Read efik ŊWED MBON ROME 10 Bible Online

ŊWED MBON ROME 10 - efik bible

ŊWED MBON ROME 10

¹NDITƆ-ETE, mmenyene udɔŋ ke esit mi, nnyuŋ mbɔŋ akam nnɔ Abasi mbaŋa Israel, nte, enyaŋa mmɔ.

²Koro ndi ntiense nnɔ mmɔ, nte mmɔ enyene ifiopesit ebaŋa Abasi, edi ifiopesit mmɔ isaŋake ye ifiɔk.

³Koro sia mmɔ mifiɔkke edinen ido Abasi, enyuŋ eyomde ndinam edinen ido idem mmɔ ɔsɔŋɔ ada, mmɔ inyimeke ndisuk idem nnɔ edinen ido Abasi.

⁴Koro edi Christ anam ibet etre ndidi ntak edinen ido ɔnɔ kpukpru owo eke enimde ke akpanikɔ.

⁵Koro Moses ewet ete, Owo eke anamde edinen ido ibet edida oro odu uwem.

⁶Edi edinen ido eke otode ke mbuɔtidem ɔdɔhɔ ntem ete, Kudɔhɔ ke esit fo ete, Anie edidɔk okoduk ke heaven? (oro edi ndida Christ nsuhɔre):

⁷mme, Anie edisuhɔre okoduk ke udem? (oro edi ndida Christ nto ke mkpa ŋwɔrɔ ndi).

⁸Edi edinen ido oro ɔdɔhɔ didie? ete, Ikɔ emekpere fi, ke inua fo, ye ke esit fo; oro edi, ikɔ mbuɔtidem eke nnyin ikwɔrɔde.

⁹Koro edieke afo adade inua fo onyime ete Jesus edi Ɔbɔŋ, onyuŋ onimde ke akpanikɔ ke esit fo ete, Abasi akanam Enye eset ke mkpa, eyebɔhɔ:

¹⁰koro owo ada esit onim ke akpanikɔ enyene edinen ido; onyuŋ ada inua onyime enyene erinyaŋa.

¹¹Koro Ŋwed Abasi ke ɔdɔhɔ ete, Owo ekededi eke ɔbuɔtde idem ye Enye idikwe but.

¹²Koro ubahare iduhe ke ufɔt Jew ye Greek: koro Ɔbɔŋ kiet edide Ɔbɔŋ mmɔ kpukpru, onyuŋ enyene ɔyɔhɔ mfɔnido ye kpukpru mmɔ eke esemede ekot Enye.

¹³Koro, Owo ekededi eke edisemede okot enyiŋ Jehohah eyebɔhɔ.

¹⁴Edi mmɔ edinam didie eseme ekot Enye emi mmɔ mikɔbuɔtke idem ye Enye? Mmɔ edinyuŋ enam didie ebuɔt idem ye Enye emi mmɔ mikokopke ibaŋa? Mmɔ edinyuŋ enam didie ekop, ke ɔkwɔrɔ-ikɔ miduhe?

¹⁵Mmɔ edinyuŋ enam didie ekwɔrɔ, ke mibɔhɔke edɔdɔŋ mmɔ? kpa nte ewetde ete, Ikpat mmɔ emi edade etop nti ŋkpɔ eye adaŋa didie!

¹⁶Edi idige kpukpru mmɔ ekakpaŋ utɔŋ enɔ eti etop oro. Koro Isaiah ɔdɔhɔ ete, Ɔbɔŋ, anie okonim mbuk nnyin ke akpanikɔ?

¹⁷Ntre ke nbuɔtidem oto ke erikop, erikop onyuŋ oto ke ikɔ Christ.

¹⁸Edi mmɔdɔhɔ nte, Nte mmɔ ikokopke? Ke akpanikɔ mmɔ ema ekop. Uyom mmɔ ɔmɔwɔrɔ ke ofuri isɔŋ, Ikɔ mmɔ enyuŋ esim utit ererimbot.

¹⁹Mmonyuŋ ndɔhɔ nte, Nte Israel ikɔfiɔkke? Moses ebem iso ɔdɔhɔ ete, Nyeda se midige idut nsin mbufo efibe ufup; Nyeda idut eke minyeneke ibuot nyat mbufo esit.

²⁰Isaiah onyuŋ enyene uko eti-eti ɔdɔhɔ ete, Mmɔ emi mikoyomke Mi ema ekut mi; Mmayarare idem nnɔ mmɔ emi mikobupke ibaŋa Mi.

²¹Edi enye ɔdɔhɔ abaŋa Israel ete, Mmanyanare ubɔk Mi ofuri usen ŋkot mbon nsɔŋ-ibuot emi enenide eneni.