Read efik ŊWED MBON ROME 12 Bible Online

ŊWED MBON ROME 12 - efik bible

ŊWED MBON ROME 12

¹MMƆDO mmada mbɔm Abasi ŋkpe mbufo ubɔk, nditɔ-ete mi, nte eda ikpɔhidem mbufo enɔ Abasi nte odu-uwem uwa, emi asanade, emi onyuŋ enemde Abasi ndibɔ, koro emi edide uwa eke anade ɔnɔ mbufo ediwa.

²Ekunyuŋ ekabare ebiet eyo emi, edi eyak mbufo ekpuhɔre, oto ke erinam emi enamde esit mbufo edi obufa, man mbufo edomo efiɔk se uduak Abasi edide, uduak Abasi eke edide eti, onyuŋ enemde owo esit, onyuŋ ɔfɔnde ama.

³Nda mfɔn eke ekenɔde mi ndɔhɔ kpukpru owo ke otu mbufo, nte enye okukere ete idi ŋkpo ikan nte ekpekerede: edi yak enye ekere abaŋa idem esie nte enyene-ibuot owo ekpekerede, nte ekemde ye idomo mbuɔtidem eke Abasi ɔkɔnɔde owo kiet kiet.

⁴Koro kpa nte nnyin inyenede ediwak ndido ke ikpɔhidem kiet, kpukpru ndido emi minyuŋ inamke oruk utom kiet;

⁵ntre ŋko, nnyin, emi iwakde, idi ikpɔhidem kiet ke Christ, nnyin kpukpru inyuŋ idi ndido inɔ kiet eken.

⁶Sia nnyin imenyene enɔ eke edide nsio-nsio, nte asaŋade ekekem ye mfɔn eke enɔde nnyin; edieke enɔde nnyin ukwɔrɔ-ikɔ, yak nnyin ikwɔrɔ ikɔ nte asaŋade ekekem ye idomo mbuɔtidem nnyin;

⁷onyuŋ edieke enɔde nnyin erinam ŋkpɔ nnɔ owo, yak nnyin itiŋ enyin inam; yak owo eke edide andikpep etiŋ enyin ekpep;

⁸Owo eke onyuŋ ɔnɔde item, etiŋ enyin ɔnɔ item; owo eke ɔnɔde ubuene ŋkpɔ, yak enye ɔnɔ ke ntarubɔk; owo eke akarade, yak enye esin ifik ke erikara esie; owo eke onyuŋ atuade mbɔm, yak enye atua mbɔm ke ntarido.

⁹Eyak ima okusaŋa ke mbubik. Esua se idiɔkde; eyire se ifɔnde.

¹⁰Eda ima nditɔ-ete ema kiet eken; esɔp ndikpono kiet eken;

¹¹ekutek ke ifik mbufo; enyene ifiopesit ke spirit; enam utom enɔ Ɔbɔŋ.

¹²Eda esit ke idori-enyin; enyene ime ke ukut; ekɔbɔ ke eribɔŋ akam;

¹³enɔ ikɔt Abasi se inanade mmɔ; ebine ndikama isen owo.

¹⁴Ediɔŋ mmɔ emi enamde mbufo isin-enyin; ediɔŋ, ekusuŋi mmɔ.

¹⁵Edara ye mmɔ emi edarade; etuaŋa ye mmɔ emi etuaŋade.

¹⁶Enyene esit kiet ye kiet eken. Ekusin esit ke ikpɔ ŋkpɔ, edi esuhɔre idem eduk nsaŋa ye mbon nsuk-idem. Ekunim idem ke mfiɔk-ŋkaha.

¹⁷Ekuda idiɔk esio owo usiene idiɔk. Esin idem ekere ndinam ido eke enyenede ukpono ke enyin kpukpru owo.

¹⁸Edieke usuŋ odude, eŋwana, nte mbufo ekemeke, ndidu ke emem ye kpukpru owo.

¹⁹Ekusio usiene enɔ idem mbufo, ndima mme ufan mi, edi ebɔk idem ke usuŋ enɔ iyaresit Abasi: koro ewet ete, Jehovah ete, Usiene enyene Mi, Ami nyesio usiene.

²⁰Edi edieke usua fo okopde biɔŋ, nɔ enye udia adia; edieke enye okopde nsatitɔŋ, nɔ enye mmɔŋ ɔŋwɔŋ, koro ke erinam ntem, eyewobi mbubek-ikaŋ obok enye ke ibuot.

²¹Ekuyak idiɔk akan mbufo, edi eda nti erinam ekan idiɔk ubɔk.