Read efik ŊWED MBON ROME 15 Bible Online

ŊWED MBON ROME 15 - efik bible

ŊWED MBON ROME 15

¹EDI nnyin emi ikopde idem ikpobiom mmem-idem mbon mmem-idem, itre ndinem idem nnyin esit.

²Eyak nnyin owo kiet kiet inem mbɔhiduŋ nnyin esit ke eriyom ufɔn esie, man enye ɔkɔri ke mbuɔtidem.

³Koro Christ ŋko ikenemke idem esit; edi, kpa nte ewetde, Esuene mmɔ eke esuenede fi ɔduɔ mi ke idem.

⁴Koro se ededi eke ekewetde ke ini oko, ke ekewet ndida ŋkpep nnyin ŋkpɔ, man nnyin inyene idori-enyin oto ke ime ye ndɔŋ-esit eke Ŋwed Abasi ɔnɔde.

⁵Edi Abasi ime ye ndɔŋesit akpakam ɔnɔ mbufo ndiyene esit kiet ye kiet eken, nte Christ Jesus etemede;

⁶man mbufo ekpeda esit kiet ye inua kiet enɔ Abasi ye Ete Ɔbɔŋ nnyin Jesus Christ ubɔŋ.

⁷Mmɔdo edara kiet eken kpa nte Christ akadarede mbufo, man Abasi enyene ubɔŋ.

⁸Koro mmɔdɔhɔ nte Christ amakabare edi asaŋa-utom ɔnɔ mme ana-mbobi kabaŋa akpanikɔ Abasi, man anam se ekɔŋwɔŋɔde enɔ mme ete nnyin ɔsɔŋɔ ada,

⁹man mme Gentile enyuŋ enɔ Abasi ubɔŋ ebaŋa mbɔm Esie; nte ewetde ete, Ke ntak emi nyenɔ Fi itoro ke otu mme Gentile, Nyenyuŋ ŋkwɔ enyiŋ Fo.

¹⁰Onyuŋ ɔdɔhɔ ete, Mbufo mme Gentile, edara ye ikɔt Esie.

¹¹Onyuŋ ɔdɔhɔ ete, Etoro Ɔbɔŋ, kpukpru mme Gentile, Yak kpukpru mme idut etoro Enye.

¹²Isaiah onyuŋ ɔdɔhɔ ete, Orun eyeto ke Jesse ɔwɔrɔ, Edi Enye eyedaha ada ndikara mme Gentile; Mme Gentile eyenyuŋ edori Enye enyin ke idem.

¹³Abasi idori-enyin akpakam ɔyɔhɔ mbufo ye kpukpru idaresit ye emem ke mbuɔtidem mbufo, man mbufo enyene uwak idori-enyin oto ke odudu Edisana Spirit.

¹⁴Edi ami ke idem mi mmotim mbure mbufo mfiɔk, nditɔ-ete mi, nte mbufo emenyene mfɔn-ido ɔyɔhɔ-ɔyɔhɔ, emenyuŋ eyɔhɔ ye kpukpru ifiɔk, enyuŋ ekeme ndinɔ kiet eken item.

¹⁵Edi nda uko ŋkan ŋwet ubak ŋwed emi nnɔ mbufo, nte owo emi etide mbufo ŋkpɔ, oto ke mfɔn eke Abasi ɔkɔnɔde mi, ete,

¹⁶ŋkpedi asaŋa-utom Christ Jesus nnɔ mme Gentile, ŋkpe-nyuŋ ŋkama gospel nte oku Abasi, man oto do eriwa mme Gentile akpakabare edi se Abasi adarade ndibɔ, sia Edisana Spirit ama anam enye asana.

¹⁷Ntem ke mmenyene se mburede ke Christ Jesus mbaŋa utom Abasi.

¹⁸Koro mmendinyeneke uko nditiŋ ŋkpɔ

¹⁹mbe se Christ akadade mi anam, ke ikɔ ye utom, ke odudu mme idiɔŋɔ ye mme utibe-ŋkpɔ ye ke odudu edisana Spirit, man mme Gentile esuk ibuot. Ntem ke mma ntɔŋɔ ke Jerusalem ŋkwɔrɔ gospel Christ ɔyɔhɔ-ɔyɔhɔ tutu ŋkanare ŋkosim Illyricum.

²⁰Ntem ke mmaŋwana ndikwɔrɔ gospel, idige ke mme ebiet eke ema ekebem iso ekot enyiŋ Christ ke esit, mbak ndimen utom mi nnim ke se owo eŋwen ama akanam;

²¹edi nnam, man edi nte ewetde ete, Mmɔ emi etop Esie akanam misimke mmɔ eyekut, Mmɔ emi akanam mikopke eyeyuŋ efiɔk.

²²Ke ntak emi ŋkpɔ ɔbiɔŋɔ mi ediwak ini nditiene mbufo:

²³edi ke emi, sia mmenyeneke aba ɔtɔ nte nnamde utom ke edem emi, sia okonyuŋ ɔdɔŋde mi nditiene mbufo adaŋa ediwak isua emi,

²⁴ini ekededi eke ndikade Spain, mmodori enyin nte nyese mbufo ke usuŋ isaŋ mi, nte mbufo eyenyuŋ eda mi ekeyak, ke mma ŋkokut ndusuk inemesit ye mbufo.

²⁵Edi ke emi mmɔŋ ŋka Jerusalem, man nda enɔ mfɔn nsɔk ikɔt Abasi.

²⁶Koro ama enem mbon Macedonia ye Achaia ke enyin ndinam etibe nnɔ esɔk nditɔ ubuene eni edude ke otu ikɔt Abasi ke Jerusalem.

²⁷Edi se ikenemde mmɔ ke enyin ke akpanikɔ; mmɔ enyuŋ ekama mmɔ oro isɔn ŋko. Koro edieke mmɔ ema ekenam mme Gentile etiene mmɔ enyene udeme ke ŋkpɔ spirit, mme Gentile ekama mmɔ isɔn ndida ŋkpɔ obukidem nnɔ mmɔ nte uwa.

²⁸Mma ŋkure mbuehe emi, mma mmen mbuŋwum emi nsin mmɔ ke ubɔk nte idiɔŋɔ utom mi, nyesaŋa ke ŋkaŋ mbufo mbe ŋka Spain.

²⁹Ndien mmɔfiɔk nte ke adaŋemi ndidide nyeda ɔyɔhɔ eridiɔŋ Christ ndi.

³⁰Edi mmekpe mbufo ubɔk, nditɔ-ete, ke enyiŋ Ɔbɔŋ nnyin Jesus Christ ye ke ima emi Spirit esinde nnyin ke esit, nte mbufo etiene mi eŋwana ebɔŋ akam enɔ Abasi ebaŋa mi;

³¹man enyaŋa mi esio ke ubɔk mmɔ eke minimke ke akpanikɔ ke Judaea, man utom eke ŋkade ndinam nnɔ ikɔt Abasi ke Jerusalem onyuŋ enem mmɔ esit;

³²man ŋkpedi ke ɔtɔ mbufo ye idaresit oto ke erinyime Abasi, ŋkponyuŋ ntie ntre ye mbufo mbɔ nduɔk-odudu.

³³Abasi emem akpakam odu ye mbufo kpukpru. Amen.