Read efik 1 ŊWED CORINTH 13 Bible Online

1 ŊWED CORINTH 13 - efik bible

1 ŊWED CORINTH 13

¹ŊKPESEM usem mme owo ye eke mme angel, ndien nnyeneke ima, mmakabare nyomo uyom nte akpa ŋkpaŋ, nnyuŋ nsioro uyo nte ekpri ŋkanika.

²Ŋkponyuŋ nnyene ukeme ndisiak uduak Abasi, ndinyuŋ mfiɔk kpukpru ndibe-ndibe ŋkpɔ ye kpukpru ifiɔk; ŋkponyuŋ nnyene ɔyɔhɔ mbuɔtidem, tutu ŋkeme ndimen ikpɔ obot ke itie nduɔk, ndien nnyeneke ima, ndige baba ŋkpɔ kiet.

³Ŋkponyuŋ nyak ofuri inyene mi nnɔ eda ebɔk nditɔ ubuene, ŋkponyuŋ nyak ikpɔhidem mi nnɔ efɔp ke ikaŋ, ndien nnyeneke ima, idoroke mi baba ŋkpɔ kiet.

⁴Ima enyenyene anyan ime, onyuŋ ɔfɔn ido; ima ifibeke ufup;

⁵ima inamke inua, ikohokere idem, inamke ido eke midotke, iyomke ufɔn esiemɔ, isɔpke iyaresit, ikamake udu.

⁶Ima idarake se ikwaŋade, edi adadara se idide akpanikɔ;

⁷ima ememe kpukpru ŋkpɔ, ononim se ifɔnde ke akpanikɔ kpukpru ini, ododori enyin abaŋa kpukpru ŋkpɔ, ememe ime ke kpukpru ŋkpɔ.

⁸Ima idibehe ifep ke nsinsi. Ama edi erisiak uduak Abasi, mmɔ eyekabare edi ikpikpu; edi usem, mmɔ eyedobo; onyuŋ edi ifiɔk, kpa oro eyekabare edi ikpikpu.

⁹Koro nnyin ifiɔk ŋkpɔ ubak-ubak, inyuŋ isiak uduak Abasi ubak-ubak;

¹⁰edi adaŋemi se iyɔhɔde edidide, se idide ubak-ubak eyebe efep.

¹¹Ke ini ŋkedide eyenɔwɔŋ, ntiŋ ikɔ nte eyenɔwɔŋ, nkere ekikere nte eyen ɔwɔŋ, nnyuŋ nneni eneni nte eyenɔwɔŋ; edi mma ŋkabare ŋkpon, mmokure ye ido uyen.

¹²Idahemi nnyin imokut ŋkpɔ ntre ntimere-ntimere, nte owo okutde ŋkpɔ ke ukuriso: edi adaŋoro iyekut ŋkpɔ iso ye iso; idahemi mmɔfiɔk ŋkpɔ ubak-ubak, edi adaŋoro nyefiɔk ɔyɔhɔ-ɔyɔhɔ, kpa nte efiɔkde mi.

¹³Ntem ke mbuɔtidem, ye idori-enyin, ye ima esuk edu, mmɔ mbita; edi andikpon-ŋkan ke otu mmɔ edi ima.