Read efik 1 ŊWED CORINTH 1 Bible Online

1 ŊWED CORINTH 1 - efik bible

1 ŊWED CORINTH 1

¹PAUL, emi ekekotde ete edidi apostle Jesus Christ ke uduak Abasi,

²ye Sosthenes eyen-ete nnyin, enɔ ŋwed emi esɔk ufɔk Abasi emi odude ke Corinth, kpa mmɔ emi ema ekedianare enim enɔ Abasi ke Christ Jesus, enyuŋ ekotde ete edidi nti ikɔt Abasi, nte ekokotde kpukpru mmɔ emi edude ke kpukpru ebiet eseme ekot Ɔbɔŋ nnyin Jesus Christ ke enyiŋ, emi edide Ɔbɔŋ mmɔ ye eke nnyin nde.

³Mfɔn ye emem akpakam oto ke ubɔk Abasi Ete nnyin, ye Ɔbɔŋ Jesus Christ osim mbufo.

⁴Mmɔkɔm Abasi mi kpukpru ini mbaŋa mbufo ke mfɔn Abasi emi ekenɔde mbufo ke Christ Jesus;

⁵koro mbufo ema ekabare enyene kpukpru ŋkpɔ uwak-uwak ke Enye, enyene ofuri ukeme nditiŋ ye ofuri ukeme ndifiɔk ŋkpɔ Abasi;

⁶adaŋa nte ema eda mbufo eyarare ete ikɔ-ntiense, eke ekɔnɔde ebaŋa Christ, edi akpanikɔ;

⁷ntre ke mbufo inanake baba enɔ kiet, ke ini mbufo etiede ebet eriyarare Ɔbɔŋ nnyin Jesus Christ,

⁸emi edinyuŋ anamde mbufo esɔŋɔ eda tutu osim utit, enana ubiom-ikpe ke usen Ɔbɔŋ nnyin Jesus Christ.

⁹Abasi edi anam-akpanikɔ, emi okokotde mbufo ete ediduk nsaŋa ye Eyen Esie Jesus Christ Ɔbɔŋ nnyin.

¹⁰Edi mmada enyiŋ Ɔbɔŋ nnyin Jesus Christ ŋkpe mbufo ubɔk, nditɔ-ete, nte mbufo kpukpru enyene ikɔ-inua kiet, ubahare okunyuŋ odu ke otu mbufo; edi mbufo etɔŋɔ ntak ekabare efɔn ema ke erinyene esit kiet ye ekikere kiet.

¹¹Koro mbon ufɔk Chloe ema esian mi ebaŋa mbufo, nditɔ-ete mi, ete utɔk ke odu ke otu mbufo.

¹²Ikɔ emi ɔwɔrɔ ntem ete, mbufo kiet kiet edɔhɔ ete, Ami nda ke ŋkaŋ Paul, mme, Ami nda ke ŋkaŋ Apollos, mme, Ami nda ke ŋkaŋ Cephas, mme, Ami nda ke ŋkaŋ Christ.

¹³Nte Christ edida udeme ye mmɔ eŋwen? Nte ekewot Paul ke cross enɔ mbufo? Mme ekenim mbufo baptism esin ke enyiŋ Paul?

¹⁴Mmɔkɔm Abasi nte ŋkenimke mbufo baba kiet baptism, ke mibɔhɔke Crispus ye Gaius;

¹⁵mbak owo edidɔhɔ ete, ekenim mbufo baptism esin ke enyiŋ mi.

¹⁶Mma nnyuŋ nnim ufɔk stephanas baptism: ke ebede oro, ndiɔŋɔke nte nnimde owo efen baptism.

¹⁷Koro Christ ikosioho mi idɔŋ ndinim owo baptism, edi ndikwɔrɔ gospel. Akan oro idɔŋke mi ete nda ikike ke eritiŋ ikɔ ŋkwɔrɔ gospel, mbak cross Christ edikabare ikpikpu.

¹⁸Koro erikwɔrɔ cross etie nte ndisime ikɔ ke enyin mbon nsobo; edi ke enyin nnyin emi enyaŋade edi odudu Abasi.

¹⁹Koro ewet ntem ete, Nyebiat ifiɔk mbon eti ibuot, Nyenyuŋ nsin ɔniɔŋ mbon ɔniɔŋ.

²⁰Enye owo eti ibuot? Enye andiwet ŋwed? Enye eneni eneni eyo emi? Nte Abasi ikanamke ifiɔk mbon ererimbot emi akabare edi ndisime?

²¹Sia Abasi okonimde ke ɔniɔŋ Esie, ete ererimbot ekuda eti ibuot eke mmɔ efiɔk Imɔ, ɔfɔn Abasi ke enyin ndida ukwɔrɔ-ikɔ, emi owo esede ke ndisime, nnyaŋa mmɔ emi enimde ke akpanikɔ.

²²Mme Jew ebeŋe mme idiɔŋɔ, mme Greek enyuŋ eyom ifiɔk;

²³edi nnyin ikwɔrɔ Christ nte owo emi ekewotde ke cross; ɔwɔrɔ itiat-iduɔ ɔnɔ mme Jew, ye ndisime ikɔ ke enyin mme Gentile;

²⁴Edi ɔnɔ mmɔ emi Abasi okokotde, ye mmɔ edide mme Jew ye edide mme Greek, Christ emi edi odudu Abasi ye ifiɔk Abasi.

²⁵Koro ndisime eke Abasi edi ɔniɔŋ akan owo, mmeme eke Abasi onyuŋ ɔsɔŋ akan owo.

²⁶Nditɔ-ete, ese erikot eke Abasi okokotde mbufo; ete, ikotke ediwak mmɔ emi owo ebatde ke mbon eti ibuot, ikotke ediwak mme enyene odudu, inyuŋ ikotke ediwak mbɔŋ:

²⁷edi Abasi ekemek ŋkpɔ oro edide ndisime ke ererimbot man Enye esuene mbon eti ibuot; Abasi okonyuŋ emek ŋkpɔ eke edide mmeme ke ererimbot man Enye esuene mkpɔsɔŋ ŋkpɔ;

²⁸Abasi onyuŋ emek ŋkpɔ eke edude ke usuhɔre-itie ye ŋkpɔ eke owo esede ke ndek, ye ŋkpɔ eke miduhe, man Enye anam mme ŋkpɔ eke edude ewɔrɔ ikpikpu;

²⁹mbak owo baba kiet edibure mbure ke iso Abasi.

³⁰Edi mbufo edi ubon emi Enye okobonde ke Christ Jesus, emi Abasi akanamde akabare edi ifiɔk ɔnɔ nnyin, kpa edinen-ido, ye erikabare-ndi-edisana, ye uwɔrɔ-ufin;

³¹man osu, nte ewetde ete, Owo eke oburede mbure, yak obure ke Ɔbɔŋ.