Read efik 1 ŊWED CORINTH 12 Bible Online

1 ŊWED CORINTH 12 - efik bible

1 ŊWED CORINTH 12

¹ŊKO, mmaŋa mbufo enana ifiɔk ebaŋa mme enɔ eke Spirit, nditɔ-ete mi.

²Mbufo emɔfiɔk ete, ke ini mbufo ekedide mme okpono-ndem, nyoŋ-esit ke adada mbufo oduyo ebine ndem emi edide imum.

³Kpasuk ntre ke nnam mbufo efiɔk ete, baba owo kiet eke etiŋde ikɔ ke odudu Spirit Abasi idɔhɔke ete, Osuk ɔdɔdiɔk ɔnɔ Jesus; owo inyuŋ ikemeke ndidɔhɔ ete, Jesus edi Ɔbɔŋ, ke midige ke Edisana Spirit.

⁴Edi mme enɔ edi nsio-nsio, edi Spirit edi kiet.

⁵Nsio-nsio usuŋ erinam ŋkpɔ enyuŋ edu, edi Ɔbɔŋ edi kiet.

⁶Nsio-nsio oruk utom enyuŋ edu, edi edi Abasi kiet esine kpukpru owo ke idem anam kpukpru ŋkpɔ.

⁷Edi eyak eriyarare Spirit enɔ owo kiet kiet, man kpukpru owo ekut ufɔn.

⁸Enɔ owo kiet ikɔ ɔniɔŋ, oto ke Spirit;

⁹enyuŋ enɔ enye eken ikɔ ifiɔk, kpa ke Spirit oro; enɔ owo efen mbuɔtidem, ke Spirit oro; enyuŋ enɔ enye eken ukeme ukɔk-udɔŋɔ, kpa ke Spirit kiet oro;

¹⁰enɔ owo efen ukeme ndinam utom-odudu; enɔ enye eken ukeme ndisiak uduak Abasi; enyuŋ enɔ enye eken ukeme ndidomo mme spirit mfiɔk; enɔ enye eken ukeme ndisem nsio-nsio oruk usem; enyuŋ enɔ enye eken ukeme ndikabare usem.

¹¹Edi kpukpru oruk erinam oro ke edi Spirit kiet anam; Enye edeme ɔnɔ kpukpru owo kiet kiet nte Enye amade.

¹²Koro kpa nte ikpɔhidem edide kiet, onyuŋ enyenede ediwak ndido, ndien kpukpru ndido ikpɔhidem, eke ewakde, edide ikpɔhidem kiet, kpasuk ntre ke edi ye Christ.

¹³Koro ke Spirit kiet ke ema enim kpukpru nnyin baptism esin ke ikpɔhidem kiet, ye idide Jew inyuŋ idide Greek, idide ifin inyuŋ idide nditɔ: ema enyuŋ enam kpukpru nnyin iŋwɔŋ Spirit kiet isin ke idem.

¹⁴Koro ikpɔhidem idige ndido kiet, edi edi ediwak ndido.

¹⁵Ukot ɔkpɔdɔdɔhɔ ete, Sia mmendige ubɔk, ndige ubak ikpɔhidem, oro inamke enye etre ndidi ubak ikpɔhidem.

¹⁶Utɔŋ okponyuŋ ɔdɔdɔhɔ ete, Sia mmendige enyin, ndige ubak ikpɔhidem; oro inamke enye etre ndidi ubak ikpɔhidem.

¹⁷Edieke ofuri ikpɔhidem ekpedide enyin-enyin, erikop ikɔ enye? Edieke ofuri ikpɔhidem ekpedide utɔŋ-utɔŋ, erikop utebe enye?

¹⁸Edi nte edide ke emi, Abasi omobon kpukpru ndido kiet kiet ke ikpɔhidem nte enemde Enye esit.

¹⁹Edi edieke mmɔ kpukpru ekpedide ndido kiet, ikpɔhidem enye?

²⁰Edi nte ŋkpɔ ebonode ke emi, ndido ewak, edi ikpɔhidem edi kiet.

²¹Enyin ikemeke ndidɔhɔ ubɔk, ete, Nyomke fi; ibuot inyuŋ ikemeke ndidɔhɔ ukot, ete, Nyomke mbufo.

²²Edi akam ana nte mme ndido eke edide mmem-mmem ke enyin owo ekpedu ke ikpɔhidem:

²³nnyin inyuŋ imen ukpono eke awakde akan inɔ mme ndido ikpɔhidem eke etiede nnyin nte mmɔ minyeneke ukpono; mme ndido eke miyehe enyuŋ ekabare enyene uyɔhɔ uyai;

²⁴Edi mmɔ eke eyede iyomke ite ese ebaŋa mme imɔ. Edi Abasi okototim obok ikpɔhidem, emen ukpono eke awakde akan ɔnɔ mme ndido eke enanade ukpono;

²⁵man eribahare okudu ke ikpɔhidem; edi man kpukpru ndido ekpekere kiet eken.

²⁶Ntem edieke ndido kiet okopde ndutuhɔ kpukpru ndido eken etiene enye ekop ndutuhɔ; edieke enyuŋ enɔde ndido kiet ubɔŋ, kpukpru ndido eken etiene enye edara.

²⁷Ntre ŋko ke mbufo edi ikpɔhidem Christ, kpukpru mbufo enyuŋ edi mme ndido Esie.

²⁸Abasi okonyuŋ emek ndusuk owo onim ke ufɔk Esie; onim mme apostle nte ebe-iso, onim mme asiak-uduak-Abasi ke udiana-akpa itie, onyuŋ onim mme anditeme ke ɔyɔhɔ itie ita, ndien edinim mme anam-utibe-ŋkpɔ, ye mme ɔkɔk-udɔŋɔ, ye mme ɔnɔ-uŋwam, ye mme akama ŋkpɔ, ye mme esem nsio-nsio usem.

²⁹Ndi kpukpru owo edi mme apostle? Ndi kpukpru owo edi mme asiak-uduak-Abasi? Ndi kpukpru owo edi mme anditeme? Ndi kpukpru owo edi mme anam-utibe-ŋkpɔ?

³⁰Ndi kpukpru owo enyene ukeme ndinam udɔŋɔ okure owo eŋwen? Ndi kpukpru owo esem nsio-nsio usem? Ndi kpukpru owo ekeme ndikabare ikɔ eke esemde?

³¹Edi mbufo eyom enɔ eke ekponde ekan ke ofuri esit. Nnyuŋ mmana ŋwut mbufo usuŋ eke akande mmɔ eken kpukpru.