Read efik ŊWED MBON ROME 1 Bible Online

ŊWED MBON ROME 1 - efik bible

ŊWED MBON ROME 1

¹PAUL, owo Jesus Christ, emi Abasi okokotde ete edidi apostle, onyuŋ adianarede onim ɔnɔ gospel Esie

²(emi Enye ekebemde iso ada mme prophet Esie ɔŋwɔŋɔ ke Edisana Ŋwed) abaŋa Eyen Esie,

³(emi okototde ke ubon David ke obukidem;

⁴edi ke spirit Esie emi edide ata edisana, eriset emi Enye esetde ke mkpa ama owut ke odudu ete Enye edi Eyen Abasi); kpa Jesus Christ Ɔbɔŋ nnyin

⁵(emi ke ubɔk Esie ke mma mbɔ mfɔn ye idaha apostle, ndida nnam kpukpru mme idut esuk ibuot ke mbuɔtidem, kabaŋa enyiŋ Esie:

⁶mbufo nde edu ke otu mmɔ oro, emi ekekotde mbufo ete edidi ikɔt Jesus Christ);

⁷ewet ɔnɔ esɔk kpukpru mmɔ emi edukde Ke Rome emi Abasi amade, onyuŋ okotde ete edidi ndisana ikɔt Esie. Mfɔn ye emem, emi etode ke ubɔk Abasi Ete nnyin ye Ɔbɔŋ Jesus Christ, akpakam odoro mbufo.

⁸Ke akpa itie, mmɔkɔm Abasi mi ke Jesus Christ mbaŋa mbufo kpukpru, koro etop mbuɔtidem mbufo asuanade ke ofuri ekondo.

⁹Koro Abasi, emi ndade spirit mi nnam ŋkpɔ nnɔ Enye ke gospel Eyen Esie, edi ntiense ɔnɔ mi, adaŋa nte mmendopke ndisiak enyiŋ mbufo ke akam mi kpukpru ini,

¹⁰nnyuŋ mbebeŋe nte ke usuŋ ekededi ke ukperedem ini emi, Abasi okponyime ndinɔ mi mfɔniso ndidi ndise mbufo.

¹¹Koro ɔdɔŋde mi eti-eti ndikut mbufo, man nnɔ mbufo ndusuk enɔ eke spirit, man oto do enam mbufo esɔŋɔ eda;

¹²ikɔ emi ɔwɔrɔ ete, man ntiene mbufo ŋkop ndɔŋesit emi otode mbufo, nnyin inyuŋ ida mbuɔtidem nnyin edem mbiba idɔŋ kiet eken esit.

¹³Nditɔ-ete mi, mkpamaŋa nte mbufo etre ndifiɔk ete ediwak ini mma nduak ndidi ke ɔtɔ mbufo (edi ema ebiɔŋɔ mi tutu osim emi), man ŋkpenyene usuk mfri ke otu mbufo ŋko, kpa nte nnyenede ke otu mme Gentile efen.

¹⁴Mmakama mme Greek ye isen owo isɔn, ye mbon eti ibuot ye mme ɔkɔi nde.

¹⁵Ntre ke ŋkaŋ mi, mmebeŋe idem ndikwɔrɔ gospel nnɔ mbufo nde emi edude ke Rome.

¹⁶Koro but inamke mi ye gospel; koro enye edide odudu Abasi, emi ɔwɔrɔde erinyaŋa ɔnɔ kpukpru owo eke ebuɔtde idem; ɔnɔ mme Jew ke akpa-itie, onyuŋ ɔnɔ mme Greek.

¹⁷Koro do ke edinen ido eke Abasi ayarare, eke ɔtɔŋɔde ke mbuɔtidem: nte ewetde ete, Edinen owo edida mbuɔtidem odu uwem.

¹⁸Koro iyaresit Abasi oto eke heaven ayarade adian kpukpuru unana uteŋe Abasi ye ukwaŋido owo, emi edade ukwaŋido ebiɔŋɔ akpanikɔ;

¹⁹koro se owo ekemede ndifiɔk mbaŋa Abasi ayarare mmɔ ke esit; koro Abasi akayararede ɔnɔ mmɔ.

²⁰Koro tɔŋɔ ekebot ererimbot owo etim ekut ndibe-ndibe ŋkpɔ emi enyenede Enye, kpa nsinsi odudu Esie ye idaha Esie nte Abasi; eda mme ŋkpɔ emi Enye akanamde etim efiɔk; man mmɔ ekunyene ŋkpɔ nditiŋ nnyaŋa idem;

²¹koro okposuk edi nte mmɔ efiɔkde Abasi, mmɔ inɔŋɔ Enye ubɔŋ nte Abasi, inyuŋ inɔŋɔ Enye ekɔm; edi ekabare ekere ikpikpu ekikere, ndisime esit mmɔ onyuŋ akabare okim.

²²Mmɔ ete mme imɔ idi mme enyene-ibuot owo,

²³edi mmɔ ekabare ndisime; mmɔ ekpuhɔre ubɔŋ Abasi emi odude uwem ke nsinsi, esin ke mbiet idem owo eke enyenede ndikpa, ye ke mbiet inuen, ye eke unam ukot inaŋ, ye se inyɔnide.

²⁴Oto do Abasi akada mmɔ ke ndiɔi udɔŋ esit mmɔ ayak ɔnɔ mbubiam ido, ete esuene ikpɔhidem mmɔ ke otu idem mmɔ;

²⁵sia mmɔ ekpuhɔde akpanikɔ Abasi ebɔ nsu, enyuŋ ekponode se ebotde, enyuŋ enamde ŋkpɔ enɔ enye, etre ndikpono Enye emi edide Andibot, emi enyenede itoro ke nsinsi. Amen.

²⁶Ke ntak emi Abasi ada mmɔ ayak ɔnɔ ndek-ndek udɔŋ; koro iban mmɔ ekpɔŋ se ekebotde mmɔ enɔ ekabare enam se mikobotke mmɔ inɔ;

²⁷kpa ntre ŋko ke iren-owo ekpɔŋ se ekebotde iban enɔ, ekabare efiop ke idiɔk udɔŋ ye kiet eken, irenowo enam se midotke ye irenowo, enyuŋ ebɔ ke idem mmɔ utip eke odotde ndudue mmɔ.

²⁸Ndien sia mmɔ esinde ndinyene Abasi ke ifiɔk mmɔ, Abasi ada mmɔ ayak ɔnɔ obukpo esit ndinam mme ido eke midotke;

²⁹mmɔ eyɔhɔ ye kpukpru ukwaŋido ye oburobut ido ye idiɔk mbumek ye udu; eyɔhɔ ye ufup, ye obom, ye utɔk, ye ŋkari, ye idiɔk esit;

³⁰mmɔ edi mbon-nsuk-uyo, mbon ibaŋa, mbon emi Abasi asuade, mbon emiom, mbon ikponesit, mbon mbure, mme etibi idiɔk-ŋkpɔ, ye mme ɔsɔŋ-ibuot ye ete ye eka;

³¹mmɔ edi mme anana ifiɔk, mme abiat ediomi, mme anana ima uduot owo ye mme anana esit mbɔm:

³²Okposuk edi nte mmɔ efiɔkde ewuhɔ Abasi, ete mme andinam oruk ŋkpɔ emi edot mkpa, mmɔ enam mme ido emi ke idem mmɔ, enyuŋ edara mmɔ emi enamde.