philip ye eunuch oro, enyuŋ esuhɔre eduk ke mmɔŋ; ndien Philip onim enye baptism.

³⁹Edi ke adaŋemi mmɔ etode ke mmɔŋ ewɔrɔ edɔk, Spirit Jehovah ada Philip adaha, eunuch inyuŋ ikwe enye aba, koro enye ɔnyɔŋ esie ke idaresit.

⁴⁰Edi ekut Philip ke Azotus: enye onyuŋ asaŋa do ebe, ɔkwɔrɔ gospel ɔnɔ kpukpru mme obio tutu enye osim Caesarea.