Read efik 1 ŊWED CORINTH 11 Bible Online

1 ŊWED CORINTH 11 - efik bible

1 ŊWED CORINTH 11

¹MBUFO ekabare ekpebe mi kpa nte ami ŋkpebede Christ.

²Edi mmotoro mbufo ke emi mbufo etide mi ke kpukpru ŋkpɔ, enyuŋ esɔŋɔde emum mme item mi ekama, kpa nte ŋkayakde mmɔ nnɔ mbufo.

³Edi nyom mbufo ediɔŋɔ ete Christ edi Ibuot ɔnɔ kpukpru irenowo; erenowo onyuŋ edi ibuot ɔnɔ ŋwan; Abasi onyuŋ edi Ibuot ɔnɔ Christ.

⁴Kpukpru erenowo, eke ayarade ŋkpɔ ke ibuot ɔbɔŋ akam onyuŋ ɔkwɔrɔ ikɔ, esuene Enye emi edide Ibuot ɔnɔ enye.

⁵Kpukpru ŋwan, eke ɔbɔŋde akam onyuŋ ɔkwɔrɔde ikɔ ye ibuot iŋwaŋ, esuene enye emi edide ibuot ɔnɔ enye; koro oro etiede ukem-ukem nte enye okpokporode idet.

⁶Edieke ŋwan mifuhɔke ŋkpɔ ke ibuot, yak enye afat idet ɔkɔrɔ do. Edi edieke edide ŋkpɔ but ye ŋwan ndifat me ndikporo idet, yak enye ɔfuhɔ ŋkpɔ ke ibuot.

⁷Erenowo ikpɔfuhɔke ŋkpɔ ke ibuot, sia enye edide mbiet ye ubɔŋ Abasi; edi ŋwan edi ubɔŋ erenowo.

⁸Koro ikosioho erenowo ke idem ŋwan, edi esio ŋwan ke idem erenowo;

⁹ikonyuŋ ibotke erenowo inɔ ŋwan edi ebot ŋwan enɔ erenowo.

¹⁰Ke ntak emi ŋwan ekpenyene ndiyara idiɔŋɔ erikara ke ibuot, kabaŋa mme angel.

¹¹Edi ke Ɔbɔŋ, ŋwan iduhe ke erenowo miduhe, erenowo inyuŋ iduhe ke ŋwan mi duhe.

¹²Koro kpa nte ŋwan okotode ke erenowo, ntre ke erenowo oto ŋwan amana; edi kpukpru ŋkpɔ eto Abasi.

¹³Ese ke idem mbufo; nte odot ŋwan ndibɔŋ akam nnɔ Abasi ye ibuot iŋwaŋ ntre?

¹⁴Nte kpa idem ibuot mbufo ikpepke mbufo ite edi ŋkpɔ but ɔnɔ erenowo ndinyene anyan idet?

¹⁵Edi edieke ŋwan enyenede anyan idet, edi ubɔŋ ɔnɔ enye; koro enɔ enye idet esie nte ufuhɔ-ŋkpɔ.

¹⁶Edi ke owo ekededi osuk eyirede ndineni ŋkpɔ emi, nnyin inyeneke oruk ido oro, mme ufɔk Abasi inyuŋ inyeneke.

¹⁷Edi ke erinɔ mbufo item, emi, ntoroke mbufo, koro eribono eke mbufo ebonode ɔtɔ kiet miwɔrɔke mbufo ufɔn, edi akam ɔwɔrɔ mbufo idiɔk.

¹⁸Ke akpa itie, ke adaŋemi mbufo edide edibono ke ufɔk Abasi, ŋkop nte ubahare ke edodu ke otu mbufo; ŋkɔm nnim oro ke akpanikɔ.

¹⁹Koro eribahare nda ŋka-ŋka enyene ndidu ke otu mbufo, man eyarare efiɔk mmɔ emi edide ata ikɔt Abasi ke otu mbufo.

²⁰Ke ntak emi, ke ini mbufo esopde idem ɔtɔ kiet, mbufo ikemeke ndidia Udia Ɔbɔŋ.

²¹Koro ke eridia ntem, edi udia mbubreyo esiemɔ ke owo kiet kiet edibem iso adia: ndien owo kiet etie biɔŋ, enye eken ɔŋwɔŋ ɔyuhɔ.

²²Mme nte mbufo inyeneke ufɔk eke etiede ke esit edia enyuŋ eŋwɔŋ ŋkpɔ? mme nte mbufo esin ufɔk Abasi ke ndek, enyuŋ esuene mmɔ emi edide ubuene? nso ke ŋkpetetiŋ ye mbufo? Nte nditoro mbufo ke ŋkpɔ emi? Ntoroke mbufo.

²³Koro ŋkɔbɔde ke ubɔk Ɔbɔŋ se ŋkonyuŋ nyakde nnɔ mbufo, nte, ke okoneyo oro edade Enye enɔ,

²⁴Ɔbɔŋ Jesus emen uyo; ndien ke Enye ama ɔkɔnɔ Abasi ekɔm, Enye obuŋ uyo, onyuŋ ɔdɔhɔ ete, Ebɔ, eta; emi edi ikpɔhidem Mi ɔnɔ mbufo; enam emi nditi Mi.

²⁵Kpa ntre ŋko ke Enye emen cup, ke ema ekedia ŋkpɔ ema, ete, Cup emi edi obufa ediomi ke iyip Mi; enam emi, adaŋa ini nte eŋwɔŋwɔŋ, ke eriti Mi.

²⁶Koro adaŋa ini nte edadia uyo emi enyuŋ eŋwɔŋ cup emi, mbufo ekwɔrɔ mkpa ɔbɔŋ tutu Enye edi.

²⁷Mmɔdo owo ekededi eke edidiade uyo Ɔbɔŋ edinyuŋ ɔŋwɔŋde cup Ɔbɔŋ ke usuŋ eke midotke, eyenyene isop abaŋa ikpɔhidem ye iyip Ɔbɔŋ.

²⁸Edi yak owo odomo idem esie ɔfiɔk, onyuŋ adia uyo, onyuŋ ɔŋwɔŋ cup ntre;

²⁹koro owo eke adiade onyuŋ ɔŋwɔŋde, ke enye midiɔŋɔke ikpɔhidem, ke adia onyuŋ ɔŋwɔŋ ubiom-ikpe odoro idem esie.

³⁰Ke ntak emi ediwak owo ke otu mbufo ekop mmem-idem enyuŋ eduk udɔŋɔ, ediwak enyuŋ edede.

³¹Edi edieke nnyin ikpɔduŋɔrede idem nnyin ise, Abasi ikpekpehe ikpe ye nnyin.

³²Edi ke ini Ɔbɔŋ ekpede ikpe ye nnyin, Enye ɔtunɔ nnyin, mbak edibiom nnyin ikpe ye ererimbot.

³³Ntre nditɔ-ete, ke adaŋemi mbufo ebonode ɔtɔ kiet ndidia udia, etie ebet kiet eken.

³⁴Edieke biɔŋ ɔdɔŋde owo, yak enye adia ŋkpɔ ke ufɔk; man eribono eke mbufo ebonode ɔtɔ kiet okudi se idiwɔrɔde ubiom-ikpe inɔ mbufo. Nyeneŋere mme ŋkpɔ eken nnim ke adaŋemi ndidide do.