Read efik ŊWED MBON ROME 16 Bible Online

ŊWED MBON ROME 16 - efik bible

ŊWED MBON ROME 16

¹MMƆNƆ ŋwed itoro esɔk mbufo mbaŋa Phoebe eyen-ete nnyin aŋwan, emi edide anam-utom ufɔk Abasi emi odude ke Cenchrea.

²Edara enye ke Ɔbɔŋ nte odotde ikɔt Abasi ndinam, enyuŋ eŋwam enye ke ŋkpɔ ekededi eke enye ediyomde mbufo; koro enye ke idemesie edi owo eke akaŋwamde ediwak owo, onyuŋ aŋwamde mi ŋko.

³Ekɔm Prisca ye Aquila, mme nsaŋa-utom mi ke Christ Jesus,

⁴emi ekenyimede ndiduɔk uwem mmɔ kabaŋa uwem mi: idige ami ikpɔŋ ndɔhɔ ekɔm mmɔ; edi kpukpru mme ufɔk Abasi ke otu mme Gentile etiene enɔ ekɔm nde: enyuŋ ekɔm ufɔk Abasi emi odude ke ebiet mmɔ.

⁵Ekɔm Epaenetus emi mmade, emi edide akpa mfri eke Asia oŋwumde ɔnɔ Christ.

⁶Ekɔm Mary, emi akanamde ɔkpɔsɔŋ utom ɔnɔ mbufo.

⁷Ekɔm Andronicus ye Junias, emi edide oruk mi ye nsaŋa-ŋkpɔkɔbi mi: mmɔ edi mme ɔwɔrɔ-etop ke otu mme apostle, mmɔ ekenyuŋ ebem mi iso edu ke Christ.

⁸Ekɔm Ampliatus emi mmade ke ɔbɔŋ.

⁹Ekɔm Urbanus emi edide nsaŋa-utom nnyin ke Christ ye Stachys emi mmade.

¹⁰Ekɔm Apelles emi edomode efiɔk ke Christ. Ekɔm mbon ufɔk Aristobulus.

¹¹Ekɔm Herodion emi edide oruk mi. Ekɔm mbon ufɔk Narcissus emi edude ke Ɔbɔŋ.

¹²Ekɔm Tryphaena ye Tryphosa, emi enanam utom ɔkpɔsɔŋ ke Ɔbɔŋ. Ekɔm Persis emi mmade; enye akakpa utom eti-eti ke Ɔbɔŋ.

¹³Ekɔm Rufus emi Ɔbɔŋ emekde: enyuŋ ekɔm eka esie, emi akanamde ye ami nte eka.

¹⁴Ekɔm Asyncritus, Phlegon, Hermes, Patrobas, Hermas, ye nditɔ-ete emi edude ye mmɔ.

¹⁵Ekɔm Philologus ye Julia, Nereus ye eyen-eka esie aŋwan, ye Olympas, ye kpukpru ikɔt Abasi emi edude ye mmɔ.

¹⁶Eda edisana ntim-inua ekɔm kiet eken. Kpukpru mme ufɔk Abasi emi enyenede Christ enɔ ekɔm esɔk mbufo.

¹⁷Mmekpe mbufo ubɔk nditɔ-ete, ekama enyin ese mmɔ emi etɔde ubahare ke otu mbufo, enyuŋ enamde ŋkpɔ esin owo eduɔ, minyuŋ isaŋake ikekem ye erikpep eke ekekpepde mbufo ete enam.

¹⁸Edianare ekpɔŋ mmɔ. Koro mmɔ emi etiede ntre inamke utom inɔ Ɔbɔŋ nnyin Christ, edi enam enɔ mme idiɔk udɔŋ mmɔ: ndien mmɔ eda nnem-inua ye inem-inem ndutiŋ eyut mme ɔkɔi esit ekabare.

¹⁹Kpukpru owo ema ekop etop nsuk-ibuot mbufo; emi esin mi mbure mbure mbaŋa mbufo. Edi mmoyom mbufo edi mme ɔfiɔk-ŋkpɔ ke erinam eti, enyuŋ edi ɔkɔi ke erinam idiɔk.

²⁰Ndien ibigike bigi Abasi emem eyedigi Satan anuak ke idak ikpat mbufo. Mfɔn Ɔbɔŋ nnyin Jesus akpakam odu ye mbufo.

²¹Timotheus nsaŋa-utom mi ete ekɔm mbufo. Lucius ye Jason ye Sosipater, emi edide oruk mi, enyuŋ enɔ ekɔm.

²²Ami Tertius, emi ŋwetde ŋwed emi, mmɔkɔm mbufo ke Ɔbɔŋ.

²³Gaius emi edide ete-ufɔk mi, onyuŋ edide ete-ufɔk ɔnɔ ofuri ufɔk Abasi, ete ekɔm mbufo. Erastus akama-okuk obio ete ekɔm mbufo. Quartus eyen-ete nnyin onyuŋ ɔnɔ ekɔm ŋko.

²⁴Yak mfɔŋ Ɔbɔŋ nnyin Jesus Christ odu ye kpukpru mbufo.

²⁵Enɔ Enye, emi ekemede ndinam mbufo esɔŋɔ eda, nte gospel mi ye erikwɔrɔ emi ŋkwɔrɔde mbaŋa Jesus Christ etemede; nte asaŋade ekekem ye eriyarare ndibe-ŋkpɔ, emi okodibede ke nsinsi eyo, edi ke emi akayararede;

²⁶Emi enyuŋ edade se mme prophet ekewetde, nte nsinsi Abasi ɔkɔnɔde uyo, enam kpukpru mme idut efiɔk, man mmɔ esuk ibuot ke mbuɔtidem:

²⁷Enɔ Enye emi ikpɔŋ-ikpɔŋ edide Abasi ɔniɔŋ ubɔŋ oto ke Jesus Christ, ke nsinsi. Amen.